Jehová malaknulh: “Nialh kati’analh tatasa, takatsanajwa, tajatat chu linin. Nakxaka akgatunu milakgpixtajatkan. Nialh katilakapastaktit tuku lanit makgasa”.

Jehová kawililh Adán chu Eva kjardín xa’Edén xlakata xatapaxuwan xlatamakgolh chu xkgalhikgolh takaksni. Xlikakninanitkan xwanit xTlatkan xalak akgapun chu lhuwa kamanan xlikgalhitkan xwanit xlakata xmatsamakgolh katiyatni. Adán chu Eva ni kgalhakgaxmatnankgolh, pero tuku Jehová xlakpuwanit natlawa nitu talakgpalima. K’uma libro akxilhnitaw pi Dios ankgalhin makgantaxti tuku malaknu, xTamapakgsin nalimin lhuwa tasikulunalin kkatiyatni, chu chuna nakgantaxtu tuku malaknunilh Abrahán.

Nialh makgas, Satanás, xdemonios chu tiku nitlan likatsikgo nialh katilatamakgolh. Putum latamanin nakakninanikgo Jehová. Ni katitatatlaw chu ni katiniw, wata chali chali lakgtliwakga nakinkamakgkatsikanan chu napaxuwayaw xlakata staknanaw.  Katiyatni akgtum paraíso nawan. Putum nakgalhiyaw lu kgama liwat chu laktlan chiki. Ni kati’analh tiku nitlan likatsikgo chu lakluku, putum tlan nalikatsikgo. Animales xalakluku ni kintikapekuanikgon chu na ni katikapekuaniw.

Na’anan tapaxuwan akxni Jehová natsuku kamalakastakwani tiku nikgonita. Nakamakgamakglhtinanaw tiku latamakgolh makgasa, la Abel, Noé, Abrahán, Sara, Moisés, Rut, Ester chu David. Xlakan nakinkamakgtayakgoyan pi katiyatni akgtum paraíso nawan. Putum kilhtamaku na’anan tuku tlan natlawayaw nema nalakgatiyaw.

Jehová lakaskin nalatapaya kParaíso. Anta lhuwa tuku nakatsiniyaw xlakata Dios tuku nikxni lakpuwanitaw. Wa xlakata, ¡tlakg katalakatsuwiniw Jehová la uku chu putum kilhtamaku!