Jehová wanilh Moisés: “Katakxtu niku kwi, anta ksipi. Naktsokga kilimapakgsin kchiwix chu nakmaxkiyan”. Moisés takxtulh chu anta tamakgxtakgli 40 kilhtamaku chu 40 katsisni. Akxni anta xwi, Jehová tsokgli Akgkaw Limapakgsin kmaktiy chiwix chu maxkilh Moisés.

Akxni xtitaxtunit tsinu kilhtamaku, israelitas tsukukgolh lakpuwankgo pi Moisés xkamakgxtakgnit. Wa xlakata wanikgolh Aarón: “¡Klakaskinaw tiku nakinkapulalinan. Kakilatlawaniw chatum dios!”. Aarón kakgalhtilh: “Kakilalimiw oro nema kgalhiyatit”. Wa xlakata, xla mastalankilh oro xlakata nalitlawa tuku xtachuna tantum aktsu wakax. Latamanin wankgolh: “¡Uma aktsu wakax, kidioskan tiku kinkalakgmaxtun kʼEgipto!”. Tlawakgolh paskua chu tsukukgolh kakninanikgo aktsu wakax xaʼoro. ¿Tlan xwanit uma? Ni, xlakata israelitas xwankgonit pi kaj wa Jehová tiku xʼamakgo kakninanikgo. Pero la uku ni xmakgantaxtimakgo tuku xmalaknukgonit.

 Jehová akxilhli tuku xlama chu wanilh Moisés: “Katakta niku wi kachikin, xlakata ni kinkgalhakgaxmatmakgo. Kakninanimakgo nixaxlikana dios”. Moisés taktalh ksipi chu xchipanit maktiy chiwix.

Akxni Mosiés xtalakatsuwima niku xwilakgolh, kgaxmatli pi latamanin xkilhtlimakgo. Akxni chalh, akxilhli pi xtantlimakgo chu xkakninanimakgo aktsu wakax. Moisés lu sitsilh chu makgalh maktiy chiwix chu tapakglhkgolh. Tunkun alh masputu aktsu wakax chu alistalh kgalhskilh Aarón: “¿La matlawikgon uma tuku nitlan?”. Aarón kgalhtinalh: “Ni kasitsi, wix katsiya la likatsikgo. Xlakaskinkgo chatum dios, wa xlakata kmakaʼalh klhkuyat oro chu taxtulh uma aktsu wakax”. Aarón ni xlitlawat xwanit uma. Moisés takxtupa ksipi chu tasaskinilh Jehová pi xkatapatilh kachikin.

Jehová katapatilh israelitas tiku xkgalhakgaxmatputunkgo. Lu xlakaskinka xwanit pi xkgalhakgaxmatkgolh Jehová chu nachuna Moisés, ¿nixlikana?