Israelitas skujnin xwankgonit chu egipcios lu palha xkamaskujukgo. Jehová malakgachalh Moisés chu Aarón xlakata xwanikgolh faraón: “Kamasta talakaskin pi kinkachikin naʼan xlakata nakinkakninani kdesierto”. Faraón lu lanka xmakgkatsikan chu kgalhtinalh: “Ni kinkuenta tuku wan Jehová. Ni ktimastalh talakaskin pi israelitas naʼankgo”. Akxni chuna lalh, faraón tlakg palha kamaskujulh. Pero Jehová wi tuku xʼama masiyani. ¿Tuku tlawalh? Malakgachalh pulakkaw tuku nitlan kʼEgipto. Jehová wanilh Moisés: “Faraón ni kuenta kintlawani. Tsisa naʼan kkgalhtuchokgo Nilo. Kapit chu kawani pi putum kgalhtuchokgo kgalhni nawan xlakata nitu kamakgxtakgma kinkachikin”. Moisés kgaxmatli chu lakgalh faraón. Faraón akxilhli pi Aarón lilakgsnokgli Nilo xlixtokgo, chu chuchut kgalhni wa. Kgalhtuchokgo tsukulh puksan, nila xlikgotnankan chu nikgolh skiti. Pero faraón chuntiya ni xkamakgxtakgputun xlakata xʼankgolh kdesierto.

Akxni xtitaxtunita akgtujun kilhtamaku, Jehová malakgachapa  Moisés xlakata xmakatsinipa faraón: “Komo ni namakgxtakga kinkachikin, Egipto nalitatsama chichakg”. Xlakata faraón ni kgaxmatli, Aarón litamakayawalh xlixtokgo chu putum kachikin litatsamalh chichakg. Xwilakgo chichakg kxchikkan latamanin, kxputamakan, kxpulatukan... ¡Kaniwa xwilakgolh! Faraón wanilh Moisés: “Kaskini Jehová pi kasputli uma tuku nitlan. Alistalh nakkamakgxtakga israelitas”. Wa xlakata Jehová machokgolh uma tuku nitlan chu egipcios lhuwa kamakgstokgwilikgolh xanin chichakg. Putum kachikin tsukulh kapuksan, pero amakgtum, faraón ni kamakgxtakgpa israelitas.

Alistalh Jehová wanilh Moisés: “Kawani Aarón pi kalisnokgli xlixtokgo katiyatni. Akxni chuna natlawa, pokgxni laktsu kuxta nawan”. Chu chuna lalh, lakaxtum anankgolh laktsu kuxta nema xkachuwakgo latamanin. Makgapitsi egipcios wanikgolh faraón: “¡Uma tuku nitlan wa limima Dios!”. Pero maski chuna, faraón ni mastalh talakaskin pi israelitas xtaxtukgolh.