Xapuxku xkgawasa mapakgsina Saúl xwanikan Jonatán chu chatum soldado tiku ni xpekuan. David wa pi Jonatán tlakg xlakapala nixawa águila chu tlakg tliwakga nixawa león. Makgtum, Jonatán kaʼakxilhli makgapitsi soldados kʼakgtum kgastin. Wa xlakata wanilh tiku xlini xʼescudo chu tuku xlitalatlawanan: “Nakatalachipayaw komo Jehová nakinkalimasiyaniyan pi chuna natlawayaw. Komo filisteos nakinkawaniyan pi katakxtuw, kilikatsitkan pi nakatalachipayaw”. Filisteos pixlanka wankgolh: “¡Katantit kilatalachipayaw!”. Wa xlakata, Jonatán chu tiku xlini xʼescudo tawakakgolh ksipi chu katlajakgolh 20 soldados.

Xlakata Jonatán wa xapuxku xkgawasa Saúl xwanit, xlakgchan mapakgsina xwa akxni xnilh xtlat. Pero Jonatán xkatsi pi Jehová xlaksaknit David xlakata mapakgsina xwa kʼIsrael chu ni xlakgsitsini. Wata Jonatán chu David tlakg tlan amigos litaxtukgolh.  Lamalaknunilh pi nalakuentajtlawa chu nalamakgtaya. Xlakata xlimasiyakgolh pi amigos xwankgonit, Jonatán maskiwilh David tuku xmaktawaka, xʼespada, xʼarco chu xcinturón.

Akxni David xtatsekgnima Saúl, Jonatán alh akxilha chu wanilh: “Tliwakga miliwanat chu ni napekuana. Jehová laksaknitan xlakata mapakgsina nawana. Asta kintlat liwana katsi”. ¿Xkgalhiputu chatum amigo tiku tlan likatsi la Jonatán?

Jonatán makglhuwa katuwa wililh xlatamat xlakata xmakgtayalh xʼamigo. Xkatsi pi xtlat, mapakgsina Saúl, xmakgniputun David, wa xlakata wanilh: “Komo namakgniya David, natlawaya talakgalhin, xla nitu tlawama tuku nitlan”. Saúl lu sitsinilh Jonatán. Makgapitsi kata alistalh, Saúl chu Jonatán akxtum nikgolh kʼakgtum guerra.

Akxni xninita Jonatán, David putsalh Mefibóset, xkgawasa Jonatán. Akxni tekgsli wanilh: “Xliputum milatamat nakkuentajtlawayan xlakata mintlat lu tlan kiʼamigo xwanit. Natawilaya kkinchik chu akxtum nawayanaw kkimesa”. David putum kilhtamaku lakapastakli xʼamigo Jonatán.