1, 2. 1) ¿Tuku wanilh tiku lakgapaxialhnalh María? 2) ¿La xʼama kitaxtuni María xlakata tuku wanilh uma tiku lakgapaxialhnalh?

MARÍA talakachaxa chu kaks lilakawan xlakata tiku lakgapaxialhnama. Chu na kaks lilakawan xlakata ni kgalhskininan komo wi xtlat o xtse... ¡Wa María lakgmima! Liwana katsi pi uma chixku ni xalak Nazaret. Kʼakgtum aktsu kachikin tunkun talakgapasa tiku ni anta xala chu tiku tachuwinama tunkun tasiya pi ni anta xala. Chu uma tiku lakgapaxialhnama, wanilh tuku ni xtalismani: «Kgalhen, lu tlan akxilhkana, Jehová tawilan» (kalikgalhtawakga Lucas 1:26-28, TNM).

² Biblia chuna lichuwinan María, xtsumat Helí, xalak Nazaret. Natatamakgaxtokga chatum xwakna tiku wanikan José, tiku ni lhuwa kgalhi tumin pero lu kanajlani Dios. María liwana xkatsi la xʼama wan xlatamat: ni lhuwa tuku xkgalhilh chu akxtum xtaskujli xchixku chu xkuentajtlawalh xfamilia. Pero la uku, uma tsumat wi tuku lu xlakaskinka nalaksaka natlawa. Kaj xalan uma tiku lakgapaxialhnama makatsini pi Dios wi tuku nalakgayawa, tuku lu xlakaskinka nema nalakgpali putum xlatamat.

3, 4. Xlakata nakatsiyaw tuku xaxlikana xlakata María, ¿tukuya talakapastakni kililakgmakganatkan chu tuku kiliʼakxilhatkan?

³ Lhuwa nila kanajlakgo pi Biblia ni lhuwa lichuwinan xlakata María. Kaj tsinu lichuwinan xfamilia, ni lichuwinan la xlikatsi chu nipara tsinu wan la xtasiya. Pero tuku lichuwinan Biblia xlakata María lu kinkamakgtayayan.

⁴ Xlakata nalakgapasaw María, pulana talakaskin nalakgmakganaw lhuwa tamasiy nema malakgatumikgonit lhuwa takanajla. Wa xlakata nialh kalakapastakwi pulaklhuwa la limasiyakgo chu imágenes nema tlawakanit xlakata María, max kdibujos, kmármol o kyeso. Na kalakgmakgaw laktuwa tamasiy nema maxkikgo uma ni tlankajwa puskat laklanka tukuwani la «xTse Dios» chu «Mapakgsina xalak Akgapun». Wata kaʼakxilhwi tuku wan Biblia xlakata María, anta tekgsaw lu tlan liʼakxilhtit xlakata xtakanajla chu la na tlan natlawayaw la tlawalh.

5. 1) ¿Tuku limasiya xlakata María chuna la kgalhtilh ángel Gabriel? 2) ¿Tuku lu xlakaskinka kinkamasiyaniyan xlakata la xlakpuwan María?

⁵ Tiku lakgapaxialhnalh María ni kaj chatum chixku, wa ángel Gabriel. Akxni wanilh «lu tlan akxilhkana» María «pikualh» chu lakpuwa tuku xlakata lu tlan tachuwinalh (Luc. 1:29). ¿Tiku lu tlan xʼakxilha? María tiku ni tlankajwa ni wa putsama pi tlan naʼakxilha chatum lataman, pero ángel wa xlichuwinama, xwaniputun pi wa Jehová tiku tlan akxilha. Xlikana, María lakaskin pi tlan kaʼakxilhli Dios. Pero ni lakpuwan pi nialh talakaskin wi tiku nawani. Komo naliskujaw xlakata tlan nakinkaʼakxilhan Dios chu ni nalakpuwanaw pi nialh talakaskin wi tiku nakinkawaniyan, wi tuku nakatsiyaw nema lu xlakaskinka, wantuku María liwana xkatsi. ¿Tuku uma? Dios ni akxilhputun tiku tlankajwa, pero paxki chu makgtaya tiku tataktuju (Sant. 4:6).

6. ¿Tuku lakgayawalh ángel María nema lu xlakaskinka?

⁶ Xtalakaskin pi María chuntiya xtataktujulh, xlakata ángel wi tuku xʼama lakgayawa nema lu xlakaskinka. Wanilh pi nakgalhi chatum skgata, chu xlakaskinka xʼama wan xliputum kilhtamaku. Gabriel wan: «Na namaxkiy nkinPuchinakan Dios xlimapakgsin David xtlat. Na xaliʼankgalhin xmapakgsinakan nawan [xchik] Jacob; na wa xlimapakgsin, niʼukxni katikgalhilh xlisputni» (Luc. 1:32, 33). Xlikana, María katsi pi liwakaya akgtum mil kata Dios xwaninit David pi anta kxfamilia xʼama min tiku putum kilhtamaku xʼama mapakgsinan (2 Sam. 7:12, 13). ¡Tiku xkgawasa nawan wa Mesías tiku xkachikin Dios lhuwata siglos kgalhkgalhimakgolh.

7. 1) ¿Tuku limasiya xlakata María takgalhskinin nema tlawanilh ángel? 2) ¿Tuku kamasiyani María lakgkgawasan chu laktsuman xalak uku?

⁷ Nachuna, ángel wa pi xʼamaka wanikan «xKam nti nTlanka xlakatsukut». ¿La tlan chatum puskat namalakachini xKgawasa Dios? ¿Pi kawa tlan nakgalhi chatum kgawasa? Skinit José pero nina a tamakgaxtokga, wa xlakata liwana kgalhskininan: «¿Lantla chu luwa nakitaxtuy yuma, sampi kit niti ktawi chixku?» (Luc. 1:34). Kaʼakxilhti pi María ni limaxanan xlakata nina talakgxtumi. Wata lu xlakaskinka akxilha xlakata akgstitum lin xlatamat. La uku, lhuwa lakgkgawasan chu laktsuman talakgxtumiputunkgo chu likgalhkgamanankgo tiku nina a talakgxtumi. Xlikana pi kakilhtamaku talakgpalinit pero Jehová nitu talakgpalima (Mal. 3:6). Chuna la kxkilhtamaku María, Dios lu xlakaskinka kaʼakxilha tiku kgalhakgaxmatkgo  xlimapakgsin xlakata la nalinkgo xlatamatkan (kalikgalhtawakga Hebreos 13:4).

8. Xlakata María kgalhi talakgalhin, ¿la tlan nakgalhi chatum skgata nema ni nakgalhi talakgalhin?

⁸ Maski María akgstitum skujnani Dios, na kgalhi talakgalhin. ¿La nakgalhi skgata nema ni nakgalhi talakgalhin, wa xKgawasa Dios? Gabriel wanilh: «Wa Spíritu Santo namin kmiʼokgspun, na wa xlitliwakga nti ntlanka xlakatsukut namaskgakgayan, na wa yama xasantujlani skgata ntu nalakachin, Xkam Dios nalitapakuwiy» (Luc. 1:35). «Santo» wamputun, ni xaxkajwani chu xaskulunku. Latamanin kamatitaxtinikgonit talakgalhin xkamanankan. Pero uma kilhtamaku Jehová natlawa akgtum milagro nema ni amakgtum chuna tlawa: nawili xlatamat xKgawasa kxpan María chu xʼespíritu santo “namaskgakga”, xlakata skgata ni nakgalhi talakgalhin. ¿Kanajlalh María tuku wanilh ángel? ¿La kgalhtinalh?

9. 1) ¿Tuku ni liwana akxilhkgo makgapitsi latamanin tuku talichuwinan xlakata María? 2) ¿La matliwakglhnilh xtakanajla María ángel Gabriel?

⁹ Wilakgolh tiku ni kanajlakgo pi chuna lalh. Asta makgapitsi kgalhtawakgananin xlakata takanajla tiku wankgo pi kstalaninanin Cristo nila kanajlakgo pi María kgalhilh kskgata. Maski lu lhuwa kgalhtawakgakgo, nila kanajlakgo tuku xaxlikana nema ni tuwa taʼakgatekgsa nema wa ángel Gabriel: «Sampi wa Dios, nitu ananiy mpala tu ntuwa» (Luc. 1:37). María kanajlalh tuku wanilh ángel xlakata lu lhuwa takanajla xkgalhi. Pero ni kaj akglakgwa xkanajla. Chuna la latamanin tiku tlan lakapastaknankgo, María xkatsi tuku xlakata kanajlalh. Gabriel wi tuku wanipa nema tlakg makanajlilh. Wanilh pi xparienta Elisabet, tiku nila xkgalhi kamanan chu tiku xlina kata, nakgalhi kskgata xlakata Dios tlawalh tuku nila tamakanajla.

10. ¿Tuku xlakata max tuwa makgkatsilh María tasikulunalin nema lakgayawaka?

¹⁰ ¿Tuku natlawa María? Xlimakgantaxtit tuku lakgayawaka chu la uku xkatsiya pi Dios natlawa putum tuku wanilh ángel. Xlikana pi lu lanka talakgalhaman akxilhli, pero, ¡tuwa xlakata xmakgantaxtilh uma! Pulaktum tuku xlilakapastakat wa pi xʼama tatamakgaxtokga José. ¿Natatamakgaxtokgputun akxni nakatsi pi nakgalhi skgata? Na max lu tuwa makgkatsi tuku lakgayawakanit. Xlakata xkatsi pi tiku xʼama lin kxpan wa tiku Dios lu xlakaskinka akxilha: xKgawasa tiku lu paxki. Alistalh xʼama kuentajtlawa akxni xlakachilh chu na xkuentajtlawalh kxalixkajni kakilhtamaku. ¡Lu lanka taskujut lakgayawaka!

11, 12. 1) ¿Tuku tlawakgolh makgapitsi xlakskujnin Dios akxni kalakgayawaka lu tuwa taskujut? 2) ¿Tuku kinkamasiyaniyan xlakata María chuna la kgalhtilh ángel Gabriel?

 ¹¹ Biblia lichuwinan pi milh kilhtamaku makgapitsi lakchixkuwin tiku tlan kskujnanimakgolh Dios pulana ni xmakgantaxtiputunkgo tuku tuwa kalakgayawalh. Moisés wa pi nila liwana xchuwinan chu wa xlakata nila xpalakachuwinalh Dios (Éx. 4:10). Jeremías wa pi «kgawasaku» xwanit, chu nila xʼama makgantaxti tuku xlakgayawanit Dios (Jer. 1:6). ¡Chu Jonás asta tsalalh xlakata ni xmakgantaxtiputun tuku xlakgayawakanit! (Jon. 1:3.) Pero ¿la kgalhtinalh María?

¹² Asta la uku, xtachuwin kamatliwakglha xkachikin Dios, xlakata stlan la kgalhtinalh, tataktujulh chu makgamakglhtinalh tuku lakgayawaka. María wanilh Gabriel: «Klitaxtu kumu la xtasakua Kinpuchinakan, pus chuna katlawalh Dios nak kilatamat lata wantu wix kiwaninita» (Luc. 1:38, Xasasti Talaccaxlan, [Coyutla]). Laktsuman tiku skujni xlitaxtukgo xataktuju xkaʼakxilhkan; putum tuku xwan xmalana wa xtlawakgo. Chuna xliʼakxilha María Jehová, tiku xMalana xwanit. María xkatsi pi Jehová ni xkamakgxtakga tiku ni xmakgxtakgkgo chu pi xʼama sikulunatlawa komo xmakgantaxtilh uma lu tuwa taskujut, wa xlakata xmakgkatsi pi Jehová xʼama makgtaya (Sal. 18:25).

13. ¿La nakinkamakgtayayan xliʼakxilhtit María akxni lakpuwanaw pi lu tuwa tuku kinkalakgayawayan Dios chu makgkatsiyaw pi nila katimakgantaxtiw?

¹³ Max min kilhtamaku Jehová kinkawaniyan pi katlawaw tuku lu tuwa akxilhaw o lakpuwanaw pi nila katimakgantaxtiw. Pero, kxTachuwin lhuwa tuku kinkamakgtayayan nakanajlaniyaw, chu kxmakan namakgxtakgaw kilatamatkan chuna la tlawalh María (Prov. 3:5, 6). ¿Nastalaniyaw xliʼakxilhtit? Komo chuna natlawayaw, Dios nakinkasikulunatlawayan chu tlakg tliwakga natawila kintakanajlakan.

14, 15. 1) ¿La sikulunatlawalh Jehová María akxni lakgapaxialhnalh Elisabet chu Zacarías? 2) ¿Tuku kinkamasiyaniyan xlakata María tuku tatsokgnit kLucas 1:46-55?

¹⁴ Lu makgtayalh María tuku wa Gabriel xlakata Elisabet. ¡Tekgsli tiku naʼakgatekgsni tuku titaxtuma! Tunkun lakgalh chu alh anta kxsipi Judá, max akgtutu o akgtati kilhtamaku lichalh. Akxni tanulh kxchik Elisabet chu Zacarías tiku sacerdote xwanit,  Jehová wi tuku tlawalh nema limatliwakglhnilh xtakanajla. Akxni María tachuwinalh Elisabet, makgkatsilh kxpulakni pi tatsuwilh kskgata xlakata paxuwalh chu litatsamalh espíritu santo, chu limapakuwilh María «xtsi nkimPuchina». Chuna: Dios makatsinilh Elisabet pi kgawasa nema xʼama kgalhi María xMalana xʼama wan, chu Mesías xʼama litaxtu. Nachuna, tlawalh pi lu tlan xlichuwinalh María xlakata ni xmakgxtakga Dios chu xkgalhakgaxmata, chu wanilh: «Akgtsiyaj lama wa nti nkanajlalh» (Luc. 1:39-45). Xlikana: putum tuku Jehová waninit María nakgantaxtu.

¹⁵ Chuna la kgalhtilh María Elisabet putum tatsokgtawilanit kBiblia (kalikgalhtawakga Lucas 1:46-55). Anta unu tlakg lhuwa  tuku lichuwinan xlakata María anta kBiblia chu lhuwa tuku kinkamasiyaniyan. Akgtum liʼakxilhtit, lu xpaxtikatsininan chu chuna limasiya tuku wa akxni malankilh Jehová xlakata maxkilh talakgalhaman pi xtse Mesías xwa. Tuku wa na limasiya pi lu tliwakga xkgalhi xtakanajla, wa pi Jehová kamamaxani tiku laktlankajwa chu tiku lhuwa kgalhikgo limapakgsin, pero kamakgtaya tiku nitu kgalhikgo chu tiku tataktujukgo chu skujnaniputunkgo. Na limasiya pi lhuwa tuku xkatsi xlakata xTachuwin Dios, xlakata max María liwaka akgpuxam textos lichuwinalh tuku wi kTatsokgni kxaHebreo. *

16, 17. 1) ¿Tuku lu tlan talakapastakni limasiyalh María chu Jesús? 2) ¿Tuku kinkamasiyaniyan María chu Elisabet xlakata tiku katalalinaw?

¹⁶ Liwana litasiya pi María xlismaninit xlilakapastaka xTachuwin Dios. Pero ni lichuwinalh tuku xla xlakapastaka wata tataktujulh chu mastalh talakaskin pi xTachuwin Dios napalakachuwinan. Kgawasa nema kstakma kxpan nachuna xʼama lakapastaka chu alistalh wa: «Wa kintamasiyun ni kila, wampi wa xla nti nkimalakgachalh» (Juan 7:16). Akxni kamasiyaniyaw amakgapitsin, ¿nachuna lu xlakaskinka akxilhaw chu maxkiyaw kakni xTachuwin Dios? ¿O kintapuwankan tuku masiyayaw? Xlikana, tlakg tlan natlawayaw chuna la tlawalh María.

¹⁷ María tatamakgaxtakga Elisabet max akgtutu papaʼ chu xlikana pi max lu xlamatliwakglhkgo (Luc. 1:56). Uma tuku lu stlan lichuwinan Biblia kinkamalakapastakayan la kinkamatliwakglhkgoyan akxni katalalinaw tiku tlan likatsikgo. Komo katalalinaw tiku xlikana paxkikgo Jehová, natatliwakglha kintakanajlakan chu tlakg natalakatsuwiniyaw Dios (Prov. 13:20). Pero chalh kilhtamaku akxni María taspitli kxchik. ¿Tuku xʼama wan José akxni xkatsilh pi María xʼama kgalhi kskgata?

18. ¿Tuku wanilh María José chu tuku tlawalh?

¹⁸ María ni kgalhkgalhi asta akxni natasiya pi nakgalhi kskgata xlakata nawani José. Akxni nina wani, max lakpuwan tuku nawan uma chixku tiku kakninani Dios. Maski chuna, ni pekualh akxni wanilh tuku lalh. José max lu lipuwa tuku wanika. Kanajlaniputun tuku wani xtaskin, pero José lakpuwan pi akgskgawilh. Biblia ni wan tuku lakpuwa José, pero kinkawaniyan pi xlakxtlawaputun xtamakgaxtokgat, xlakata ama kilhtamaku tiku xlaskin xkaʼakxilhkan lakomo xtamakgaxtokgkgonita. Pero,  ni xmamaxaniputun xlakatin amakgapitsin, wa xlakata tsekg xʼama lakxtlawa xtamakgaxtokgat (Mat. 1:18, 19). ¡Max lu tuwa makgkatsi María! Maski ni kanajlanilh, ni lisitsilh José. María lu lilipuwan akxni akxilha la patinama uma chixku tiku tlan likatsi.

19. ¿La makgtayalh Jehová José xlakata liwana xlaksakli tuku natlawa?

¹⁹ Ama kilhtamaku, Jehová makgtaya José xlakata liwana nalaksaka tuku natlawa. Kʼakgtum tamanixnat, chatum ángel wani pi María nakgalhi kskgata xlakata Dios chuna tlawalh. ¡Max skayaj limakgkatsilh José! Akxni tlakg tlan xmakgkatsi, kgalhakgaxmata Jehová chuna la María xtlawama. Tatamakgaxtokga chu litaya tuku ni anan xtachuna xlilakaskinka: nakuentajtlawa xKgawasa Dios (Mat. 1:20-24).

20, 21. ¿Tuku kamasiyani José chu María tiku tamakgaxtokgnit chu tiku tamakgaxtokgputunkgo?

²⁰ Tiku tamakgaxtokgkgonit chu tiku lakapastakmakgolh natamakgaxtokgkgo, tlan lhuwa nakatsinikgo xlakata uma tamakgaxtokgat nema latamakgolh akgtiya mil kata. Akxni José akxilhli la María lu xatapaxuwan xkuentajtlawa kskgata, lu lipaxuwalh xlakata tlawalh tuku wanilh xʼángel Jehová. Na akxilhli pi lu xlakaskinka nalipawanaw Jehová akxni wi tuku lu xlakaskinka nalaksakaw natlawayaw (Sal. 37:5; Prov. 18:13). Chu tuku tlawalh xlakata xpulalilh xfamilia chuntiyaku limasiyalh pi tlan xlikatsi chu xlakgalhamanan.

²¹ Nachuna, ¿tuku kinkamasiyaniyan xlakata María tatamakgaxtokgli José? Maski xlikana pi pulana ni xkanajlaniputun tuku wanilh, pero xla kgalhkgalhinalh chu chuntiya lipawa José tiku xʼama pulalin xfamilia. Katsilh pi lu xlakaskinka kgalhkgalhinankan chu uma lu kamakgtaya lakpuskatin tiku kstalaninanin Cristo xala uku. Chu xaʼawatiya, putum tuku titaxtukgolh kamasiyanilh pi lu xlakaskinka lakatanks nachuwinankgo chu nalawani tuku xaxlikana (kalikgalhtawakga Proverbios 15:22).

22. ¿Tuku xmatliwakglha xtamakgaxtokgat José chu María, chu tuku taskujut xkalakgayawakanit?

²² Xlikana, uma tamakgaxtokgat lu tlan la matsukikgolh xtamakgaxtokgatkan. Xchatiykan tlakg xpaxkikgo Jehová nixawa atanu chu xatlan natlatni xlitaxtuputunkgo chu lu xapaxkina xwamputunkgo. Lhuwa tasikulunalin xʼamakgolh makglhtinankgo, pero na lhuwa tuku tuwa xʼamakgolh titaxtukgo. Xlakgayakgolh akgtum taskujut, xmakgastakkgolh Jesús tiku xʼama litaxtu tiku tlakg lanka xliputum kakilhtamaku.