Jehová xkamaxkinit jueces israelitas xlakata xkapulalinkgolh, pero xlakan xlakaskinkgo chatum mapakgsina. Wa xlakata wanikgolh Samuel: “Putum amakgapitsi kachikinin kgalhikgo xmapakgsinakan, akinin na klakaskinaw chatum”. Samuel makgkatsilh pi uma nitlan xwanit. Wa xlakata tlawanilh oración Jehová, chu Jehová kgalhtilh: “Kachikin ni wix lakgmakgaman. Akit kilakgmakgamakgo, kakawani pi tlan nakgalhikgo chatum mapakgsina, pero uma mapakgsina lhuwa tuku nakaskini”. Maski chuna, latamanin xwankgo: “¡Kkgalhiputunaw chatum mapakgsina!”.

Wa xlakata, Jehová wanilh Samuel pi chatum chixku nema xwanikan Saúl, xapulana mapakgsina k’Israel x’ama wan. Akxni Saúl lakgapaxialhnalh Samuel kRamá, Samuel laksakli la mapakgsina, uma wamputun pi akmawakalh aceite xlakata xlimasiyalh pi mapakgsina x’ama wan.

Alistalh, Samuel kamamakxtumilh israelitas xlakata nakamasiyani xasasti xmapakgsinakan. Pero ni niku xtekgskan Saúl. ¿Katsiya tuku xlakata? Xlakata xtatsekgnit. Akxni tekgska, tamakxtuka chu yawaka kxitat kachikin. Xla tlakg lanka nixawa amakgapitsin chu lu stlan kgawasa xwanit. Samuel wa: “Ka’akxilhtit tiku laksaknit Jehová”. Chu latamanin pixlanka wankgolh: “¡Lanka kawa kimapakgsinakan!”.

Xapulana, mapakgsina Saúl xkgalhakgaxmata tuku xwani Samuel chu xkgalhakgaxmata Jehová. Pero alistalh talakgpalilh. Makgtum, Samuel wanilh Saúl pi xkgalhkgalhilh xlakata natlawa tamakamastan. Mapakgsina ni xlakgchan natlawa tamakamastan. Pero Samuel ni lakapala chalh, wa xlakata Saúl xakstu makamastalh. ¿Tuku tlawalh Samuel? Wanilh: “Milikgalhakgaxmatat xwanit Jehová, pero ni chuna tlawa.” ¿Katsinilh Saúl pi putum kilhtamaku xlikgalhakgaxmatat Jehová?

Alistalh Saúl alh katalachipa amalequitas, chu Samuel wanilh pi putum xkamakgnilh. Pero Saúl ni makgnilh mapakgsina Agag. Wa xlakata Jehová wanilh Samuel: “Saúl kimakgxtakgnit, nialh  kinkgalhakgaxmata”. Samuel lu lilipuwa, wa xlakata wanilh Saúl: “Jehová naputsa atanu mapakgsina xlakata wix ni kgalhakgaxmata”. Akxni Samuel talakgaspitli xlakata na’an, Saúl chipalh xkilhpan xlhakgat chu xtitnilh. Samuel wanilh Saúl: “Nachuna namakglhtiyan Jehová tamapakgsin”. Uma wamputun pi Jehová x’ama maxki tamapakgsin atanu tiku xpaxkilh chu xkgalhakgaxmatli.