Alistalh, akxni israelitas xwilakgojku kdesierto, Coré, Datán, Abiram chu 250 lakchixkuwin lakatakikgolh Moisés. Wanikgolh: “¡Nialh kkatatayaniyan! ¿Tuku xlakata wix nakilapulalinaw? ¿Chu tuku xlakata Aarón xapuxku sacerdote nawan? Jehová ni kajwatiya katawilan wix chu Aarón, na kinkatawilan akinin”. Jehová ni lakgatilh tuku wankgolh, makgkatsilh pi wa xlakatakimakgolh.

Moisés wanilh Coré chu tiku xtatayakgo: “Katantit ktabernáculo chali chu kalitantit minpumajininkan nema litatsamanit nawan incienso. Jehová nakinkamasiyaniyan tiku laksaknit”.

Lichali, Coré chu 250 lakchixkuwin ankgolh tamakxtumikgo niku xwi Moisés ktabernáculo. Anta tsukukgolh lhkuyukgo incienso la sacerdotes. Jehová wanilh Moisés chu Aarón: “Katamakgatlinitit Coré, chu lakchixkuwin tiku tatayakgo”.

Coré xʼanit ktabernáculo niku xwi Moisés, pero Datán, Abiram chu xfamilias ni xʼamputunkgo. Jehová kawanilh israelitas: “Katamakgatlinitit xchikkan Coré, Datán chu Abiram”. Israelitas lakapala tamakgatlinikgolh. Datán, Abiram chu xfamilias  tamakgxtakgkgolh xkilhtin kxchikkan. Kaj xalan tiyat tapitsilh chu kakgotwalh tiku lakatakikgolh Jehová. Chu taʼaktacha lhkuyat kʼakgapun asta ktabernáculo chu kamasputulh Coré chu 250 lakchixkuwin tiku xtatayakgo.

Alistalh, Jehová wanilh Moisés: “Tiku pulalinkgo akgatunu tribu kaliminkgolh xlixtokgokan. Katsokgti xtukuwanikan kxlixtokgokan. Pero nema xla xtribu Leví, katsokgwili xtukuwani Aarón. Putum lixtokgo kakatamaknu ktabernáculo. Xlixtokgo chixku tiku akit naklaksaka, naxana”.

Lichali Moisés kamaxtukgolh xlixtokgokan chu kamasiyanilh tiku xpulalinankgo kkachikin. Xlixtokgo Aarón kxanama chu xkgalhi xakatla almendras. Chuna Jehová limasiyalh pi laksakli Aarón xlakata xapuxku sacerdote xwa.