1-3. 1) ¿Tuku xlakata xʼamaka kamakgnikan lakchixkuwin xalak xchik Nabal? 2) ¿Tuku kinkamasiyaniyan Abigail?

ABIGAIL akxilha pi kgawasa tiku makatsinima lu pekuanit xlakata kalakgmima tuku lu nitlan. Akgtati ciento soldados mimakgo kamakgnikgo putum lakchixkuwin xalak xchik Abigail chu xchixku, Nabal. Pero ¿tuku xlakata kamakgniputunkan?

² Wa xkuenta Nabal. Chuna la xlismaninit, nitlan likatsiparanit chu wamparanit tuku nitlan. Pero la uku makgasitsilh tiku ni xlimakgasitsit: wa tiku xpulalin soldados nema ni xmakgxtakgkgo chu tiku lu xkatsinikgo tlawakgo guerra. Wa xlakata uma kgawasa, tiku max xkuentajtlawani xʼanimales Nabal, alh wani Abigail xlakata wi tuku xtlawalh xlakata ni xkamakgnika. Pero ¿tuku xtlawalh chatum puskat xlakata xkamachokgolh akgtati ciento soldados?

³ Pulana kalakgapaswi Abigail chu alistalh nalichuwinanaw tuku tlawalh. ¿La xlikatsi Abigail? ¿Tuku xlakata kgalhilh taʼakglhuwit xfamilia? ¿Chu tuku kinkamasiyaniyan xlakata xtakanajla?

4. ¿La xlikatsi Nabal?

⁴ Nila nawanaw pi Nabal chu Abigail watiya talakapastakni xkgalhikgo. Nabal tlan kitaxtunilh xlakata tekgsli chatum puskat la Abigail, pero Abigail nitlan kitaxtunilh. Xlikana, Nabal lhuwa tuku xkgalhi chu wa xlakata lu xlakaskinka xmakgkatsikan. Pero amakgapitsin ni lu tlan xlichuwinankgo. Anta kBiblia ni tatekgsa atanu tiku tlakg nitlan lichuwinankan la Nabal. Asta xtukuwani wamputun «Tonto». Ni takatsi komo uma tukuwani wa wilinika akxni lakachilh o chuna tsukuka limapakuwikan alistalh. Pero  lu xminini uma tukuwani. Nabal «lixkajni xlikatsi chu xtlawa tuku nitlan». Kaj katuwa tuku xwan chu lu xakgotni xwanit, xpekuanikan pero na ni xʼakxilhputunkan (1 Sam. 25:2, 3, 17, 21, 25).

5, 6. 1) ¿Tukuya lakwan tayat xkgalhi Abigail? 2) ¿Tuku xlakata Abigail tatamakgaxtokgli tiku nitlan xlikatsi?

⁵ Pero Abigail ni chuna xlikatsi. Xtukuwani wamputun «Kintlat Paxuwanit». Putum natlatni lu lipaxuwakgo komo xtsumatkan lu stlan pero tiku lu xatlan tlat, tlakg xlakaskinka naʼakxilha la nalikatsi nixawa la tasiya xtsumat. Min kilhtamaku tiku lu lakstlan ni fuerza tlawakgo xlakata nakgalhikgo lakwan tayat la umakgolh: liwana lakapastakkan tuku tlawakan, liskgalala, ni pekuankan chu takanajla. Pero Abigail nichuna tlawalh. Chuna la wan Biblia, ni kaj stlan xwanit, wata na skgalala xwanit chu liwana xlakapastaka tuku xtlawa (kalikgalhtawakga 1 Samuel 25:3).

⁶ ¿Tuku xlakata uma lu skgalala tsumat tatamakgaxtokgli tiku xatonto chu lixkajni xchuwinan? Kalakapastakwi pi ama kilhtamaku lu xlakaskinka xʼakxilhkan pi xanatlatni xwankgolh tiku natatamakgaxtokga xkgawasa o xtsumat. Asta makgapitsi natlatni wa xlakkaxtlawakgo tiku natamakgaxtokgkgo xkamanankan. Maski max nichuna tlawaka Abigail, max xnatlatni wanikgolh pi xtatamakgaxtokgli Nabal, xlakata max lu xkgalhi tumin chu lu xlakgapaskan o xlakata xlakan ni xkgalhikgo tumin. Maski Nabal xkgalhi lhuwa tumin, nitlan chixku xwanit.

7. 1) ¿Tuku ni xlitlawatkan natlatni komo lakaskinkgo pi xkamanan xlakaskinka kaʼakxilhkgolh tamakgaxtokgat? 2) ¿Tuku tlawalh Abigail kxtamakgaxtokgat?

⁷ Natlatni tiku lakgskgalalan kamasiyanikgo xkamanankan lu xlakaskinka naʼakxilhkgo tamakgaxtokgat. Wa xlakata, ni kawanikgo pi katatamakgaxtokgkgolh tiku kgalhikgo tumin, ni kawanikgo pi kakgalhikgolh tiku natatawilakgo akxni nina liwana lakapastaknankgo (1 Cor. 7:36). Pero Abigail xtamakgaxtokgnita chu nialhla xlakgpali, wa xlakata liskujli xlakata lu tlan puskat xwa.

8. ¿Tiku makgasitsilh Nabal chu tuku xlakata lu nitlan tuku tlawalh?

⁸ Pero la uku lama tuku lu nitlan. Nabal makgasitsilh David. Jehová xlaksaknit uma xlakskujni tiku ni xmakgatsankganani xlakata xtawi xlakgxokgo mapakgsina Saúl chu xlimapakgsinit palakachuwina Samuel pi xʼalh akmawaka aceite (1 Sam. 16:1, 2, 11-13). Xlakata xtsalanimakgo mapakgsina Saúl tiku xmakgniputun xlakata xlakgkatsanani, David chu 600 ksoldados tatsekgkgolh kdesierto.

9, 10. 1) ¿Tuku xtitaxtumakgo David chu ksoldados? 2) ¿Tuku xlakata Nabal xlipaxtikatsinit xwanit tuku xtlawamakgo David chu ksoldados? (Na kaʼakxilhti nota xla párrafo 10.)

⁹ Maski Nabal xlama kMaón, lakatsu kkachikin wanikan  Carmelo anta xkgalhi lhuwa borregos chu max makgapitsi pukuxtu. * Lu tlan tiyat xwanit, tlan xputswayankgolh 3,000 xborregos, xlakata uma akgtiy kachikin xkgalhikgo lakwan sakgat. Pero kʼamakgapitsi tiyat nitu xʼanan: ksur xwi xdesierto Parán; chu anta kʼeste kxlakgaputu kasipijni, xwi mar Salado (la uku wanikan mar Muerto). Anta unu niku kapulhman xwanit chu niku xʼanankgo lhuku o tampixtu, niku David chu xsoldados tuwa xtekgskgo animales nema xwakgolh. Chu max xkatatanokglhkgo lakgkgawasan tiku xkuentajtlawanikgo xʼanimales Nabal tiku lhuwa tumin xkgalhi.

¹⁰ ¿La xkalikatsinikgo ksoldados David xkuentajtlawananin borregos? Ni xkamakglhtikgo xborregoskan, komo xlakaskinkgolh tlan chuna xtlawakgolh, wata umakgolh lakgtliwakgan soldados xkakuentajtlawakgo kskujnin chu nachuna xʼanimales Nabal (kalikgalhtawakga 1 Samuel 25:15, 16). Niku xkalinkgo borregos, kalipekua xwanit. Xʼanankgo animales nema wanankgo chu xlakata xlamakgo kxkilhpan Israel, xʼanankgo kgalhananin xalak atanu kachikinin. *

11, 12. 1) ¿La limasiyalh David pi xmaxki kakni Nabal akxni skinilh xtamakgtay? 2) ¿Tuku xlakata nitlan la kgalhtinalh Nabal?

¹¹ Lu tuwa xwanit xlakata David tlan xkaputsanilh tuku xwakgolh ksoldados kʼuma tiyat niku nitu xʼanan. Wa xlakata, akgtum kilhtamaku malakgachalh 10 soldados xlakata kskinilh xtamakgtay Nabal. David laksakli lu tlan kilhtamaku xlakata naskini xtamakgtay Nabal: akxni xkamaksitkan borregos xtlawakan laklanka paskua chu na xʼanan tapaxuwan chu xtawanankgo tuku xkgalhikgo. Na liwana laksakli tuku nawani Nabal. David kawanilh xlakskujnin pi xwanikgolh Nabal «minkgawasa David», nema limasiya pi xmaxki kakni chuna la achatum tlat, max chuna wanilh xlakata xlina kata. Pero ¿tuku wa Nabal? (1 Sam. 25:5-8.)

¹² ¡Nabal lu sitsilh! Xlakskujni Abigail wanilh pi Nabal «lixkajni kawanilh» xlakskujnin David. Nabal xwamputun pi David kaj chatum lakskujni xwanit tiku xtsalama, ni tawaputulh kaxtalanchu, chuchut chu liway. Asta likgalhkgamanalh chu nitu liʼakxilhli. Max Nabal lu xlakgmakgan chuna la Saúl. Pero umakgolh chatiy lakchixkuwin nipara tsinu xkatsikgo tuku xlakpuwan Jehová: xpaxki David chu xʼakxilha pi wa xmapakgsina Israel xʼama wan chu ni kaj chatum skujni tiku ni kgalhakgaxmatnan (1 Sam. 25:10, 11, 14).

13. 1) ¿Tuku tlawalh David xlakata tuku Nabal? 2) ¿La kiliʼakxilhatkan tuku xtlawaputun David xlakata tuku wan Santiago 1:20?

 ¹³ Akxni katsilh David lu sitsilh. Kawanilh ksoldados: «¡Katampatawakatit mi espadajkan!». Chu akxni na takaxkgolh David, kalilh 400 soldados xlakata nakamakgni putum lakchixkuwin xalak kxchik Nabal chuna la xwanit (1 Sam. 25:12, 13, 21, 22). Xlilat pi ksitsilh pero nitlan la xlimasiyama xtasitsi. La wan Biblia, «xtasitsin chixku ni watiya xtasitsin Dios» (Sant. 1:20, TNM). Pero ¿tuku tlan xtlawalh Abigail xlakata xkalakgmaxtulh xalak kxchik?

14. 1) ¿Tuku pulana tlawalh Abigail xlakata xlakkaxtlawalh taʼakglhuwit? 2) ¿Tuku kinkamasiyaniyan la xlikatsikgo Nabal chu Abigail? (Na kaʼakxilhti nota.)

¹⁴ Chuna la akxilhwi akxni matsukiw uma capítulo, Abigail wi tuku tlawalh xlakata tlan xlakkaxtlawalh tuku lu nitlan xtlawanit Nabal, kgaxmatputun nixtachuna la xchixku. Nabal lu xatsakat asta uma kgawasa ni makatsinilh tuku nitlan xʼama lakgmin, asta wan pi chatum tiku «nitu xlilaka» chu «tiku ni masta talakaskin natachuwinankan» (1 Sam. 25:17). * Xakstu xtlawanikan tuku nitlan xlakata lu lanka xmakgkatsikan, wa xlakata niti xkgaxmatni chu uma tayat akxilhaw la uku. Pero xlakata Abigail nichuna likatsi, wa xlakata wa lakgalh kskujni.

15, 16. 1) ¿La limasiya Abigail pi chuna xlikatsi la puskat nema lichuwinankan kProverbios? 2) ¿Tuku xlakata nila nawanaw pi Abigail ni xmaxkima kakni xchixku?

¹⁵ Xlakata akxilhli pi lu nitlan tuku xtlawanit Nabal «Abigail lakapala» wi tuku tlawalh. Liwana tasiya pi lakapala tuku xtlawa. Kʼumakgolh versículos makgtati lichuwinankan pi lakapala tuku tlawa. ¿Chu tuku tlawapa? Makaxli lhuwa kaxtalanchu, vino, xliway borrego chu xaskakni talhtsi, chu tortas nema litatlawanit pasas chu higos, xlakata xlinilh David chu ksoldados. Tasiya pi uma puskat liwana xkuentajtlawa xchik chu xkatsiya tukuya liwat xʼanan. Xlikana, Abigail likatsi la puskat tiku lichuwinanka alistalh kProverbios (Prov. 31:10-31). Alistalh kawanilh kskujnin pi pulana xlinkgolh lhuwa tamaskiwin chu alistalh xakstu kastalanilh. Pero chuna la wan Biblia: «Nitu makatsinilh xchixku» (1 Sam. 25:18, 19).

¹⁶ ¿Wamputun uma pi Abigail ni xmaxki kakni xchixku maski  wa xpulalin familia? Nichuna. Kalakapastakwi pi xʼamaka kamakgnikan lhuwa lakchixkuwin xlakata Nabal lixkajni tuku wanilh xlakskujni Dios tiku xlaksaknit mapakgsina nawan. Komo nitu xtlawalh, ¿na xlitawakalh xtalakgalhin Nabal? Abigail akxilha pi la uku tlakg nakgalhakgaxmata chu ni namakgatsankganani Dios nixawa xchixku.

17, 18. ¿La tachuwinalh Abigail David, chu tuku wanilh xlakata xlakgchalh xnaku?

¹⁷ Alistalh, Abigail tatanokgli David chu ksoldados. Akxni akxilha, taktalh kxburro chu lakgtatsokgostalh (1 Sam. 25:20, 23). Tataktujulh chu wanilh pi xtapatilh, chu wanilh lakwan tachuwin akxni tasaskinilh pi ni xmakgnilh xchixku chu putum tiku xwilakgo kxchik. Kaʼakxilhwi tuku wa xlakata David ni xkamakgnilh.

¹⁸ Pulana wanilh pi wa katawakanicha xtalakgalhin xchixku chu skinilh David pi xtapatilh. Alistalh wanilh pi xchixku lu xatonto chuna la wamputun xtukuwani. Chuna la wanilh, max xwaniputun pi ni xminini namakgni tiku ni xlakaskinka. Nachuna, limasiya pi xtalaksakni Dios xʼakxilha David xlakata wanilh pi wa tlawa «xguerras Jehová». Na katsi tuku xwaninit Dios pi mapakgsina nawan, xlakata wa: «Xlikana Jehová [...] nalakgayawayan xlakata napulalipina Israel». Asta wanilh pi ni xmakgninalh xlakata alistalh «xmakgchakgxnilh» o nitlan xmamakgkatsinilh xtalakapastakni (kalikgalhtawakga 1 Samuel 25:24-31). ¡Lu tlan chu lu xaskgalala tachuwin tuku wanilh!

19. ¿La kgalhtilh David Abigail, chu tuku xlakata malankilh?

¹⁹ ¿La kgalhtinalh David? Akxni makgamakglhtilh xtamaskiwin, wa: «¡Katasikulunatlawalh Jehová xDios Israel, tiku malakgachan la uku natana kimpaxtokga! Chu katasikulunatlawalh mi liskgalala, chu kasikulunatlawaka wix xlakata tlawa pi ni nakmakgninan». Malankilh Abigail xlakata ni pekualh chu tunkun alh putsa chu wanilh pi wa machokgolh xlakata ni xtlawalh lanka talakgalhin. Wanilh: «Tlan kapit kminchik». Tataktujulh chu wa: «Kuenta naktlawa tuku kiwani» (1 Sam. 25:32-35).

20, 21. 1) ¿Tuku xlakata lu tlan lichuwinan Abigail xlakata lakgtaspitpa xchixku? 2) ¿La limasiyalh Abigail pi liwana xlakapastaka tuku xtlawa chu ni xpekuan akxni tachuwinalh Nabal?

²⁰ Akxni xtaspitma kxchik, Abigail max xlakapastakma akxni tachuwinalh David. Akxilhli pi ni xmakgxtakga Dios chu lu tlan xlikatsi ni xtachuna tiku xtamakgaxtokga. Pero maski chuna, ni lakpuwa tuku nila xlakgpali. Biblia wan pi alistalh «Abigail tanulh niku  xwi Nabal». Liwana tasiya pi chuntiya xlakpuwanit tlan xtawilalh xtamakgaxtokgat maski lu tuwa. Na xlimakatsinit xwanit Nabal tuku xmaskiwinit David chu xsoldados xlakata ni xkamakgnika. Chu xlakgchan xkatsilh xchixku. Lu limaxana xwa komo atanu tiku xwanilh tuku tlawalh Abigail, wa xlakata lakpuwa pi nawani putum tuku tlawalh. Pero, akxni chalh nila xwani, xlakata Nabal xtlawama xalanka fiesta chu lu xkgachi (1 Sam. 25:36).

²¹ Amakgtum Abigail limasiyapa pi liwana lakapastaka tuku tlawa, xlakata lakpuwa nakgalhkgalhi asta lichali akxni nialh kgachi Nabal xlakata xwanilh tuku tlawalh. Pero na limasiyalh pi ni xpekuan, xlakata maski nialh kgachi nawan xchixku chu naʼakgatekgsa tuku nawani, max lu xʼama sitsi. Maski chuna, wanilh tuku xtlawanit. Abigail max kaks lilakawa xlakata Nabal ni sitsilh, wata nitu wa: ¡nialh tatsuwilh niku xwi! (1 Sam. 25:37.)

22. ¿Tuku akgspulalh Nabal, chu tuku kinkamasiyaniyan xlakata la akxilha Jehová tiku nitlan limaklakaskin limapakgsin o tiku nitlan likatsini xpuskat?

²² ¿Tuku akgspulalh Nabal? Chuna la wan Biblia «nialh tlan skujli xnaku chu la chiwix tamakgxtakgli». Max kgalhilh akgtum tajatat kxnaku. Xliʼakgkaw kilhtamaku nilh chu ni kaj tajatat makgnilh. Biblia wan pi «Jehová matatatlilh Nabal, wa xlakata nilh» (1 Sam. 25:38). Chuna sputli xatuwa xtamakgaxtokgat Abigail xlakata Dios malakgaxokgelh Nabal. La uku, Jehová nichuna makgtayanan. Pero, tuku likgalhtawakgaw kinkamalakapastakayan pi tiku nitlan maklakaskinkgo limapakgsin o tiku nitlan likatsinikgo xpuskatkan, nachan kilhtamaku akxni na nakamalakgaxokgekan (kalikgalhtawakga Lucas 8:17).

23. ¿Tuku atanu tasikulunalin makglhtinalh Abigail, chu la chuntiya tataktujulh?

²³ Xlikana, akgtum tasikulunalin xlakata nialh xtawi uma chixku, pero Jehová xʼamapa maxki atanu tasikulunalin. Akxni David katsilh pi Nabal xninit, malakgachalh xsoldados xlakata xwanikgolh Abigail pi xtatamakgaxtokgputun. ¿La kgalhtinalh? Abigail wa: «Unu wi milakskujni xlakata nakatuchakge xlakskujnin kimalana». ¡Lu tataktuju uma puskat! Maski xpuskat David nawan ni lanka makgkatsikan; asta wa pi nakatuchakge xsoldados David. Biblia wan pi xlakata xla lakapala tuku xtlawa, tunkun lakgalh David (1 Sam. 25:39-42).

24. ¿Tukuya taʼakglhuwit na titaxtulh Abigail akxni tatamakgaxtokgli David chu la xʼakxilha xchixku chu Jehová?

 ²⁴ ¿Xwamputun pi nialh xʼama kgalhi taʼakglhuwit Abigail? Ni, xlakata xpuskat David xʼama wan na tuwa xʼama kitaxtuni. Xlakata ama kilhtamaku Dios xkamaxki talakaskin lakchixkuwin chalhuwa xkgalhikgolh xlakpuskatinkan, chu David xkgalhiya xpuskat nema xwanikan, Ahinoam, wa xlakata max Abigail na kgalhilh taʼakglhuwit nema xkgalhikgo xlakskujnin Dios tiku xchixkukan chalhuwa lakpuskatin xkgalhikgo. David na xkgalhijku lhuwa taʼakglhuwit akxni nina mapakgsina xwan. Maski chuna, Dios sikulunatlawalh Abigail xlakata David paxkilh chu kuentajtlawalh, asta kgalhilh chatum xkgawasa xlakata ni makgxtakgli David. Asta akgtum kilhtamaku lakgmaxtulh xlakata xkgalhankgonit tiku lixkajni xlikatsikgo (1 Sam. 30:1-19). Liwana tasiya pi David lu lanka xtapalh akxilhli xliskgala Abigail, xlakata ni xpekuan chu ni xmakgxtakga Dios, chu wa uma lakwan tayat nema lu xlakaskinka kaʼakxilhni lakpuskatin tiku skujnikgo.