Josué pulalilh xkachikin Jehová lhuwa kata chu nilh akxni xkgalhi 110 kata. Israelitas xkakninanikgo Jehová akxni xlama Josué. Pero akxni nilh, tsukukgolh kakninanikgo ni xaxlikana dioses chuna la xtlawakgo latamanin xalak Canaán. Xlakata israelitas nialh xkgalhakgaxmatkgo Jehová, xla mastalh talakaskin pi mapakgsina xalak Canaán nema xwanikan Jabín xkamaʼakglhuwilh. Wa xlakata kachikin tasaskinikgolh Jehová xkamakgtayalh. Jehová mastalh xasasti pulalina nema xwanikan Barac. Xla xʼama makgtaya kachikin xkakninaniparakgolh Jehová.

Débora chatum palakachuwina puskat xwanit. Débora matasaninalh Barac xlakata xmaxkilh uma xtamakatsin Jehová: “Katapi 10,000 lakchixkuwin kpuxkga wanikan Cisón xlakata natalachipayatit xsoldados Jabín. Anta natlajaya Sísara tiku pulalin umakgolh soldados”. Barac kgalhtilh Débora: “Nakan, pero kajwatiya komo wix nakintapina”. Xla wanilh: “Naktaʼanan, pero milikatsit pi ni wix katimakgni Sísara. Jehová wanit pi chatum puskat namakgni”.

Débora akxtum taʼalh Barac chu xsoldados ksipi Tabor xlakata natatlawa guerra. Akxni Sísara katsilh, kamamakgstokglhi xcarro xla  guerra chu xsoldados niku kaxtum xwanit. Débora wanilh Barac: “La uku Jehová natlawa pi natlajaya”. Wa xlakata Barac chu 10,000 xsoldados taktakgo ksipi xlakata natalachipakgo xalakgtliwakgan xsoldados Sísara.

Alistalh Jehová tlawalh pi xchuchut puxkga Cisón xtaxtulh chu xtalakgnukgolh kputlun carros xla guerra xla Sísara. Sísara taktalh xputlaw chu tsalalh. Barac chu xsoldados tlajakgolh xsoldados Sísara, pero Sísara tsalalh chu tatsekgli kxchik chatum puskat nema xwanikan Jael. Xla limakgotnilh tsinu leche chu litlapalh lhakgat. Ama soldado lhtatatamalh xlakata lu xtlakgwanit. Chu Jael tsinu tsinu talakatsuwinilh, chu liʼakgxtokgolh xatakankalhpitni kiwi wantu xlitlawakan laktsu chiki chu Sísara nilh.

Alistalh chilh Barac tiku xputsama Sísara. Jael taxtulh kxchik chu wanilh: “Katanu, nakmasiyaniyan chixku tiku putsapat”. Barac tanulh kchiki chu akxilhli pi anta xanin xma Sísara. Barac chu Débora tsukukgolh limalankikgo Jehová akgtum takilhtlin xlakata xkamakgtayanit natlajakgo xtalamakgasitsin. Israelitas ni kgalhikgolh taʼakglhuwit 40 kata.