Isaac xkgalhi 40 kata akxni tatamakgaxtokgli Rebeca. Isaac lu xpaxki Rebeca. Titaxtulh kilhtamaku kgalhikgolh chatiy lakgkgawasan stiyun.

Xapuxku xwanikan Esaú, chu xa’aktsujku xwanikan Jacob. Esaú lu xlakgati x’an kkakiwin chu lu tlan xtalatnan. Pero Jacob tlakg xlakgati xtawila kchiki.

Amacha kilhtamaku akxni xniy xatlat, tiku xapuxku tlakg xmakglhtinan pukuxtu chu tumin nixawa xnatalan. Uma xwanikan herencia. Kxfamilia Isaac, herencia na anta xmakgtanuma tuku Jehová xmalaknuninit Abrahán. Esaú ni xlakaskinka xakxilha uma tamalaknun. Pero Jacob xkatsi pi lu xlakaskinka xwanit.

Akgtum kilhtamaku, Esaú lu tlakgwanit chilh kxchik xlakata tantaku kitalatnalh. Chu kgankgawanalh lu xakgama liwat nema xtlawama Jacob, chu wa: “¡Lu ktsinksnima! ¡Kakimaxki tsinu uma liwat!”. Jacob wanilh: “Tlan, pero pulana kakiwani pi tlan nakmakgamakglhtinan tuku lakgchanan”. Esaú kgalhtilh: “¡Nitu klila uma herencia! Mila kawa. Akit kaj kwayamputun”. ¿Lakpuwana pi Esaú limasiyalh liskgalala akxni chuna tlawalh? Ni, nichuna. Lakgmakgalh tuku lu xlakaskinka chu lilakgpalilh akgtum taway.

 Akxni kgololh Isaac, lakgchalh kilhtamaku nasikulunatlawa xapuxku xkgawasa. Pero Rebeca makgtayalh Jacob, xa’aktsujku xkgawasa, xlakata xtlat xmaxkilh xtasikulunalin. Akxni katsilh Esaú lu sitsilh, chu lakkaxwililh xlakata namakgni xtala. Isaac chu Rebeca xmakgtayaputunkgo Jacob, wa xlakata wanikgolh: “Kalakgpi minkuku Labán, xtala mintse chu anta katamakgxtakgti, asta akxni natakaksa Esaú”. Jacob kakgalhakgaxmatli xnatlatni chu tsalalh xlakata ni xmakgnilh xtala.