Apóstoles kgalhakgaxmatkgolh xlimapakgsin Jesús pi nalichuwinankgo xalakwan tamakatsin xla Dios kxlikalanka katiyatni. Kkata 47, natalan xalak Antioquía kamalakgachakgolh Pablo chu Bernabé xlakata makgat xʼankgolh lichuwinankgo Dios. Xchatiykan xatapaxuwan xlichuwinantilhakgo Dios akxni xʼamakgo xlikalanka Asia Menor kkachikinin la Derbe, Listra chu Iconio.

Pablo chu Bernabé xkalitachuwinankgo Dios putum latamanin: tiku xkgalhikgo tumin chu tiku ni, tiku laktsujku chu tiku xlinkgoya kata. Lhuwa tiku kgaxmatkgolh xaxlikana xlakata Cristo. Pablo chu Bernabé na litachuwinankgolh Dios mapakgsina xalak Chipre, tiku xwanikan Sergio Paulo, pero chatum skuwana o skgoyuna xkamalakgachokgoputun. Pablo wanilh skuwana: “Jehová lakatitayayan”. Ama kilhtamaku, skuwana nialhla akxilhli. Akxni mapakgsina Sergio Paulo akxilhli uma, kanajlalh.

Pablo chu Bernabé lakgatum xlichuwinankgo: kʼakgatunu chiki, kmercados, kkatijin chu ksinagogas. Makgtum, mapaksakgolh chatum luntu kListra. Tiku akxilhkgolh uma, lakpuwankgolh pi xlakan dioses xwankgonit chu xkakakninaniputunkgo. Pero Pablo chu Bernabé ni kamaxkikgolh talakaskin, wata kawanikgolh: “¡Kajwatiya Dios kakakninaniw! Akinin kaj lakchixkuwin”. Anta chinkgolh makgapitsi judíos tiku tlawakgolh pi latamanin ni xʼakxilhputunkgolh Pablo. Latamanin aktalamikgolh chu xwataxtukgolh kkachikin xlakata xlakpuwankgo pi xninita. ¡Pero Pablo nina xniy! Lakapala minkgolh makgtayakgo makgapitsi natalan chu limparakgolh kkachikin. Alistalh, Pablo taspitpa kʼAntioquía.

 Kkata 49, Pablo makgat ampa lichuwinan Dios. Alh kaʼakxilha natalan xalak Asia Menor chu alistalh alh lichuwinan xalakwan tamakatsin kʼEuropa. Alh kʼAtenas, kʼÉfeso, kFilipos, kTesalónica chu alakatanu. Taʼankgolh Silas, Lucas chu chatum kgawasa tiku xwanikan Timoteo. Akxtum skujkgolh xlakata xlakkaxwilikgolh xalaksasti congregaciones chu kamakgtayakgolh tliwekglh xtawilakgolh. Pablo na xwi kCorinto chu tamakgxtakgli anta akgtum kata a itat xlakata xkamatliwakglhli natalan. Xlichuwinan Dios, xmasiya, chu xkatsokgni cartas lhuwa congregaciones. Na xliskuja laktsu chiki xla xuwa. Titaxtulh kilhtamaku, Pablo taspitpa kʼAntioquía.

Alistalh kkata 52, Pablo xlimakgtutu makgat ampa lichuwinan Dios, matsukilh kʼAsia Menor. Alh knorte asta kFilipos, chu alistalh alh kCorinto. Pablo na akglhuwa kata tamakgxtakgli kʼÉfeso, xmasiya, xkamapaksa tatatlanin chu xmakgtayanan kcongregación. Na chali chali xmasta taʼakgchuwin ksala xla akgtum escuela. Lhuwa tiku kgaxmatnikgolh chu lakgpalikgolh xlatamatkan. Xaʼawatiya, akxni lakalhuwa niku xlichuwinanit xalakwan tamakatsin xla Dios, Pablo alh kJerusalén.