Jehosafat mapakgsina xalak Israel xwanit, wa masputulh niku xmaxkikan tamakamastan Baal chu ídolos nema xʼanan kkachikin. Xla xlakaskin pi latamanin xlakgapaskgolh xlimapakgsin Jehová. Wa xlakata, kamalakgachalh príncipes chu levitas xlikalanka Judá xlakata xkamasiyanikgolh xlimapakgsin Jehová.

Kachikinin nema lakatsu xwilakgolh ni xtalatlawaputunkgo Judá xlakata xkatsikgo pi Jehová xkamakgtaya. Asta xlinikgo tamaskiwin Jehosafat. Pero tiku xalak Ammón, Moab chu amakgapitsi kachikinin xalak Seír ankgolh katalachipakgo xalak Judá. Jehosafat xkatsi pi xʼama maklakaskin xtamakgtay Jehová. Wa xlakata kamamakxtumilh kJerusalén putum lakchixkuwin, lakpuskatin chu kamanan. Kxlakatinkan tlawalh oración: “Jehová, komo ni nakilamakgtayayaw nila ktitlajanaw kʼguerra. Katlawa litlan, kakilawaniw tuku kilitlawatkan”.

Jehová kgaxmatnilh chu kgalhtilh: “Ni kapekuanti, akit nakkamakgtayayan. Kapitit niku militawilatkan, nitu katlawatit chu kaʼakxilhtit la nakkalakgmaxtuyan”. ¿La xʼama kalakgmaxtu Jehová?

Lichali tsisa, Jehosafat laksakli tiku kilhtlikgo chu kawanilh pi xtlawankgolh kxlakatinkan soldados. Xlakan taxtukgolh kJerusalén chu ankgolh niku xtalatlawanamakgo, anta niku xwanikan Tecoa.

Tiku xkilhtlikgo lu xpaxuwamakgo akxni pixlanka xlimalankimakgo Jehová takilhtlin. Akxni chuna xtlawamakgo, Jehová xtalatlawanama xpalakatakan. Tlawalh pi nialh xkatsikgolh tuku natlawakgo ammonitas chu moabitas chu xakstukan tsukukgolh latalatlawakgo. Xputumkan nikgolh. Pero Jehová kakuentajtlawalh tiku xalak Judá, soldados chu sacerdotes. Putum kachikinin nema lakatsu xwilakgolh katsikgolh tuku xtlawanit Jehová chu katsikgolh pi chuntiya xkamakgtayama xkachikin xlakata xtalatlawananin nitu xkatlawanikgolh. ¿La lakgmaxtu Jehová xkachikin? Tipalhuwa la tlawa. Xla ni maklakaskin xtamakgtay latamanin.