Akxni David xmakgninita Goliat, Saúl xpuxku soldados tlawalh. David tlajalh klhuwa guerras chu lu lhuwa lakgapaska. Akxni xkitaspita kʼguerra, lakpuskatin xtantlikgo chu xkilhtlikgo akxni xmakgamakglhtinankgo: “Saúl katlajanit lhuwa mil xtalatlawananin, ¡pero David tlakg lhuwa mil tiku katlajanit!”. Wa xlakata, Saúl tsukulh sitsini David chu xmakgniputun.

David lu tlan xtlakga arpa. Akgtum kilhtamaku, akxni xtlakgnanima mapakgsina Saúl, mapakgsina lakgmakgosulh xlanza. Pero David takilhputalh chu lanza tayacha kpatsaps. Akxni chuna lalh, Saúl makglhuwa litsakgsalh namakgni. Xaʼawatiya, David tsalalh chu tatsekgli kdesierto.

Saúl lilh 3,000 soldados xlakata naputsastala David. Saúl tanulh klhuku niku David chu xsoldados xtatsekgkgonit xlakata  ni xkatsikgo. Xsoldados David xatsekg wanikgolh: “Tlan namakgniya Saúl”. David lakgtalakatsuwilh Saúl chu ni katsilh akxni chukunilh klhakgat. Pero alistalh lu nitlan limakgkatsilh xlakata ni xmaxkinit kakni mapakgsina tiku Jehová xlaksaknit. Wa xlakata ni mastalh talakaskin pi xsoldados wi tuku xtlawanikgolh Saúl. Akxni Saúl taxtulh klhuku, David pixlanka wanilh: “Tlan xakmakgnin, pero ni chuna ktlawalh”. ¿Lakpuwana pi la uku Saúl tlakg tlan xʼama likatsini David?

Ni. Saúl chuntiya putsastalanilh David. Wa xlakata, akgtum tsisni, David chu xpuxnimat Abisái xatsekg tanukgolh niku xwi Saúl. Asta Abner tiku xkuentajtlawa Saúl, klhtatanit. Abisái wanilh David: “¡Wa uma xkgalhkgalhimaw! Kimaxki talakaskin nakmakgni Saúl”. Pero David kgalhtilh: “Jehová natalakkaxla. Wata kaj katiya xlanza chu xpokgotnu, chu kawa”.

Alistalh, David tawakakgolh kʼakgtum sipi nema lakatsu xwi. Anta tlan xʼakxilha niku xwilakgo Saúl chu xsoldados. David pixlanka kilhanilh: “¡Abner! ¿Tuku xlakata ni kuentajtlawaya mapakgsina? ¿Niku wi xpukgotnu chu xlanza?”. Saúl kgalhlakgapasli David chu wanilh: “Tlan xkimakgni, pero nichuna tlawa. Kkatsi pi xlichatiy mapakgsina kʼIsrael nawana”. Wa xlakata Saúl taspitpa kxchik. Pero ni putum tiku xalak xfamilia Saúl ksitsinikgo David.