Akxni Jesús xkatawi xʼapóstoles kcuarto niku xaʼawatiya katawayalh, kawanilh: “Putum wixin nakimakgxtakgatit uma katsisni”. Pedro wanilh: “Akit ni. Maski makgapitsi namakgxtakgkgoyan, akit nikxni ktimakgxtakgni”. Pero Jesús kgalhtilh Pedro: “Akxni nina kilhtli tantum puyu, makgtutu nawana pi ni kilakgapasa”.

Akxni soldados linkgolh Jesús kxchik Caifás, atsinu ni putum apóstoles xtsalakgonita. Pero chatiy stalanitilhakgolh lhuwa latamanin. Chatum wa Pedro. Xla tanulh kxkilhtin kxchik Caifás chu talakatsuwilh niku xwi lhkuyat xlakata naskgon. Anta niku kskgoma, chatum skitiwina lakaʼakxilhli Pedro chu wa: “¡Akit klakgapasan! ¡Wix na xtalapat Jesús!”.

Pedro kgalhtilh: “Ni. Nixlikana. Ni kkatsi tuku lichuwinampat”, chu alh kmalakcha. Alistalh atanu skitiwina akxilhli chu kawanilh amakgapitsin: “¡Uma chixku akxtum xtalama Jesús!”. Pedro kgalhtinalh: “¡Nipara kkatsi tiku Jesús!”. Nachuna chatum chixku wa: “Wix na katatapakgsiya. Litasiyaya, la galileos chuwinana chuna la Jesús”. Pedro wa: “¡Ni klakgapasa!”.

Ama kilhtamaku, tantum puyu kilhtlilh. Pedro akxilhli pi Jesús xʼakxilhma chu lakapastakli tuku xwaninit Jesús. Wa xlakata taxtulh chu lu lhuwa tasalh.

Sanedrín xtamakxtuminita kxchik Caifás xlakata xlakkaxtlawakgolh tuku natatlawakgo Jesús. Tribunal niku xtapakgsikgo xpulalinanin takanajla, xlitapakuwi Sanedrín. Xlakkaxwilikgonita namakgnikgo chu xputsamakgo tuku tlan xlimawakakgolh. Pero ni xtekgskgo. Xaʼawatiya Caifás kgalhskilh Jesús: “¿Wix xKgawasa Dios?”. Jesús kgalhtinalh: “Chuna”. Caifás wa: “Ni talakaskin atanu xlimasiyakan. ¡Lixkajnit lichuwinama Dios!”. Tribunal katatayalh chu wa: “Uma chixku lakgchan nani”. Lakalaskgolh, lakachujmanikgolh,  lakgachikgolh, kgaxikgolh chu wanikgolh: “¡Komo wix palakachuwina, kakilawaniw tiku kgaxin!”.

Akxni xkgakgalh, linkgolh Jesús ksala xla Sanedrín chu kgalhskimparakgolh: “¿Wix xKgawasa Dios?”. Jesús kakgalhtilh: “Chuna, wixin wanatit pi chuna”. Wa xlakata limawakaka pi lixkajnit tuku xkilhwama o lixkajni xwanima Dios, chu linka kxchik mapakgsina xalak Roma Poncio Pilato. ¿Tuku lalh alistalh? Naʼakxilhaw.