Anta kJezreel, akxni xtalakaxtu kxventana, mapakgsina Acab xakxilha niku xchanit uvas chatum chixku xwanikan Nabot. Acab xlakaskin uma tiyat chu xmakgtamawaputun. Pero Nabot ni kstamaxkiputun xlakata xLimapakgsin Jehová xwan pi nila kstakan tuku xkamakgxtakgnikgonit xnatlatnikan. Nabot tlawalh tuku xlilat. ¿Lakpuwana pi Acab tlan akxilhli tuku tlawalh Nabot? Ni. Acab lu sitsilh. Lu xsitsinit asta ni xtaxtuputun kxcuarto chu nitu xwaputun.

Xpuskat Acab wa Jezabel tiku lixkajni xlikatsi. Xla wanilh: “Wix xmapakgsina Israel, tlan nakgalhiya tuku nalakaskina. Akit nakmakglhtinan uma pukuxtu chu nakmaxkiyan”. Wa xlakata katsokgnilh cartas lakgkgolotsin xalak kachikin. Kʼumakgolh cartas kalimapakgsilh pi xwankgolh pi Nabot nitlan xlichuwinanit Dios chu alistalh xʼaktalamakgnika. Lakgkgolotsin tlawakgolh putum tuku kalimapakgsilh Jezabel. Alistalh, xla wanilh Acab: “La uku Nabot ninita. Tlantiya nachipaya niku chanit uvas”.

Ni kajwatiya Nabot tiku nitu xtlawanit nema makgnilh Jezabel. Xla kamakgnilh lhuwa tiku xpaxkikgo Jehová. Na xkakninani ídolos chu xtlawa tuku lu nitlan. Pero Jehová xʼakxilhma putum uma. ¿Tuku xʼama tlawani Jehová Jezabel?

Akxni xninita Acab, xkgawasa Jehoram tsukulh mapakgsinan. Chu Jehová malakgachalh Jehú xlakata xmalakgaxokgelh Jezabel chu xfamilia.

Jehú tawakalh kxputlaw chu alh kJezreel, niku xlama Jezabel. Jehoram na tawakalh kxputlaw chu alh lakgapaxtokga Jehú. Akxni akxilhli, Jehoram kgalhskilh: “¿Kgalhiyaw takaksni?”. Jehú kgalhtinalh: “Ni katiʼanalh takaksni komo mintse  chuntiya natlawa tuku nitlan”. Jehoram malakgspitputulh xputlaw xlakata naʼan, pero Jehú lakgmakalh kgantum flecha chu makgnilh.

Alistalh, Jehú alh kxchik Jezabel. Xla katsilh pi xmima Jehú, wa xlakata talakamanilh, akxkitli chu kgalhkgalhilh lakatsu kventana kxlikilhmaktiy chiki. Akxni chalh, Jezabel lu nitlan tuku wanilh. Jehú kawanilh kskujnin tiku xpaxtuyakgo: “¡Kamamokgositit!”. Xlakan mamokgosikgolh, tamacha kkatutsu chu nilh.

Alistalh, Jehú kamakgnilh 70 xkamanan Acab chu masputulh kkachikin xtakaknin Baal. ¿Akxilha? Jehová putum katsi chu kamalakgaxokge tiku tlawakgo tuku nitlan akxni lakgchan.