Akxni max akgtiya papaʼ xtitaxtunit lata taxtukgolh kʼEgipto, chankgolh ksipi Sinaí chu anta tamakgxtakgkgolh. Chu Jehová skinilh Moisés pi xtakxtulh kʼuma sipi chu wanilh: “Akit kkalakgmaxtulh israelitas. Komo xlakan nakinkgalhakgaxmatkgo chu namakgantaxtikgo kilimapakgsin, xasanto kinkachikin nawan”. Akxni Moisés taktalh ksipi, kawanilh israelitas tuku xwanit Jehová. ¿Tuku kgalhtinankgolh? Wankgolh: “Naktlawayaw putum tuku nakinkaskiniyan Jehová”.

Alistalh, Moisés takxtupa ksipi. Anta Jehová wanilh: “Akgtutu kilhtamaku tsankga xlakata nakkatachuwinan kachikin. Kakawani latamanin pi ni naʼankgo ksipi Sinaí”. Moisés taktalh chu kawanilh israelitas pi xtakaxkgolh xlakata xkgaxmatnikgolh Jehová.

Xliʼakgtutu kilhtamaku, israelitas akxilhkgolh makglipni chu tsitsakga puklhni anta ksipi. Chu na kgaxmatkgolh pi lu tliwakga jililh chu makasanalh akgalokgot. Alistalh Jehová taktalh kxlakʼitat lhkuyat. Israelitas lu xpekuamakgo. Putum sipi xlitsama jin chu lu tliwakga xtachikima. Tlakg xtaliwakatilhama la xmakasanama akgalokgot. Chu Jehová wa: “Akit Jehová. Ni milikakninanitkan atanu dios”.

Moisés takxtupa ksipi chu anta Jehová maxkilh limapakgsin xla kachikin. Anta kawanilh la xkakninanikgolh chu la xlinkgolh xlatamatkan. Moisés katsokgli chu alistalh kalikgalhtawakganilh israelitas. Xlakan malaknukgolh: “Naktlawayaw putum tuku kinkaskiniyan Jehová”. Wa xlakata wi tuku malaknunikgolh Dios, ¿pero xʼamakgo makgantaxtikgo?