1, 2. ¿Niku taʼalh María xchixku chu tuku xlakata tuwa makgkatsilh?

MARÍA lu tlakgwanit o akgxuninit, lu liwana takaxtawila, ¡akglhuwata horas kgawi tantum burro! Xchixku José, pulatilha, chu makgat kachikin kalima wanikan Belén. Amakgtum makgkatsi pi kskgata tatsuwi kxpulakni.

² Atsinu tsankga nalakachin kskgata, xlakata Biblia wan pi «xkgalhkgalhitima» (Luc. 2:5). Max akxni xtitaxtukgo niku xwilakgolh tiku xmakgskujmakgolh xkakgalhskinkan tuku xlakata uma puskat wi niku ama maski snun wi. Pero ¿tuku xlakata María taxtulh kNazaret chu makgat alh?

3. ¿Tuku lakgayawaka María chu tuku kinkamasiyaniyan xliʼakxilhtit?

³ Akglhuwata papaʼ xtsukunit uma, akxni uma tsumat judía wi tuku liyawaka nema ni anan xtachuna: xtse Mesías xʼama litaxtu, xKgawasa Dios (Luc. 1:35). Maski xchamaja kilhtamaku nakgalhi kskgata, María wi niku xliʼanat xwanit. Chuna la naʼakxilhaw, lhuwa tuku titaxtulh nema taliʼakxilhli xtakanajla. ¿Tuku makgtayalh ni kxlajwanalh xtakanajla?

4, 5. 1) ¿Tuku xlakata José chu María xʼamakgolh kBelén? 2) ¿Tuku xwankanit pi xʼama la nema kgantaxtulh akxni césar mastalh akgtum limapakgsin?

⁴ Ni kaj José chu María xʼamakgolh kBelén. Xlakata mapakgsina César Augusto limapakgsinalh pi putum xʼankgolh kkachikin niku xlakachinkgonit xlakata xtatsokgtawilakgolh kcenso. ¿Tuku tlawalh José? «Takaxli kNazaret, yuma kachikin xtapakgsiy kʼGalilea, chu alh kʼakgtum aktsu kachikin xwanikan Belén xmunicipio Judea, antani na xlakachinit xamakgan rey David, sampi tama José xkilhtsukut xwanit xamakgan rey David.» (Luc. 2:1-4, Hua Xasasti Talaccaxlan, 1999.)

⁵ Ni kaj akglakgwa pi uma kilhtamaku mapakgsina césar mastalh uma limapakgsin. Xtitaxtunita akgtujun ciento kata akxni xwankanit pi Mesías xʼama lakachin kBelén. Xwi akgtum kachikin nema na Belén xwanikan 11 kilómetros xlimakgat xwi lata  kNazaret, pero xlichuwinankanit pi xʼama lakachin anta «[k]Belén Efrata» (kalikgalhtawakga Miqueas 5:2). Lata kNazaret asta kBelén, xtalakaskin xtlawanka 130 kilómetros chu titaxtukan xlakgstipanin kasipijni xalak Samaria. Anta xliʼanat xwanit José xlakata anta lakatsukulh xfamilia mapakgsina David, chu anta xtapakgsikgo José chu María.

6, 7. 1) ¿Tuku xlakata max María lu tuwa makgkatsilh akxni ankgolh kBelén? 2) ¿La talakgpalilh xlakata la xlaksaka tuku xtlawa María akxni xtatamakgaxtokgnita José? (Kaʼakxilhti nota.)

⁶ Chu María, ¿xama tamakgantaxti José uma limapakgsin? María lu tuwa xʼama makgkatsi akxni xʼalh. Max aku xtsukuma octubre, akxni ksputa akxni lu lipekua chichinan chu xtsukuma kilhtamaku akxni xpuxunan. Biblia na kinkawaniyan pi José «takaxli kNazaret, yuma kachikin xtapakgsiy kʼGalilea». Chu chuna kitaxtulh xlakata Belén lakgakgastin xwi liwaka 760 metros xlitalhman lata wi pupunu. Akxni lhuwata kilhtamaku xtlawankgonit, max akxni atsinu xkatsankgani xchankgolh, María tlakg tuwa makgkatsilh. Asta max tlakg tamakgapalikgolh, xlakata max María makglhuwa xjaxtilha. Chuna la xwi María, amakgapitsin lakpuskatin wata xtamakgxtakgkgolh kxchikkan, niku wilakgolh xfamiliajkan chu xʼamigoskan tiku tlan xkamakgtayakgolh akxni xlakachilh kskgata. Xlikana, xtalakaskin ni xpekualh xlakata tlan xʼalh.

⁷ Maski chuna xwi, Lucas liwana wan pi José alh tatsokgtawila  chu «taʼalh María». Na wan pi «xmakamaxkikanita [José] xlakata tatamakgaxtokgli» (Luc. 2:4, 5, TNM). Xlakata xtamakgaxtokgnita, talakgapalilh xlakata la xlaksaka tuku natlawa. María xmaxki kakni tuku Jehová xlakgayawanit chixku, pi wa xpulalilh familia chu puskat makgtayana xlitaxtulh, wa xlakata xkgalhakgaxmata tuku José xlaksaka natlawa. * Takanajla nema xkgalhini Dios, makgtayalh nakgalhakgaxmata xchixku.

8. 1) ¿Tuku max tlawalh xlakata María xʼalh kBelén? 2) ¿Tuku xlakata María kawilini lu tlan liʼakxilhtit putum xlakskujnin Dios?

⁸ ¿Tuku max na tlawalh pi María xkgalhakgaxmatninalh? ¿Xkatsi pi xwankanit pi Mesías xʼama lakachin kBelén? Biblia ni kinkawaniyan. Pero max xkatsi, xlakata uma tuku xwankanit pi nala lu xlakgapaskgo tiku xpulalinkgo takanajla chu amakgapitsi latamanin (Mat. 2:1-7; Juan 7:40-42). María na lu xlakgapasa xTachuwin Dios (Luc. 1:46-55). Ni katsiyaw tuku xlakata alh kBelén, max kaj kgalhakgaxmatli xchixku, makgantaxtilh limapakgsin, makgantaxtilh tuku Jehová xwanit pi nala o xlakata putum tuku lichuwinaw, pero katsiyaw pi María alh kBelén. Chu akxni chuna  tlawalh kinkawilinin lu tlan liʼakxilhtit. Jehová lu xlakaskinka kaʼakxilha lakchixkuwin chu lakpuskatin tiku kgalhakgaxmatkgo chu ni laktlankajwa. La uku tiku kgalhakgaxmatnankgo nitlan kaʼakxilhkan, María kawilini lu tlan liʼakxilhtit putum xlakskujnin Dios.

9, 10. 1) ¿Tuku max lakapastakkgolh José chu María akxni xchamakgolha kBelén? 2) ¿Niku tamakgxtakgkgolh José chu María chu tuku xlakata?

⁹ María max lu tlan limakgkatsilh akxni akxilha Belén. Akxni taʼakxtunamakgolh niku lhuwa xʼanankgo olivos, tawakat nema xaʼawatiya xmakgalakan, max José chu María lilakapastakkgo Belén. Lu aktsina xwanit uma kachikin, chuna la xlichuwinanit palakachuwina Miqueas, ni xtataputlakge kachikinin xalak Judá. Maski chuna, makgapitsin la Boaz, Noemí chu David anta xlakachinkgonit liwakaya akgtum mil kata.

¹⁰ Xlakata xtlawamaka censo, kkachikin lu xtsamakan. Lhuwa tiku pulana xchankgonit chu nialh anan niku natamakgxtakgkgo. * Wa xlakata tamakgxtakgkgo niku xkamakikan animales. Pero ni kaj watiya uma: kaj xalan María tsuku makgkatsi pi nalakachin kskgata. ¡Kaj kalakpuwaw la xmakgkatsi chu xlilakgaputsa José akxni akxilha pi xpuskat nalakachina kskgata! Chu chuna tsuku makgkatsi anta niku xkamakikan animales.

11. 1) ¿Tuku xlakata putum tiku xalak tse katsikgo tuku titaxtulh María? 2) ¿Tuku xlakata wankan pi Jesús «xakgasiyaj» xwanit?

¹¹ Lakpuskatin xlikalanka kakilhtamaku katsikgo tuku xtitaxtuma María. Xtitaxtunita akgtati mil kata, Jehová xwanit pi xlakata Adán chu Eva xlakgalhinankgonit, puskat lu lhuwa xʼama patinan akxni xkgalhilh kskgata (Gén. 3:16). Chu María max nachuna patinalh. Lucas ni lhuwa tuku wan, kaj wan «tilakachilh xakgasiyaj xkam» (Luc. 2:7). Maski alistalh María kgalhilh a kgalhchaxan kamanan, pero uma kgawasa, xapulana, ni xtachuna la amakgapitsin (Mar. 6:3). Ni kaj xapulana xkgawasa xwanit, wata na «xakgasiyaj [...] xlipaks tamalakatsukun»: ¡wa xachastum xKgawasa Dios! (Col. 1:15.)

12. ¿Niku mamilh María aktsu skgata, chu tuku xlakata ni xtachuna xwanit la limasiyakgo la uku?

¹² Biblia na lichuwinan atanu tuku na lu takatsi: «Na tilipumakgswitli lhakgat; na anta ntimanulh nkʼakgtum xpuway kawayuj» (Luc. 2:7). Lhuwa dibujos chu obras de teatro xlikalanka katiyatni lu stlan la masiyakgo uma. Pero nichuna tuku lalh. Kaʼakxilhwi  pi mujuka kʼakgtum kajun niku xkamujunikan tuku nawakgo animales. Na kalakapastakwi pi José chu María wilakgolh niku kamakikan animales, anta ni lu kaswan chu ni lu tanu un. ¿Tiku xanatlatni nalaksakkgo niku kamakikan animales nalakachin kskgata? Natlatni xlenkgalhin kamaxkiputunkgo tuku tlakg tlan xkamanan. ¡Tlakg chuna xlitlawatkan José chu María, xlakata kamakuentajlimaka xKgawasa Dios!

13. 1) ¿Tuku xlakata tlan wanaw pi José chu María lu tlan kuentajtlawakgolh skgata? 2) ¿La tlan nachuna natlawakgo natlatni xala uku la tlawakgolh José chu María akxni nakamakgastakkgo xkamanankan?

¹³ Pero, xlakan ni lilipuwankgo tuku titaxtumakgolh, wata akxilhkgo tuku tlan tlawakgo. María, liwana limakgswita lhakgat chu mamiy xlakata nalhtata niku kamujunikan xliwat animales, xlakata tlan natawila chu ni nalonkga. Xlakata ni tekgskgolh niku tlakg tlan xtamakgxtakgkgolh, kuentajtlawa chuna la matlani. Pero José chu María katsikgo tuku tlakg xlakaskinka xlitlawatkan, namasiyanikgo aktsu kgawasa kapaxkilh Jehová (kalikgalhtawakga Deuteronomio 6:6-8). Maski la uku ni xlakaskinka akxilhkan xlakata Dios, tiku xatlan natlatni liwana katsikgo tuku tlakg xlakaskinka chuna la José chu María.

14, 15. 1) ¿Tuku xlakata tiku xkuentajtlawakgo borregos lu xʼakxilhputunkgo skgata? 2) ¿Tuku tlawakgolh tiku xkuentajtlawakgo borregos akxni akxilhkgolh Jesús niku xkamakikan animales?

¹⁴ Maski kaks xwilakgolh kaj xalan tanukgolh tiku xkuentajtlawakgo borregos. Lu xakxilhputunkgo familia, pero tlakg xakxilhputunkgo aktsu skgata. Lakapala minkgocha kkasipijni niku xkuentajtlawamakgolh borregos. * Tasiya kxlakankan pi lu paxuwakgo chu xnakujkan tlakg tatsuwi xlakata paxuwakgo, wanikgo José chu María tuku akxilhkgolh. Ama katsisni, akxni xwilakgolh kkakiwin, katasiyanilh chatum ángel. Akxilhkgolh kxkgakganat xlilanka Jehová chu chatum ángel kamakatsinilh pi Cristo (o Mesías) aku xlakachinit kBelén chu xʼamakgolh tekgskgo niku kamujunikan xliwat animales chu xlitamakgswitnit lhakgat. Alistalh lalh atanu tuku nila tamakanajla: ¡lhuwa ángeles tamakxtumikgolh xlakata namalankikgo Jehová! (Luc. 2:8-14.)

¹⁵ ¡Wa xlakata tiku xkuentajtlawakgo borregos lakapala ankgolh kBelén! Tlan xlakpuwaw la lipaxuwakgolh umakgolh lakchixkuwin tiku ni laklankajwa xlikatsikgo akxni akxilhkgolh aktsu skgata chuna la xkawaninit ángel. Makatsininankgolh xalakwan  tamakatsin nema akxilhkgolh. «Tilixakgatlikgolh wa ntu xwanikgonit [...]. Cha nchu xlipakskan wa nti ntikgaxmatnikgolh, lanaj tililakawankgolh ntu xlichuwinankgoy.» (Luc. 2:17, 18.) Max tiku xpulalinkgo takanajla ama kilhtamaku nitu xkaliʼakxilhkgo tiku nitu xkgalhikgo la tiku xkuentajtlawakgo borregos. Pero, liwana tasiya pi Jehová lu xlakaskinka xkaʼakxilha tiku xkuentajtlawakgo borregos, tiku ni laktlankajwa chu ni xmakgxtakgkgo. Pero ¿la akxilhli María xlakata kalakgapaxialhnanka?

16. ¿La katsiyaw pi María xlilakapastaka tuku xkatsi chu la makgtayalh uma?

¹⁶ Max María lu tlakgwanit xlakata aku kgalhilh kskgata. Maski chuna kaks kgaxmata tuku wankan. Chu ni kajwatiya uma, Biblia wan pi «paks kuintaj xtlaway xmakiy, akstu xlilakapastaka kxnaku» (Luc. 2:19). María, chatum tsumat tiku lu xlilakapastaka tuku xkgaxmata, tunkun akgatekgsli tuku xwamputunkgo ángeles. Jehová, xDios xlakaskin xakgatekgsli chu lu xlakaskinka xʼakxilhli niku xala xwanit xkgawasa. Wa xlakata xla ni kaj kgaxmatli. Makitilhalh kxnaku umakgolh tachuwin xlakata chuntiya xlilakapastakli chuna la xtitaxtutilhalh akgatunu papaʼ chu kata. Xlikana, xlakata María xlilakapastaka uma, lu makgtayalh xlakata xtakanajla putum kilhtamaku tliwakga xtawilalh (kalikgalhtawakga Hebreos 11:1).

17. ¿La tlan natlawayaw chuna la María?

¹⁷ ¿Nachuna natlawaya la María? Xlimaktuminika kBiblia, Jehová matsokgninanit lhuwa xaxlikana tamasiy. Pero ni kintikamakgtayan komo ni kuenta natlawayaw. Wa xlakata talakaskin chali chali nalikgalhtawakgayaw, xlakata katsiyaw pi ni kaj atanu libro, wata xTachuwin Dios (2 Tim. 3:16). Alistalh namakiyaw kkinakujkan tuku katsinitilhayaw chu naʼakxilhaw la nakinkamakgtayayan, chuna la tlawalh María. Komo lilakapastakaw tuku likgalhtawakgayaw chu lilatamayaw, kintakanajlakan tlakg natatliwakglha.

18. 1) ¿La makgantaxtikgolh tuku xwan Limapakgsin nema maxkika Moisés José chu María akxni xlakachinita Jesús? 2) ¿Tuku litasiya xlakata tuku makamastakgolh José chu María?

¹⁸ Akxni xtitaxtunita akgtsayan kilhtamaku lata xlakachinit aktsu kgawasa, José chu María circuncidartlawakgolh la xwan  Limapakgsin nema maxkika Moisés, chu chuna la xkawanikanit limapakuwikgolh Jesús (Luc. 1:31). Chu akxni makgatsi tipuxum kilhtamaku linkgo xtemplo Jerusalén, nema 10 kilómetros xlimakgat wi. Anta makamastakgo tamakamastan xlakata nakaxapanikan xtalakgalhin nema Limapakgsin xwan pi xmastakgolh tiku nitu xkgalhikgo: tantiy tórtolas o tantiy pichones. Max nitlan limakgkatsikgo xlakata nila makamastakgo tantum carnero chu tantum pichón o tantum tórtola, chuna la amakgapitsin natlatni, pero ni mastakgo talakaskin pi uma nakamakgalipuwan. Akxni xwilakgolh ktemplo lu kamatliwakglhka (Lev. 12:6-8; Luc. 2:21-24). Kaʼakxilhwi tuku lalh.

19. 1) ¿Tuku wanilh Simeón María nema nikxni xʼama patsankga? 2) ¿Tuku tlawalh Ana akxni akxilhli Jesús?

¹⁹ Chatum kgolotsin xwanikan Simeón katalakatsuwini, chu wi tuku wan nema María nikxni patsankga. Simeón wan pi Jehová waninit pi ni katinilh asta akxni naʼakxilha Mesías, chu espíritu santo makatsininit pi wa Jesús Lakgmaxtuna tiku xwankanit kxTachuwin Dios pi namin. Pero Simeón na wani María pi nachan kilhtamaku akxni lu napatinan, la kgantum lanka espada nalaktanu (Luc. 2:25-35). Akxni lakgchalh uma kilhtamaku, akxni xtitaxtunita puxumakaw kata, max uma tuku wanilh Simeón makgtayalh María xlakata xtayanilh. Chu alistalh akxni xwilakgolhku ktemplo chatum puskat tiku xpalakachuwina Dios xwanikan Ana akxilhli aktsu Jesús chu tsukulh kalitachuwinan putum tiku xkgalhkgalhimakgolh  nalakgmaxtukan Jerusalén (kalikgalhtawakga Lucas 2:36-38).

20. ¿Tuku tasikulunalin makgamakglhtinankgolh José chu María xlakata linkgolh Jesús kxtemplo Jerusalén?

²⁰ ¡Lhuwa tasikulunalin makglhtinankgolh José chu María xlakata linkgolh aktsu skgata kxtemplo Jehová kJerusalén! Uma xlimakgtumku akxni Jesús linka ktemplo pero xla makglhuwa xʼama an xliputum xlatamat. Ama kilhtamaku José chu María makamaxkikgolh Jehová tuku xmakaʼakchankgo, chu wa xlakata Jehová kalisikulunatlawalh lhuwa tamasiy chu kamatliwakglhli. Max akxni María taxtulh ktemplo lu xtatliwakglhnit xtakanajla chu lhuwa tuku xkatsininit nema tlan xlilakapastakli, lhuwa tuku tlan xkawanilh amakgapitsin.

21. ¿La natlawayaw xlakata natatliwakglha kintakanajlakan?

²¹ Lu lipaxuwayaw akxni akxilhaw pi la uku lhuwa natlatni nachuna tlawakgo. Xtatayananin Jehová na linkgo xkamanankan ktamakxtumit xla kstalaninanin Cristo. Chuna la José chu María, umakgolh natlatni maxkikgo Dios putum tuku makaʼakchankgo. Akgtum liʼakxilhtit, ktamakxtumit kamatliwakglhkgo xnatalankan. Pero xlakan na kamatliwakglhkan, paxuwakgo chu lhuwa tuku katsinikgo nema tlan kalitachuwinankgo amakgapitsin. ¡Lu lipaxuwayaw akxni akxilhaw umakgolh familias tiku ni makgxtakgkgo Dios! Akxni katatamakxtumiyaw chu malankiyaw Jehová tlakg tatliwakglha kintakanajlakan chuna la María.