Israelitas amakgtum makgxtakgparakgolh Jehová chu tsukukgolh kakninanikgo nixaxlikana dioses. Pero uma nixaxlikana dioses ni xkamakgtayakgo akxni ammonitas xkatalatlawakgo. Kachikin lhuwa kata chuna patinalh. Alistalh wanikgolh Jehová: “Kmakglakgalhinanitaw. Katlawa litlan kakilalakgmaxtuw kxmakan kintalatlawanakan”. Israelitas malakgsputukgolh xʼidoloskan chu amakgtum kakninaniparakgolh Jehová. Chu Jehová nialh tayanilh nakaʼakxilha pi xpatinamakgo.

Wa xlakata israelitas laksakkgolh chatum soldado xwanikan Jefté. Xla wa tiku xʼama kapulalin akxni xkatalachipakgolh ammonitas. Jefté wanilh Jehová: “Komo nakilamakgtayayaw naktlajayaw uma guerra, nakmakamaxkiyan tiku pulana nakimakgamakglhtinan kkinchik akxni  naktaspita”. Jehová kgaxmatli xʼoración Jefté chu makgtayalh natlaja guerra.

Akxni Jefté chalh kxchik, tiku pulana taxtulh namakgamakglhtinan wa xtsumat. Kaj chatum xtsumat xwanit. Akxni taxtulh xtantlima chu xtlakgma xpandereta. ¿Tuku xʼama tlawa Jefté? Lakapastakli tuku xmalaknunit chu wa: “¡Ni, kintsumat! Lu makgalipuwana kinaku. Wi tuku kmalaknunilh Jehová chu xlakata nakmakgantaxti, talakaskin nakmalakgachayan ktabernáculo kSiló xlakata naskujniya”. Xtsumat kgalhtilh: “Tlat, komo chuna malaknuni Jehová, milimakgantaxtit. Kajwatiya kskiniyan kakimaxki talakaskin nakkataʼan kiʼamigas kkasipijni akgtiy papaʼ. Alistalh nakkan ktabernáculo”. Xtsumat Jefté makgantaxtilh xtachuwin chu skujli ktabernáculo putum xlatamat. Chu xʼamigas akgatunu kata xʼankgo akxilhkgo kSiló.