Moisés chu Aarón ankgolh akxilhkgo faraón xlakata xmaxkikgolh xtamakatsin Dios: “Komo ni namastaya talakaskin pi kinkachikin naʼan, nakmalakgacha tábanos kkachikin”. Tábanos laklanka kuxta nema chuwanankgo. Lhuwa miles tábanos tanukgolh kxchikkan egipcios, kxchikkan ricos chu pobres. Putum kachikin xlitsama tábanos. Pero kxtiyat Gosén, niku xlamakgolh israelitas, nipara tantum xlama. Uma xlipulaktati tuku nitlan chu tuku stalaniparakgolh, kajwatiya egipcios katlawanikgolh tuku nitlan pero nitu katlawanilh israelitas. Faraón tasaskinilh Moisés: “Kaskini Jehová pi kamapanulh umakgolh kuxta chu alistalh minkachikin tlan naʼankgo”. Pero akxni Jehová kamapanulh, faraón lakgpalipa xtapuwan. ¿Lakpuwana pi faraón wi tuku xʼama katsini?

Alistalh, Jehová wa: “Komo faraón ni namasta talakaskin pi nataxtu kinkachikin, xʼanimales egipcios natatatlakgo chu nanikgo”. Lichali chuna lalh la xwanit Jehová, pero xʼanimales israelitas nitu lanikgolh. Maski chuna, faraón ni kgaxmatli xlakata lu xatsakat xwanit.

Wa xlakata Jehová wanipa Moisés pi xlakgampa faraón chu xmakgosulh lhkaka kkatalhman. Uma lhkaka la pokgxni xʼama wan nema xlatawakalh chu kalakgtaktalh putum egipcios. Uma pokgxni tlawalh pi xlakan chu xʼanimales wi tuku xkamaktaxtulh nema lu xkatsan. Pero amakgtum faraón kawanipa israelitas pi nila xtaxtukgolh.

 Jehová wanipa Moisés pi xlakgalh faraón xlakata xmaxkilh uma tamakatsin: “¿Chuntiyaku ni mastaputuna talakaskin nataxtu kinkachikin? Chali naktlawa pi natakta chijit”. Lichali, Jehová malakgachalh chijit, jilini chu lhkuyat. Wa tuku tlakg xalanka unisen nema lakgminit Egipto. Kamasputulh putum kiwi chu kapukuxtun, pero nitu katlawanilh xalak Gosén. Wa xlakata faraón wa: “Kaskini Jehová pi kasputli uma, chu tlan napinatit”. Pero akxni chijit chu sen tachokgokgolh, faraón lakgpalipa xtapuwan.

Wa xlakata Moisés wa: “La uku xtuki, nawakgo tuwan nema makgxtakgli unisen”. Lhuwa millón xtuki wakgolh putum tuku xtamakgxtakgnit kkiwi chu kkapukuxtun. Faraón tasaskinilh Moisés: “Kaskini Jehová pi kamapanulh xtuki unu”. Pero akxni Jehová xkamapanunit xtuki, faraón chuntiya ni kgaxmatpa.

Alistalh Jehová wanilh Moisés: “Kachaxti mimakan kkatalhman”. Tunkun putum lu kapukswa wa. Egipcios akgtutu kilhtamaku nila tuku akxilhkgolh. Kajwatiya kxchikkan israelitas xkaxkgakga.

Faraón wanilh Moisés: “Wix chu minkachikin tlan napinatit, pero kamakgxtakgtit miʼanimaleskan”. Moisés kgalhtilh: “Kililinatkan kiʼanimaleskan xlakata nakmakamaxkiyaw kiDioskan”. Faraón lu sitsilh chu pixlanka wa: “¡Kapit! Komo nakakxilhparayan, nakmakgniyan”.