Jezabel katsilh tuku xkaʼakgspulanit xpalakachuwinanin Baal chu lu sitsilh. Wa xlakata malakgachalh chatum skujni xlakata xwanilh Elías: “Chali ninita nawana, chuna la xpalakachuwinanin Baal”. Elías lu pekualh chu tsalalh kdesierto. Anta tlawalh oración: “Jehová, nialh ktayani. Kniputun”. Elías lu xtlakgwanit chu lhtatatawi kxtampin kgantum kiwi.

Pero chatum ángel mastakwanilh Elías chu pixtsu tachuwinalh: “Kataki chu kawayanti”. Elías akxilhli lakstilili kaxtilanchu kxkgalhni xachichi chiwix chu patum jarra niku xtajuma chuchut. Wayalh chu kgotnalh chu lhtatapa. Ángel mastakwanipa chu wanilh: “Kawayanti. Namaklakaskina litliwakga xlakata makgat niku napina”. Wa xlakata Elías wayampa. Alistalh, alh 40 kilhtamaku chu 40 tsisni asta akxni chalh ksipi Horeb. Anta tanulh kʼakgtum lhuku niku lhtatalh. Chu Jehová tachuwinalh: “¿Tuku tlawapat unu Elías?”. Elías kgalhtilh: “Israelitas ni makgantaxtikgonit tuku malaknunikgon. Masputukgolh mimpumakamastan chu kamakgnikgolh mimpalakachuwinanin. Chu la uku na kimakgniputunkgo”.

Jehová wanilh Elías: “Kataxtu chu kataya ksipi”. Xapulana milh tliwakga un, alistalh tachikilh tiyat chu alistalh lhkuyat. Xaʼawatiya, Elías kgaxmatli lu tlan tachuwin. Wa xlakata litalakgatlapalh klhakgat chu tayalh kxkilhtin lhuku. Jehová kgalhskilh tuku xlakata xtsalanit. Chu Elías kgalhtilh: “Akit xaʼawatiya palakachuwina tiku akgataxtu”. Pero Jehová wanilh: “Ni miʼakstu wila. Wilakgolhku 7,000 israelitas tiku kinkakninanikgo. Kapit chu kawani Eliseo pi wa palakachuwina nawan akxni naniya”. Elías tunkun alh tlawa tuku limapakgsilh Jehová. ¿Lakpuwana pi Jehová na namakgtayayan komo nakgalhakgaxpata? Chuna. La uku kaʼakxilhwi tuku lalh akxni nitu ksenama.