1, 2. ¿La xlakaskin Pedro pi xmakgamakglhtinankgolh xtaʼakgchuwin Jesús kCapernaum, pero tuku lalh?

PEDRO lu nitlan limakgkatsi akxni akxilha la lakawankgo tiku kgaxmatnimakgolh Jesús. Wi xsinagoga Capernum, xkachikin Pedro, niku wilakgolh xfamilia, xʼamigos chu tiku kataskuja. Na anta wi xnegocio xlakata skiti, knorte xla pupunu xalak Galilea. Max, Pedro lakaskin pi putum tiku anta wilakgolh na kapaxuwakgolh chuna la xla akxni kgaxmatni Jesús, tlakg xatlan makgalhtawakgana nema xlama, chu xkalitachuwinama xTamapakgsin Dios. Pero tasiya pi tanu la nakitaxtu.

² Asta lhuwa nialh kuenta tlawanimakgolh. Chu wilakgolh tiku lu nitlan lichuwinamakgolh tuku xlichuwinama Jesús. Pero tuku tlakg lilakgaputsa Pedro wa pi lhuwa kstalaninanin Cristo na ni lakgatikgo tuku kgaxmatmakgolh. Nialh tasiyakgo kxlakankan pi paxuwakgo maski kamasiyanimaka tuku xaxlikana. Liwana tasiya pi sitsimakgolh. Pero ni kaj watiya uma: chalhuwa wankgo pi xtaʼakgchuwin Jesús lu lixkajni, nialh kgaxmatkgolh chu ankgolh. Chu ama kilhtamaku nialh stalanikgolh Jesús (kalikgalhtawakga Juan 6:60, 66).

3. ¿La makgtayalh Pedro xlakata lu tliwakga xwi xtakanajla?

³ Nachuna apóstoles nila akgatekgskgo tuku wan xMakgalhtawakganakan. Chu asta Pedro ni liwana akgatekgsa, chu xlikana ni lu tlan xtakgaxmata tuku xlichuwinama. ¿Tuku natlawa? Ni xlimakgtumku taliʼakxilhma komo namakgxtakga Jesús, chu ni xaʼawatiya nawan. Naʼakxilhaw pi xlakata tliwakga xwi xtakanajla uma chixku makgtayalh xlakata xtayanilh tuku xʼama titaxtu chu ni xmakgxtakgli Jesús.

4, 5. ¿Tuku xlakata wanaw pi lhuwa latamanin kaks xlilakawankgo tuku xtlawa Jesús?

⁴ Xlikana, Jesús lhuwa tuku wa chu tlawalh nema Pedro ni liwana akgatekgsli. Pulaktum tuku ni akgatekgsli wa tuku xlanit likgotana.  Akxni tlawalh tuku nila tamakanajla xlakata kamawilh akglhuwa mil latamanin, makgapitsin mapakgsina xtlawaputunkgo, pero Jesús kaks kamalakawanilh: xlakata katsalanilh. Alistalh kamapakgsilh kstalaninanin pi xtanukgolh kbarco chu xʼankgolh kCapernaum. Watiya uma katsisni, akxni xwilakgolh kpupunu xalak Galilea chu palha xʼunama. Ama kilhtamaku Jesús masiyanilh tuku lu xlakaskinka xlakata xtakanajla.

⁵ Tsisa, kstalaninanin akxilhkgolh pi lhuwa latamanin xkastalanikgonit. ¿Tuku tlawalh Jesús? Jesús xkatsi pi ni kaj xkatsiputunkgo xlakata Dios, wata xlakaskinkgo nakamawikan, wa xlakata kakilhnilh (Juan 6:25-27). Ksinagoga nema xwi kCapernaum watiya tuku lichuwinalh chu kamasiyanilh tuku lu tuwa pero lu xlakaskinka, akgtum tamasiy tiku lhuwa kaks xʼamakgolh lilakawankgo.

6. ¿Tuku liʼakxilhtit lichuwinalh Jesús chu tuku tlawakgolh tiku xkgaxmatnimakgolh?

⁶ Jesús xlakaskin pi umakgolh latamanin xlakgpalikgolh la xʼakxilhkgo lhuwa tuku nakgalhikgo chu xʼakgatekgskgolh pi kxlakatinkan xwi tiku Dios xmalakgachanit, tiku xʼama makamasta xlatamat xlakata latamanin tlan xlatamakgolh xliputum kilhtamaku. Xlakata tlan xʼakgatekgskgolh, Jesús akstu tatalakxtumilh maná, kaxtalanchu nema xtakta kʼakgapun akxni xlama Moisés. Xlakata akxilhli pi makgapitsi nitlan xlichuwinamakgolh, lichuwinalh atanu liʼakxilhtit: lichuwinalh pi xlakata tlan xkgalhikgolh latamat xtalakaskin nawakgo xliway chu nawakgo xkgalhni. Ama kilhtamaku chuna la akxilhwi niku tsuku capítulo lhuwa lisitsikgolh chu wanikgolh: «Lu wa nitlan yuma ntachuwin; ¿ti ntlan nakgaxmata?». Asta lhuwa kstalaninanin Jesús nialh stalanikgolh (Juan 6:48-60, 66). *

7, 8. 1) ¿Tuku xtalakaskin xmakgantaxtilh Jesús nema Pedro nina xʼakgatekgsa? 2) ¿La kgalhtilh Pedro takgalhskinin nema tlawalh Jesús?

⁷ ¿Tuku tlawa Pedro? Max na ni liwana akgatekgsa, xlakata nina xʼakgatekgsa pi xtalakaskin pi Jesús xnilh xlakata xmakgantaxtilh xtalakaskin Dios. Maski chuna, ni kastalanilh amakgapitsi tiku kaj lakapala wi tuku xlisitsikgo. Xlikana, Pedro nichuna xwanit la amakgapitsin. ¿Tuku xlakata? Kaʼakxilhwi tuku tlakg kinkawaniyan Biblia.

⁸ Jesús kakgalhskin kstalaninanin: «¿Cha wixin? ¿Pa na pimputunatit?» (Juan 6:67). Maski xkakgalhskima xkgalhkutiykan, wa Pedro tiku kgalhtinalh. Chuna xtlawa xlakata max xapuxku xwanit, o max xlakata nila xmatsekga tuku xmakgkatsi. Tuku kgalhtinalh  Pedro wa tuku tlakg talakapastaka: «Tlati, ¿xati naklakganaw? Man wix nkgalhiya ntachuwin xla latamat wa ntu xaliʼankgalhin» (Juan 6:68).

9. ¿La limasiyalh Pedro pi ni xmakgxtakga Jesús?

⁹ ¡Lu tlan tachuwin nema Pedro wa! Liwana tasiya pi xlakata xkanajlani Jesús makgtayalh xkgalhilh akgtum lu tlan tayat: ni xmakgxtakgnan. Pedro liwana xkatsi pi Jesús wa Lakgmaxtuna nema Jehová xmastanit chu pi tlan xlatamalh komo xkgaxmatli tamasiy xlakata xTamapakgsin Dios. Chu maski xlikana pi ni putum xʼakgatekgsa tuku xwan Jesús, xkatsi pi kaj xpalakata xMakgalhtawakgana tlan xtalalilh Dios chu xmakglhtinalh latamat nema ni xkgalhi xlisputni.

10. ¿La tlan nachuna natlawayaw la tlawalh Pedro tiku ni makgxtakgli Jesús?

¹⁰ ¿Nachuna lakpuwana la Pedro? La uku lhuwa tiku wankgo pi paxkikgo Jesús, pero ni stalanikgo. Komo xlikana ni makgxtakgaw Cristo talakaskin naʼakxilhaw xtamasiy la xakxilha Pedro. Talakaskin naliskujaw xlakata nakatsiniyaw, naʼakgatekgsaw chu nalilatamayaw, asta makgapitsi tamasiy nema ni naʼakgatekgsaw o ni xtachuna tuku lakaskinaw. Talakaskin ni namakgxtakgaw Jesús xlakata tlan namakglhtinanaw latamat nema ni kgalhi xlisputni nema lichuwinalh (kalikgalhtawakga Salmo 97:10).

11. ¿Niku kataʼalh Jesús kstalaninanin? (Na kaʼakxilhti nota.)

¹¹ Ni lhuwa kilhtamaku titaxtulh, Jesús makgat kataʼalh xʼapóstoles chu amakgapitsi kstalaninanin knorte. Kpupunu xalak Galilea tlan xtaʼakxilha xakgspun sipi Hermón nema kgalhi hielo chu xwi knorte niku tapakgta tiyat nema xkawanikanit nakamaxkikan. Chuna la xtalakatsuwimakgolh kʼuma sipi tlakg lanka xʼakxilhkgo, akxni xtakxtunamakgolh ktiji nema xlinan lakatsu niku wilakgolh kachikin nema wanikan Cesarea xalak Filipo. * Chu unu niku lu kastlan, niku lakgatum xtasiya tiyat nema xkawanikanit pi nakamaxkikan, niku Jesús katlawanilh lu xlakaskinka takgalhskinin.

12, 13. 1) ¿Tuku xlakata Jesús xkatsiputun tuku xlakpuwankgo latamanin xlakata xla? 2) Chuna la Pedro kgalhtilh Jesús, ¿la limasiyalh xtakanajla?

¹² Jesús kakgalhskilh: «¿Tiku wankgo latamanin pi akit?». Ni tuwa katsiya la Pedro lakaʼakxilha lu xalakgalhamana xMakgalhtawakgana, xlakata katsi pi lu skgalala. Xkatsiputun la xʼakxilhkgo latamanin tiku xkatachuwinanit. Wa xlakata kstalaninanin wanikgolh tuku xwankgonit latamanin xlakata tiku xwanit. Pero Jesús  tlakg xkatsiputun: ¿xkanajlakgonit kstalaninanin tuku ni xaxlikana xwankgo amakgapitsin? Wa xlakata kakgalhskimpa: «Pero wixin, ¿tiku lakpuwananit pi akit?» (Luc. 9:18-20, TNM).

¹³ Amakgtum, Pedro tunkun kgalhtilh. Tuku likgalhtinalh wa tuku xmakgkatsikgo tiku anta xwilakgolh: «Wix nCristo xKam Dios xastakna». ¿Tlan nalakpuwanaw la Jesús wanilh Pedro pi lu tlan tuku likgalhtilh, lakaʼakxilha chu xatapaxuwan talitsin? Alistalh lichuwinalh pi wa Jehová, chu ni lakchixkuwin, tiku kamakatsini xlakskujnin tiku ni makgxtakgkgo uma tuku xlakaskinka nema xaxlikana. Xlikana, Jehová tlawalh pi xʼakgatekgsli Pedro uma lu xlakaskinka tamasiy nema nikxni xtamakatsininanit: xlakata tiku Cristo xwanit, Mesías tiku xwankanit pi namin (kalikgalhtawakga Mateo 16:16, 17).

14. ¿Tuku lu xlakaskinka taskujut lakgayawalh Jesús Pedro?

¹⁴ Biblia xlichuwinanit pi Cristo xʼama litaxtu «chiwix nema patsapsninanin lakgmakgankgolh» (Sal. 118:22, TNM; Luc. 20:17). Xlakata uma tuku xlichuwinankanit pi nala chu atanu, Jesús wa pi Jehová xʼama malakatsuki akgtum congregación xʼakgspun chiwix nema Pedro aku xlakgapasnit, wa Cristo. Alistalh, maxkilh akgtum lanka talakgalhaman kcongregación. Ni maxkilh tuku xtlawalh pi tlakg lanka xwa nixawa amakgapitsi apóstoles, chuna la wankgo makgapitsi, wata wi tuku lu xlakaskinka lakgayawalh. Biblia lichuwinan pi wanilh pi xʼama maxki «limalakkin ntu nalimalakkiya kxtapakgsin akgapun» (Mat. 16:18, 19). Tlan nawanaw pi lakgayawalh akgtum lanka talakgalhaman pi wa tlan xkamalakkinilh xmalakcha xTamapakgsin Dios: pulana judíos chu tiku xkanajlakgo la judíos, alistalh samaritanos chu xaʼawatiya tiku ni judíos xwankgonit.

15. ¿Tuku xlakata Pedro stakyawalh Jesús chu tuku wanilh?

¹⁵ Pero, alistalh Jesús kawanilh kstalaninanin pi tlakg xʼamaka kaskinikan tiku tlakg xkalakgayawaka taskujut, chu ni makgas titaxtulh kilhtamaku Pedro akxilhli pi xlikana tuku wa xMakgalhtawakgana (Luc. 12:48). Akxni Jesús xwaninita Pedro tuku xʼama lakgayawa, tsukupa lichuwinan tuku xaxlikana xlakata Mesías, makgapitsi tuku lichuwinalh wa pi nialh makgas nitlan tuku xʼamaka tlawanikan chu xʼamaka makgnikan kJerusalén. Pero Pedro lu ni lakgatilh tuku Jesús wa, wa xlakata lilh alakatanu chu stakyawalh: «Tlati, kayaj kakatsanika. Ni ukxni chuna nama naʼakgspulayan» (Mat. 16:21, 22).

16. ¿La stakyawalh Jesús Pedro, chu tuku tlan katsiniyaw xlakata la kgalhtinalh?

 ¹⁶ Pedro chuna wanilh Jesús kaj xlakata xpaxki. Wa xlakata max lu nitlan makgkatsilh akxni Jesús talakgaspitnilh chu kalakaʼakxilhli amakgapitsi kstalaninanin tiku max xlakpuwankgo chuna la Pedro chu wa: «Kakintatampuxtuni Satanás. Kaj liʼakgchakgxni wix, sampi ni akgatakgsa wa ntu xtalakaskin Dios, wampi xman wa wantu xla chixkuwin» (Mat. 16:23; Mar. 8:32, 33). Putum lhuwa tuku tlan nakatsiniyaw xlakata tuku Jesús kgalhtinalh. Kimputumkan kintalakapastaknikan kaj lakapala tlawa pi ni xlakaskinka naʼakxilhaw tuku xla Dios. Komo ni kuentajtlawayaw tuku wanaw, ni katikatsiw akxni wa Satanás natatayayaw, maski tlawaputunaw xtalakaskin Dios. Kalichuwinamparaw Pedro chu kaʼakxilhwi tuku tlawalh akxni stakyawaka.

17. ¿Tuku xwamputun Jesús akxni wanilh Pedro pi “xtapanunilh”?

¹⁷ Pedro xkatsi pi Jesús ni xwamputun pi wa «Satanás» xwanit. Xlakata akxni Jesús tachuwinalh Akgskgawini tanu la wanilh. Akgtum liʼakxilhtit, makgtum wanilh: «Kapit», pero Pedro wanilh: «Kakintatampuxtuni» (Mat. 4:10). Wa xlakata ni xlakgmakgama apóstol Pedro, xlakata xakxilha pi tlan xlikatsi chu lhuwa tuku tlan xtlawa, kaj xlakaskin pi xlakgpalilh la xlakapastaka. Tlan nawanaw pi Makgalhtawakgana kskinima pi ni xmakgchakgxnilh, wata xtapanunilh, kstalanilh chu xtatayalh.

18. ¿La limasiyalh Pedro pi ni xmakgxtakgnan chu la tlan nachuna natlawayaw?

¹⁸ Pedro ni lisitsilh o talakgalhtilh Jesús wata tataktujulh chu makgamakglhtinalh tastakyaw. ¡Lhuwa tuku kinkamasiyaniyan uma chixku tiku nikxni makgxtakgli Jesús! Putum akinin min kilhtamaku talakaskin nakinkastakyawakanan, pero komo lakaskinaw pi tastakyaw nakinkamakgtayayan xlakata tlan natalakatsuwiniyaw Jesucristo chu xTlat, Jehová, talakaskin namakgamakglhtinanaw chu namakgantaxtiyaw (kalikgalhtawakga Proverbios 4:13).

19. ¿Tuku lichuwinalh Jesús chu tuku max lakpuwa Pedro?

¹⁹ Titaxtulh kilhtamaku Jesús lichuwinampa tuku kaks lilakawankgolh: «Lu wa xlikana nkit kkawaniyan: Wilakgo yunu makgapitsin wa nti ni katinikgolh, asta ni liwaya ukxilhkgonit nawan Xkam nchixku akxni napumin xtapakgsin» (Mat. 16:28). ¿Tiku xʼamakgolh kgalhikgo uma lanka talakgalhaman? Max Pedro lu xkatsiputun. Pero xlakata aku stakyawaka, max lakpuwan: «¿Pi kawa na anta naktawila?».

20, 21. 1) Kalichuwinanti tuku maʼakxilhnika Pedro. 2) ¿La makgtayalh Pedro tuku kgaxmatli xlakata xlakgpalilh tuku xlakpuwan xlakata Cristo?

 ²⁰ Pero akxni xtitaxtunita akgtum semana, Jesús lilh Santiago, Juan chu Pedro «nkakgtum nkgastin», max sipi nema wanikan Hermón, nema ni lhuwa kilómetros xlimakgat xwi. Max katsisni xwanit xlakata xkgalhtutukan lu klhtataputunkgo. Akxni Jesús xtlawama oración wi tuku lalh nema nila tamakanajla, tuku tlawalh skgalalh xtawilakgolh chu nialh klhtatakgolh (Mat. 17:1; Luc. 9:28, 29, 32).

²¹ Kaj xalan, xlakan Jesús tsuku skgoy, asta la Chichini tasiyalh. Xlhakgat na lu snapapa xtasiya na lu xlakgskgo. Alistalh kxpaxtun Jesús tasiyakgolh chatiy latamanin, tiku xlitaxtukgo Moisés chu Elías. Xchatiykan xtachuwinamakgolh Jesús xlakata «xlinin nCristo, wa ntu xlikgantaxtut xwanit kJerusalén» chu xlakata xtalakastakwanat. Anta Pedro akgatekgsli pi nitlan tuku xwanit pi ni xtalakaskin pi Jesús xpatinalh chu xmakgnika (Luc. 9:30, 31).

22, 23. 1) ¿La limasiyalh Pedro pi tlan xlikatsi chu xapaxuwana xwanit? 2) ¿Tuku atanu talakgalhaman makglhtinankgolh Pedro, Santiago chu Juan uma katsisni?

 ²² Chuna la tasiya, max Pedro na xkatachuwinamputun tiku katasiyanilh. Max xlakaskin pi tlakg lhuwa kilhtamaku xkgalhchuwinankgolh. Xtasiya pi Moisés chu Elías xtamakgatlinimakgolh Jesús, wa xlakata Pedro wa: «Makgalhtawakgana, tlan mpi natamakgaxtakgaw yunu; na natlawayaw akgtutu [...] chiki, akgtum mila, chu akgtum xla Moisés, chu akgtum xla Elías». Moisés chu Elías ni xmaklakaskinkgo akgtum chiki, xlakata kaj akgtum xliʼakxilhtit xwanit, xlakata uma xlakskujnin Dios makgasata xnikgonit. Liwana tasiya pi Pedro ni liwana xkatsi tuku xkilhwama, pero ¿ni xlikana pi lu tlan xlikatsi uma chixku chu lu xapaxuwana xwanit? (Luc. 9:33.)

²³ Uma katsisni, Pedro, Santiago chu Juan na makglhtinankgolh atanu lanka talakgalhaman. Katalhman tasiyalh puklhni ksipi chu anta taxtulh tachuwin nema xwan: «Wa yuma nkinKam nti lu wa kpaxkiy, wa nkakgaxpatnitit». ¡Wa Jehová tiku xchuwinama! Chu chuna lisputli tuku kamaʼakxilhnika, chu kaj xkgalhtutukan xakstu tatamakgxtakgkgolh Jesús ksipi (Luc. 9:34-36).

24. 1) ¿La makgtayalh Pedro xlakata akxilhli pi Jesús tsukulh lakgskgo? 2) ¿La kinkamakgtayayan xlakata katsiyaw uma tuku maʼakxilhnika Pedro?

²⁴ Max Pedro akgtum lanka talakgalhaman akxilhli xlakata maxkika talakaskin naʼakxilha uma, chu nachuna kilimakgkatsitkan xlakata katsiyaw tuku lalh uma katsisni. Titaxtulh lhuwa kata, apóstol wa: «Kilakgastapukan kliukxilhnitaw xlitlanka» Jesús. Xlikana, kgalhilh lanka talakgalhaman pi xakxilhli la akgtum lanka Mapakgsina xalak akgapun xʼama wan Jesús. Uma tuku maʼakxilhnika litasiyalh pi xlikana tuku xtalichuwinanit kxtachuwin Dios chu matliwakglhli Pedro xlakata xtayanilh taʼakglhuwit nema xʼama titaxtu (kalikgalhtawakga 2 Pedro 1:16-19). Komo nalikatsiyaw la Pedro, Jehová na nakinkasikulunatlawayan. Pero, ¿la tlan nachuna natlawayaw la Pedro? Talakaskin ni namakgxtakgaw xaLanka Makgalhtawakgana nema Dios laksaknit, nakatsiniyaw xlakata xla, namakglhtinanaw tastakyaw chu nalilatamayaw chali chali tuku masiyalh.