Saulo chatum romano xwanit tiku lakachilh kTarso. Chatum fariseo xwanit tiku xlakgapasa xlimapakgsin judíos chu ni xkakxilhputun kstalaninanin Cristo. Xkaxwataxtu kxchikkan, lakchixkuwin chu lakpuskatin chu xkatamaknu kpulachin. Asta akxilhli la makgapitsi latamanin aktalamakgnikgolh Esteban.

Pero Saulo ni lipaxuwalh kajwatiya kachipalh kstalaninanin Cristo kJerusalén. Wa xlakata skinilh xapuxku sacerdote pi xmalakgachalh kDamasco xlakata na xkaputsastalanilh anta. Akxni Saulo xtalakatsuwima kkachikin, akgtum tliwakga xkgakganat litamakgstililh chu lhtujli. Kgaxmatli akgtum tachuwin: “Saulo, ¿tuku xlakata kinputsastalanipat?”. Saulo kgalhskilh: “¿Tiku wix?”. Kgalhtika: “Akit Jesús. Kapit kDamasco chu anta nawanikana tuku militlawat”. Ama kilhtamaku, Saulo nialhla akxilhli chu kaj makgachipalinka asta kDamasco.

Anta kDamasco xwi chatum kstalanina Cristo tiku xwanikan Ananías. Jesús wanilh kʼakgtum tamanixni: “Kapit kxchiki Judas, ktiji nema wanikan Recta, chu kaputsa Saulo”. Ananías kgalhtinalh: “Malana, lhuwa tuku kkgaxmatnit xlakata uma chixku. Xla katamaknuma mistalaninanin kpulachin”. Pero Jesús wanilh: “Kapit niku wi, klaksaknit xlakata nalichuwinan xalakwan tamakatsin xlakata Dios klhuwa kachikinin”.

Wa xlakata Ananías alh niku xwi Saulo chu wanilh: “Saulo, tala, Jesús kimalakgachanit xlakata tlan naʼakxilhparaya”. Saulo tunkun lakawanampa. Katsinilh xlakata Jesús chu kstalanina litaxtulh. Tamunulh chu akxtum tsukulh kalitachuwinan xnatalan xlakata Jesús ksinagogas. ¿Lakpuwana la max kaks lilakawankgolh judíos? La uku  xʼakxilhkgo Saulo la xkamasiyani latamanin xlakata Jesús. Judíos xakstu xkakgalhskinkan: “¿Ni wa uma chixku tiku xkaputsastalani kstalaninanin Jesús?”.

Akgtutu kata, Saulo lichuwinalh Jesús kDamasco. Judíos ni xakxilhputunkgo chu xlakputsamakgo la namakgnikgo. Pero natalan katsikgolh tuku xtlawaputunkgo chu makgtayakgolh natsala. Maktikgolh kxlakan patsaps niku xlakalhukun kʼakgtum canasta.

Akxni Saulo alh kJerusalén, xkalakgapaxialhnamputun natalan, pero xlakan xpekuanikgo. Wa xlakata, kstalanina Cristo tiku xwanikan Bernabé chu tlan xlikatsi, lilh Saulo niku xwilakgo apóstoles chu kawanilh pi xlikana xtalakgpalinit. Saulo akxtum katalalh congregación xalak Jerusalén chu xatapaxuwan tsukulh lichuwinan xalakwan tamakatsin xlakata Dios. Chuna la titaxtulh kilhtamaku, limapakuwika Pablo.