Akxni apóstol Juan tachin xwi kʼisla xla Patmos, Jesús masiyani 16 tuku aku xʼama la kkilhtamaku nema aku mima. Anta, Juan akxilhli la namasantujli xtukuwani Jehová, la namin xTamapakgsin chu la nakgantaxtu xtalakaskin unu kkatiyatni chuna la kʼakgapun.

Xapulana, Juan akxilha pi Jehová wi kxlaktawilh xla mapakgsina kʼakgapun. Laktawilh litastilikgonit 24 lakgkgolotsin. Lhakgakgonit lakgsnapapa lhakgat chu akwilakgo corona xaʼoro. Klaktawilh taxtuyacha xkgakganat xtachuna makglipni, chu wi tuku makasanan xtachuna jilini. Uma 24 lakgkgolotsin lakgtakilhputakgo Jehová chu kakninanikgo. Alistalh Juan akxilha lhuwa latamanin, nema minkgonitancha xlipaks kachikinin, laktsu kachikinin chu tanu tanu xtachuwinkan, chu kakninanikgo Jehová. Cordero, uma kilhchanima Jesús, wa xmapuchwayanakan chu kapulalin niku wi chuchut xla latamat. Atanu tuku Juan akxilhpa, wa pi Jesús tsukulh katamapakgsinan kʼakgapun 24 lakgkgolotsin. Alistalh, Juan akxilha Jesús la talachipa Dragón, uma kilhchanima Satanás chu xdemonios. Jesús katamakxtu kʼakgapun chu kamakamin kkatiyatni.

 Alistalh, Juan akxilha tuku lu stlan, wa Cordero chu 144,000 tiku yakgo ksipi Sión. Na akxilha chatum ángel nema lawaka talhman xlikalanka katiyatni chu wan: “Kakakninanitit Dios chu kamalankitit”.

Atanu tuku maʼakxilhnika Juan, wa guerra xla Armagedón. Kʼuma guerra Jesús chu ksoldados makgatlajakgo xalixkajni xkakilhtamaku Satanás. Xaʼawatiya tuku Juan maʼakxilhnikan, wa pi kʼakgapun chu kkatiyatni putum tlan latalalinkgo, akxtum wilakgo chu anan takaksni. Na akxilha la malakgsputukan Satanás chu xkamanan, uma wamputun, tiku stalanikgo. Kʼakgapun chu kkatiyatni putum xasanto liʼakxilhkgo xtukuwani Jehová chu kajwatiya xla kakninanikgo.