Xaʼawatiya
«Chuna katlawatit la tiku kgalhikgo takanajla chu xlakata kgalhkgalhinankgo makglhtinankgo tuku wankanit namastakan.» (HEBREOS 6:12, TNM)
1, 2. ¿Tuku xlakata lu xlakaskinka lakapala namatliwakglhaw kintakanajlakan? Kalichuwinanti akgtum liʼakxilhtit.
TAKANAJLA. ¡Lu stlan uma tayat! Akxni lilakapastakaw uma, akxilhaw pi lu xlakaskinka. Pero na tlan xwa xlilakapastakwi atanu tachuwin: tuku lu lakapala xlitatlawat. ¿Tuku xlakata xlakaskinka na nalichuwinanaw uma tachuwin? Ni tuwa nakatsiyaw: komo nina kgalhiyaw takanajla, lu xlakaskinka naliskujaw xlakata lakapala nakgalhiyaw; chu komo kgalhiyawa, lu xlakaskinka nakuentajtlawayaw chu namatliwakglhaw. ¿Tuku xlakata talakaskin lakapala natlawayaw?
2 Kalilakpuwanti pi tlawampat kʼakgtum lanka desierto. Lu kgalhputipat, wa xlakata akxni tekgsa chuchut, kuentajtlawaya xlakata chichini ni namalakgskupu. Pero ni kaj wa tama, na talakaskin kuenta natlawaya xlakata ni nasputa asta akxni nachipina niku pimpat. La uku lamaw xtachuna la kʼakgtum desierto, xlakata ni lu anan xaxlikana takanajla chuna la chuchut chu lakapala «lakgskupa» komo ni kuenta natlawayaw. Chuna la nila latamayaw komo ni nawayaw chuchut, na nila natalalinaw Jehová komo ni kgalhiyaw takanajla (Rom. 1:17).
3. ¿Tuku kinkamaxkinitan Jehová xlakata tlakg nakgalhiyaw takanajla chu tuku pulaktiy kilitlawatkan?
3 Jehová katsi pi lu maklakaskinaw takanajla chu pi tuwa nakgalhiyaw chu ni namakgatsankgayaw. Wa xlakata, kxTachuwin kinkamakgxtakgnin liʼakxilhtit nema tlan nastalaniyaw. Dios kinkalistakyawayan apóstol Pablo: «Chuna katlawatit la tiku kgalhikgo takanajla chu xlakata kgalhkgalhinankgo makglhtinankgo tuku wankanit namastakan» (Heb. 6:12, TNM). Wa xlakata xkachikin Jehová kinkawaniyan pi na natlawayaw la lakchixkuwin chu lakpuskatin nema ni makgxtakgkgolh Dios xala makgasa nema lichuwinaw kʼuma libro. ¿Tuku talakaskin natlawayaw la uku? Pulana, chuntiyaku kamatliwakglhwi kintakanajlakan, xlipulaktiy, kalilakapastakwi tuku namakglhtinanaw.
4. ¿Tuku tlawanit Satanás xlakata nalakxtlawa takanajla pero tuku xlakata ni kinkamakgapekuanan?
4 Chuntiyaku kamatliwakglhwi kintakanajlakan. Wi tiku lakxtlawaputun uma tayat, wa xmapakgsina uma kakilhtamaku, Satanás. Tlawanit pi uma kakilhtamaku la akgtum desierto, niku sputma takanajla. Xlikana, Satanás tlakg tliwakga nixawa akinin, pero ni kakinkamakgapekuan. Tlan nakgalhiyaw chu ni namakgatsankgayaw kintakanajlakan. Kalakapastakwi pi Jehová kinkawaniyan pi tlan natalalinaw komo kgalhiputunaw xaxlikana takanajla. Chu kinkawaniyan pi xlakata kinkatawilan, tlan natayaniyaw akxni Akgskgawini wi tuku nakinkatlawaniputunan chu asta nakinkatsalaniyan (Sant. 4:7). Pero xlakata tlan natlajananaw, lu xlakaskinka chali chali tlakg nalipawanaw Dios. ¿La tlan chuna natlawayaw?
5. ¿Tuku tlawakgolh xlakata makgapitsi tiku talichuwinan kBiblia xkgalhikgolh takanajla?
5 Chuna la akxilhnitaw, xlakskujnin Dios nema lichuwinan Biblia akxni lakachinkgolh ni xkgalhikgo takanajla. Xlatamatkan limasiya pi uma lu tlan tayat wa espíritu santo masta (Gál. 5:22, 23). Akxni xlakan xtlawakgo oración xlakata xkamakgtayalh, Dios xkakgalhti chu xkamatliwakglhni xtakanajlakan. Nachuna katlawaw: putum kilhtamaku kalakapastakwi pi Jehová nakinkamaxkiyan xʼespíritu komo naskiniyaw chu nalilatamayaw chuna la skinaw kkiʼoracioneskan (Luc. 11:13). Pero ¿wi atanu tuku tlan natlawayaw?
6. ¿La tlan liwana nalitamakgtayayaw tuku talichuwinan kBiblia?
6 Kʼuma libro akxilhnitaw kaj makgapitsi lu tlan liʼakxilhtit xla takanajla. Pero lhuwaku anan (kalikgalhtawakga Hebreos 11:32). Tlan pi akxni kiʼakstukan kgalhtawakgayaw, liwana nalakputsananiyaw chu xlikana nakatsiniputunaw. ¡Lhuwa tuku tlan nakatsiyaw xlakata chatunu chatunu tiku talichuwinan! Komo kaj lakapala nalikgalhtawakgayaw, nila katitatliwakglhli kintakanajlakan. Xlakata lu nakinkamakgtayakgoyan, talakaskin liwana nalakputsananiyaw chu naputsayaw la xwilakgolh chu tuku xtitaxtumakgolh tiku talichuwinan kBiblia. Chu akxni nalilakapastakaw pi umakgolh lakchixkuwin chu lakpuskatin xmakgkatsikgo «xtachuna lantla nkin», tlakg nakanajlayaw pi latamakgolh (Sant. 5:17). Tlan nalakpuwanaw la makgkatsikgolh akxni titaxtukgolh taʼakglhuwit nema titaxtumaw la uku.
7-9. 1) ¿Tuku xtlawakgolh xlakskujnin Dios xalamakgasa komo tlan xkakninanikgolh chuna la tlawayaw uku? 2) ¿Tuku xlakata nalimatliwakglhaw kintakanajlakan xlakata tuku tlawayaw?
7 Na nalimatliwakglhaw kintakanajlakan akxni makgantaxtiyaw tuku Jehová kinkaskiniyan. Xlakata «takanajla lapi ni kgalhiy lakwan tatlaw, nitu xlakgasi» (Sant. 2:26). Kalilakpuwaw xlakskujnin Dios xalamakgasa la xatapaxuwan xtlawakgolh taskujut nema Jehová kinkalakgayawanitan la uku.
8 Akgtum liʼakxilhtit, kalilakpuwaw tuku xtlawalh Abrahán komo xwanika pi ni talakaskin nakakninani Jehová kxlakatin pumakamastan nema litatlawanit chiwix niku nitu anan, wata tlan xkakninanilh klakstlan Pukgalhtawakga chu klaklanka tamakxtumit niku wilakgolh lhuwa xnatalan. ¡Lu xatapaxuwan xkgaxmatli tuku xkgalhkgalhima chu “kaj xlimakgat ntiʼukxilhli”, nema la uku liwana taʼakgatekgsa! (Kalikgalhtawakga Hebreos 11:13.) O kalilakapastakwi Elías, komo xmaxkika taskujut niku ni xtalakaskilh xkamakgnilh xpalakachuwinanin Baal o ni kskujnilh Dios akxni xmapakgsinama chatum tiku xmakgxtakgnit xaxlikana takanajla, wata tlan xkalakgalh latamanin chu xkalinilh tamakatsin xlakata takgalhkgalhin. Xlikana: umakgolh xlakskujnin Dios tiku latamakgolh makgasa tunkun xmakgamakglhtinankgolh uma taskujut.
9 Wa xlakata chuntiya kalimatliwakglhwi kintakanajlakan tuku tlawayaw. Chuna nalilatamayaw tuku katsiniw xlakata xlakskujnin Dios nema talichuwinan kBiblia. Akxni chuna natlawayaw, la talichuwinan niku tsuku uma libro, namakgkatsiyaw pi la kiʼamigoskan nawankgo. Pero nialh makgas xlikana tlan nakatalalinaw.
10. ¿Tuku tapaxuwan nakgalhiyaw kParaíso?
10 Kalilakpuwaw kintakgalhkgalhinkan. Xlakskujnin Dios xala makgasa putum kilhtamaku litatliwakglhkgolh tuku xkawaninit pi nakamaxki. ¿Nachuna tlawayaw? Kaj kalakpuwanit la lu lipaxuw nawan nakaʼakxilhaw lakchixkuwin chu lakpuskatin akxni nalakastakwanankgo tiku tlan likatsikgo (kalikgalhtawakga Hechos 24:15). ¿Lakpuwanita tuku max nakakgalhskina?
11, 12. ¿Tuku max nakakgalhskimputuna xlakskujnin Dios kxasasti kakilhtamaku? 1) Abel. 2) Noé. 3) Abrahán. 4) Rut. 5) Abigail. 6) Ester.
11 Akgtum liʼakxilhtit, ¿tuku xkgalhskinti Abel? Max la xwankgonit xnatlatni o komo katachuwinalh querubines tiku xkuentajtlawakgo niku xlaktanukan kjardín xaʼEdén. ¿Chu tuku katsiputuna xlakata Noé? Max komo xkapekuani nefilim o tuku tlawalh xlakata akgtum kata xkuentajtlawalh lhuwa animales. ¿Chu xlakata Abrahán? Max komo tuwa makgkgatsilh akxni makgxtakgli kachikin Ur o komo wa Sem tiku masiyanilh xlakata Dios.
12 Max na wi tuku kakgalhskimputuna lakpuskatin tiku ni makgxtakgkgolh Dios. Akgtum liʼakxilhtit, max katsiputuna tuku tlawalh pi Rut naskujnani Jehová, komo Abigail pekualh akxni wanilh Nabal tuku xtlawanit xpalakata David o la tawi xlatamat Ester chu Mardoqueo akxni xtitaxtunita tuku kBiblia talichuwinan.
13. 1) ¿Tuku max nakinkakgalhkikgoyan tiku nalakastakwanankgo? 2) ¿La makgkatsiya pi nakalakgapasa lakchixkuwin chu lakpuskatin tiku ni makgxtakgkgolh Dios nema talichuwinan kBiblia?
13 Umakgolh lakchixkuwin chu lakpuskatin tiku nikxni makgxtakgkgolh Dios max na nakinkatlawanikgoyan lhuwa takgalhskinin. ¡Lhuwa tuku lu tlan nakawaniyaw! Tlan nakawaniyaw tuku lalh kxaʼawatiya kilhtamaku chu akxni Jehová makgtayalh xkachikin xlakata xtitaxtumakgolh tuku lu tuwa! Max lu nalipaxuwakgo akxni nakatsikgo la Dios makgantaxtilh putum tuku xwanit. ¡Na lu tlan nawan pi nialh natalakaskin kaj nalakpuwanaw la xwankgonit tiku talichuwinan kBiblia xlakata tlan nakalakgapasaw! Pero xlakata nina chan uma kilhtamaku, katlawaw la kaʼakxilhmaw kkintalakapastaknikan. Kakgalhiw kintakanajlakan la xlakan chu chuna akxtum nakataskujninaniyaw Jehová xliputum kilhtamaku, kiʼamigoskan tiku lu kapaxkiyaw.
