Jehová wanilh Samuel: “Kapit kxchik Jesé. Chatum xkgawasa mapakgsina xalak Israel nawan”. Wa xlakata Samuel alh chu akxni akxilhli xapuxku lakpuwa: “Max wa uma kgawasa tiku laksakkanit”. Pero Jehová wanilh Samuel pi ni wa tiku xlaksaknit chu na wanilh: “Akit kkaʼakxilha la xlikana likatsikgo latamanin, ni kajwatiya la tasiyakgo”.

Jesé kaliminilh Samuel atanu kgalhchaxan xkamanan. Pero Samuel wa: “Jehová nipara chatum laksaknit. ¿Wilakgo atanu?”. Jesé kgalhtinalh: “Kajwatiya tsankga tlakg xaʼaktsu, David, tiku kakuentajtlawama borregos”. Akxni David tanulh, Jehová wanilh Samuel: “¡Wa uma klaksaknit!”. Alistalh Samuel akmawakalh aceite David. Chuna laksakli xlakata xmapakgsina Israel xwa.

Titaxtulh kilhtamaku, israelitas xtalachipamakgo filisteos, tiku xkgalhikgo chatum soldado tiku lu lanka xwanit, xwanikan Goliat. Chali chali Goliat xkalikgalhkgamanan israelitas chu pixlanka xkawani: “Kamalakgachatit chatum soldado tiku nakintalachipa. Komo nakintlaja, miskujnin naklitaxtuyaw. Komo akit naktlaja, wixin kiskujnikan nawanatit”.

David alh niku xwilakgo soldados xlakata kalinilh xliwatkan xnatalan, tiku soldados xwankgonit. Anta kgaxmatli tuku xkawanima Goliat chu wa: “¡Akit naktalachipa!”. Mapakgsina Saúl kgalhtilh: “Pero kaj aktsu kgawasa wix”. David kgalhtilh: “Jehová nakimakgtaya”.

 Wa xlakata Saúl masakwanilh tuku xtamakgnu akxni xtlawa guerra, pero David wanilh: “Nila naklitalachipanan uma”. Wa xlakata David tiyalh xhonda. Akgtum honda wa tuku limakgosukan chiwix. Alh kʼakgtum kgalhtuchokgo, laksakli akgkitsis xalakslipinki chiwix chu kamujulh kxmurralh. Alistalh lakapala lakgalh Goliat. Uma lanka soldado wanilh: “¡Wix aktsu kgawasa, katalakatsuwi chu naʼakxilha tuku naktlawaniyan! Xliwat animales naktlawayan”. David ni pekualh chu kgalhtilh: “Wix tampat litalachipanana kgantum espada chu kgantum lanza, pero akit naktalachipayan kxtukuwani Jehová. Ni akinin kilatalachipamaw, wa Dios talachipapat. Putum tiku wilakgo unu naʼakxilhkgo pi Jehová tlakg tliwakga nixawa kgantum espada o lanza. Xla nakamakamastayan kkimakankan”.

Alistalh, David tamaknulh akgtum chiwix kxhonda chu xliputum xlitliwakga lakgmakgosulh. Xlakata xtamakgtay Jehová, chiwix tliwakga alh chu mutanulh Goliat. Uma lanka soldado, xanin tamacha. Chu filisteos tsalakgolh xlakata ni xkamakgnika. ¿Chu wix? ¿Lipawana Jehová chuna la David?