Chatum chixku tiku nila xtlawan, chali chali xtawila kxmalakcha templo xlakata kskin tumin. Akgtum kakgotanun, akxilhli Pedro chu Juan pi xmimakgolh ktemplo, chu kawanilh: “Katlawatit litlan, wi tuku kakilamaxkiw”. Pedro kgalhtilh: “Nakmaxkiyan tuku tlakg xtapalh nixawa tumin. Kxtukuwani Jesús, ¡kataya chu katlawanti!”. Pedro makgtayalh nataya, chu tsukulh tlawan. Latamanin lipaxuwakgolh akxni akxilhkgolh uma milagro chu tsukukgolh kanajlakgo.

Pero sacerdotes chu saduceos sitsikgolh. Chipakgolh apóstoles, kalinkgolh kʼtribunal kxlakatin xpulalinanin takanajla, nema xwanikan Sanedrín, chu kakgalhskinka: “¿Tiku kamaxkin litliwakga xlakata namapaksayatit uma chixku?”. Pedro kakgalhtilh: “Litliwakga kinkamaxkin Jesucristo, chixku nema wixin makgnitit”. Xpulalinanin takanajla pixlanka kawanikgolh: “¡Nialh kalichuwinantit Jesús!”. Apóstoles kgalhtinankgolh: “Talakaskin naklichuwinanaw Jesús. Ni ktitakilhkakswi”.

Alistalh kamakgxtakgka Pedro chu Juan, chu xlakan tunkun ankgolh kawanikgo amakgapitsin kstalaninanin Jesús tuku xlanit. Xputumkan tlawanikgolh oración Jehová: “Katlawa litlan, kakilamakgtayaw ni nakpekuanaw chu chuntiya nakkalichuwinanan”. Jehová kamaxkilh espíritu santo, chu chuntiya tlan lichuwinankgolh Dios chu xmapaksanankgo. Lhuwa tiku chuntiya xkanajlakgo. Saduceos tiku lu xlisitsikgo katamaknukgolh apóstoles kpulachin. Pero uma katsisni, Jehová malakgachalh chatum ángel tiku kamalakinilh pulachin chu kawanilh apóstoles: “Kapimparatit ktemplo chu kalichuwinamparatit Jesús”.

Lichali, makatsinika Sanedrín: “¡Pulachin liwana lakchuwakgo, pero lakchixkuwin tiku kachipatit nialhtu tanumakgolh! ¡Ktemplo lichuwinamakgo Jesús!”. Wa xlakata kachipaparaka apóstoles chu  kalinka kSanedrín. Xapuxku sacerdote wa: “¡Kkalimapakgsinitan pi nialh kalichuwinantit Jesús!”. Pedro kgalhtinalh: «Kilikgalhakgaxmatkan Dios la kimapakgsinakan nixawa lakchixkuwin».

Xpulalinanin takanajla lu ksitsikgonit chu asta xkamakgniputunkgo apóstoles. Pero chatum fariseo tiku xwanikan Gamaliel, tayalh chu wa: “¡Kuenta katlawatit! Xamakgtum Dios katawi uma lakchixkuwin. ¿Xlikana talatlawaputunatit Dios?”. Xlakan kgaxmatnikgolh. Kamakgxtakgkgolh apóstoles, pero pulana kaliwilinikgolh kiwi chu kawaniparakgolh pi nialh xlichuwinankgolh Jesús. Pero uma ni kamalakgachokgolh apóstoles. Ni pekuankgolh chu chuntiya lichuwinankgolh ktemplo chu kʼakgatunu chiki.