1. ¿Tuku xlakata anan talipuwan kSiló?

SAMUEL lu lilipuwan la wi kachikin. Kaj kʼakgtum guerra nema tatlawakgolh filisteos nikgolh 30,000 israelitas. Pero ni taputlakgamaw 4,000 nema nikgolh kʼguerra nema xtitaxtunita. Latamanin xala kSiló tasamakgo. Lhuwa kamanan chu lakpuskatin lakgtasamakgo tiku xkapaxkikgo: xtlatkan, xlakchixkuwinkan, xnatalankan chu xkamanankan, nialh makgstum nakaʼakxilhparakgo (1 Sam. 4:1, 2, 10).

2, 3. ¿Tuku lu nitlan lalh nema tlawalh pi Siló xmakgatsankgalh xlilanka?

² Uma tuku nitlan lalh na makgtanu pulaklhuwa tuku nitlan xlatilhanit. Litsukulh akxni Hofní chu Finehás, xkamanan xapuxku sacerdote Elí tiku nitlan xlikatsikgo, linkgolh arca xla talakkaxlan nema xwi kSiló asta niku xtatlawama guerra. Israelitas xlakpuwankgo pi komo xlinkgolh Arca xwamputun pi Dios xkatawi chu chuna tlan xtlajanankgolh. Pero ama caja xla talakkaxlan anta xmakikan niku tlakg xasanto ktabernáculo ni kaj akgtum litamakgtay xwanit. ¿Tuku lalh? Filisteos katlajakgolh israelitas, linkgolh Arca chu kamakgnika xkamanan Elí (1 Sam. 4:3-11).

³ Akglhuwata siglo arca xla talakkaxlan xmalankinit Siló xlakata anta xwi. Wa xlakata, akxni katsilh Elí pi filisteos xlinkgonit arca, tiku xkgalhiya 98 kata, taʼakgpuspittawi chu nilh. Chu xpuwiti o xtaskin, kilhtamaku akxni nilh xchixku na nilh akxni xlakachima kskgata. Uma tuku awatiya wa: «Makglhtika xlilanka Israel». Chuna, Siló nialh xkgalhi xlilanka xlakata xmakglhtikanit caja xla talakkaxlan (1 Sam. 4:12-22).

4. ¿Tuku naʼakxilhaw kʼuma capítulo?

⁴ Putum tuku lalh max lu nitlan mamakgkatsinilh Samuel. ¿Tliwakga xtakanajla xlakata natayani chu nakamakgtaya kachikin xlakata Jehová tlan nakaʼakxilhpara chu nakamakgtayapara? Xlakata na kinkalakgminan talipuwan chu titaxtuyaw tuku nitlan kkilatamatkan niku taliʼakxilha kintakanajlakan, kaʼakxilhwi tuku tlakg nakatsiniyaw xlakata Samuel.

5, 6. ¿Tuku wan Biblia xlakata akgpuxam kata nema ni lichuwinankan Samuel, chu tuku tlawalh umakgolh kata?

⁵ Akxni lichuwinamparakan xlatamat Samuel, wa tlakg lichuwinankan akxni kamalakgaxokgeka filisteos xlakata linkgolh Arca xla talakkaxlan chu akxni kamakglhtiparaka. Akxni titaxtunita akgpuxam kata lichuwinamparakan Samuel (1 Sam. 7:2). ¿Tuku tlawalh uma akgpuxam kata? Katsiyaw tuku tlawalh.

⁶ Biblia wan pi akxni nina xla guerra, «xtachuwin Samuel chuntiya xkalakgchama putum Israel», uma limasiya pi palakachuwina chuntiya xkamasiyanima kachikin (1 Sam. 4:1). Chu Biblia na lichuwinan pi akxni xtitaxtunita akgpuxam kata watiya xtlawama, xlakata wan pi kata kata xkalakgapaxialhnan akgtutu kachikin xlakata xkatalakkaxtlawalh xtaʼakglhuwitkan chu xkawanilh tuku xtlawakgolh. Alistalh xtaspitpara kRamá, niku xya xchik (1 Sam. 7:15-17). Liwana katsiyaw pi uma akgpuxam kata, lu lhuwa kskujma.

7, 8. 1) ¿Tuku kawanilh Samuel israelitas akxni xkapulalinita akgpuxam kata? 2) ¿La makgamakglhtinankgolh israelitas tuku kawanilh Samuel?

⁷ Nitlan liʼakxilhtit nema mastakgolh chatiy xkamanan Elí, lakchixkuwin tiku nitlan xlikatsikgo chu xtlawakgo talakgxtumit xalimaxana, maxlajwanikgolh xtakanajlakan israelitas. Wa xlakata lhuwa tsukukgolh kakninanikgo ídolos. Akxni akgpuxamata kata liwana xkapulalinit israelitas, Samuel kawanilh: «Komo xliputum minakujkan lakgtaspitpatit Jehová, kamapanutit kmilakgstipankan dioses xla atanu kachikinin chu imágenes xla Astoret, chu kamaxkitit minakujkan Jehová chu wa kaskujnitit chu xla nakalakgmaxtuyan kxmakankan filisteos» (1 Sam. 7:3).

⁸ «Xmakankan filisteos» xkamakgapatinamakgo kachikin. Xlakata atsinu ni xkamasputukan ksoldados israelitas, tiku ni xkaʼakxilhputunkgo lakpuwankgolh pi tlan xkatlawanikgolh tuku nitlan chu niti xʼama kamalakgaxokge. Pero Samuel kawanilh israelitas pi tlan nalakgtaspitkgo Jehová chu tlan nakamakgtayaparakan. ¿Kgalhakgaxmatkgolh Samuel? Chuna tlawakgolh, xlakata makgankgolh xʼídoloskan chu «kaj wa Jehová tsukukgolh skujnanikgo». Xlakata palakachuwina lu paxuwalh, kamamakxtumilh kMizpá, akgtum kachikin nema xwi kkasipijni kxnorte Jerusalén. Anta ni wayankgolh chu limasiyanikgolh Jehová pi lu nitlan xlimakgkatsikgo xlakata kakninanikgolh ídolos (kalikgalhtawakga 1 Samuel 7:4-6).

9. ¿Tuku lakpuwankgolh natlawakgo filisteos chu tuku tlawakgolh israelitas akxni lakatsu xwilakgolha xtalamakgasitsinkan?

 ⁹ Pero filisteos katsikgolh pi xtamakxtumikgonit israelitas chu lakpuwankgolh pi tlan nakamasputukgo. Akxni katsikgolh israelitas pi xtalakatsuwimakgolh xtalamakgasitsinkan, lu pekuankgolh chu wanikgolh Samuel pi xtasaskinilh Jehová kakamakgtayalh. Samuel kawanilh pi tlan chu akxni tlawalh oración na mastalh tamakamastan. Nina xmastakgo tamakamastan akxni filisteos chinkgolh kkachikin. Pero Jehová kgaxmatli xʼoración Samuel chu xlakata limasiyalh pi lu ksitsinit, tlawalh pi xjilinalh kʼakgapun chu lu «palha xtakgaxmatli jilini xlakata [...] xpekuankgolh filisteos» (1 Sam. 7:7-10).

10, 11. 1) ¿Tuku xlakata jilina nema mamakasanilh Jehová ni xtachuna la amakgapitsi? 2) ¿La kitaxtulh akxni filisteos xʼakgchipaputunkgo Mizpá?

¹⁰ Nialh katsikgolh tuku natlawakgo filisteos chu tsalakgolh xlakata ni xnikgolh. ¿Tuku xlakata lu pekuankgolh? Xlakan makgasa soldados xwankgonit chu xmakgtlawakgonit laklanka guerras; ni laktsujku xwankgonit nema kaj tsinu jilinan chu litatsekgkgo xtsekan. Max kamakgapekualh xlakata lu palha makasanalh o lu «palha xtakgaxmatli» asta kkasipijni chalh. O max xlakata jilinalh akxni tlan xwi kilhtamaku. Pero tuku liwana katsiyaw xlakata lu lipekua jilinalh, tiku xʼamakgolh masputunankgo wata wa tsukukgolh pekuankgo. Israelitas taxtukgocha kMizpá chu kaputsastalanikgolh filisteos akglhuwa kilómetros asta chankgolh ksuroeste Jerusalén (1 Sam. 7:11).

¹¹ Nikxni tapatsankgalh akxni israelitas katlajakgolh xtalatlawananin. Kilhtamaku akxni Samuel xkapulalima israelitas, chuntiya lakgmaxtutilhakgolh kachikinin nema xkamakglhtikgonit filisteos (1 Sam. 7:13, 14).

12. ¿Tuku xlakata na lichuwinankan Samuel akxni kalichuwinankan tiku «tilitlawakgolh [tuku xaʼakgstitum]», chu tuku makgtayalh xlakata chuna xtlawalh?

¹² Akxni xtitaxtunita akglhuwata siglos, apóstol Pablo na lichuwinalh Samuel akxni kalichuwinalh jueces chu palakachuwinanin tiku «tilitlawakgolh [tuku xaʼakgstitum]» (Heb. 11:32, 33). Samuel ni kaj xlilakgapaskan xlakata xtlawa tuku xaʼakgstitum, na lilakgapaska xlakata kamakgtayalh amakgapitsin nachuna xtlawakgolh. Chu ¿makgtayalh xlakata xmakgantaxtilh xtaskujut? Pulana, ni mastalh talakaskin pi taʼakglhuwit xmaxlajwanilh, chuntiya tlawalh tuku tlan chu kgalhkgalhilh xlakata Jehová xlakkaxtlawalh tuku nitlan xlama. Nachuna, lu xpaxtikatsini Jehová. Akxni katlajakgolh xtalamakgasitsinkan kMizpá, wililh akgtum chiwix xlakata xlilakapastakkgolh pi Jehová xlakgmaxtunit xkachikin (1 Sam. 7:12).

13. 1) ¿Tukuya lakwan tayat kilikgalhitkan komo wamputunaw la Samuel? 2) ¿Tukuya kilhtamaku tlan natsukuyaw kgalhiyaw tayat nema kgalhilh Samuel?

 ¹³ Komo tlawaputunaw tuku xaʼakgstitum kxlakatin Jehová, ni nalixlajwananaw taʼakglhuwit, natataktujuyaw chu napaxtikatsiniyaw Jehová la tlawalh Samuel (kalikgalhtawakga 1 Pedro 5:6). Kimputumkan kgalhiputunaw umakgolh lakwan tayat. Samuel lu makgtayalh xlakata tsukulh kgalhi uma lakwan tayat akxni kgawasaku xwanit, xlakata akxni xlina kata kgalhilh lhuwa taʼakglhuwit chu laklanka talipuwan chuna la naʼakxilhaw.

14, 15. 1) ¿Tukuya taʼakglhuwit titaxtulh Samuel akxni kgolota xwanit? 2) ¿Tuku xlakata tlan nawanaw pi Samuel tlan tlat xwanit nixtachuna la Elí?

¹⁴ Akxni lichuwinamparakan Samuel kBiblia kgolota. Wa xlakata, jueces katlawalh xkamanan, Joel chu Abías, xlakata namakgtayakgo nakatalakkaxtlawa xtaʼakglhuwitkan israelitas. Pero umakgolh lakchixkuwin ni tlawakgolh tuku kawanilh xtlatkan. Ni stalanikgolh xliʼakxilhtit Samuel wata nitlan xlimaklakaskinkgo limapakgsin nema xkamaxkikanit, xtlawakgo tuku ni xaʼakgstitum chu xmakglhtinankgo tuku xkamaxkikan xlakata ni xalakatitum xlakkaxtlawanankgolh (1 Sam. 8:1-3).

 ¹⁵ Akgtum kilhtamaku, lakgkgolotsin xalak Israel wanikgolh Samuel: «Asta minkamanan ni chuna limakgolh xlatamatkan la wix» (1 Sam. 8:4, 5). ¿Xkatsi Samuel tuku xtlawamakgo xkamanan? Biblia ni wan. Pero liwana xkatsi pi Elí malakgaxokgeka xlakata ni kastakyawalh xkamanan chu xlakata tlakg xlakaskinka kaʼakxilhli nixawa Dios, chu max wa xlakata Samuel lu liskujli xlakata lu tlan tlat xwa (1 Sam. 2:27-29). Chu Jehová xʼakxilha pi Samuel putum kilhtamaku xtlawa tuku tlan.

16. ¿La makgkatsikgo tiku ni kgalhakgaxmatnankgo xkamanankan, chu la tlan nakamamakgkatsini chu nakamakgtaya xliʼakxilhtit Samuel?

¹⁶ Biblia na ni wan tuku makgkatsilh Samuel akxni katsilh pi xkamanan lixkajni xlikatsikgo. Pero lhuwa natlatni katsikgo pi lu nitlan tamakgkatsi chu lu limaxana akxni kamanan ni kgaxmatkgo. La uku, lhuwa kamanan ni kgalhakgaxmatkgo xnatlatnikan. Lhuwa tiku ni kgalhakgaxmatnankgo chu tiku ni mastakgo kakni (kalikgalhtawakga 2 Timoteo 3:1-5). ¿Patinampat xlakata chatum minkgawasa ni kuenta tlawa tuku waniya chu ni masta talakaskin nastakyawaya? Komo chuna, tlan nalimakgkatsiya chu nakatsiya tuku natlawaya akxni nalikgalhtawakgaya tuku tlawalh Samuel. Maski xkamanan lixkajni xlikatsikgo, Samuel putum kilhtamaku skujnanilh Dios. Kalakapastakti: tachuwin makgtayanan pero nawiliya liʼakxilhtit tlakg makgtayanan. Komo akgstitum nalipina mi latamat ni kalakpuwanti pi minkgawasa ni katimakgtayalh. Nachuna, minTlat xalak akgapun, Jehová, lu napaxuwa komo ni namakgxtakga chuna la Samuel.

17. ¿Tuku skinikgolh Samuel lakgkgolotsin xalak Israel chu la akxilhli?

¹⁷ Xkamanan Samuel nipara tsinu xlakpuwankgo pi xlakata xʼakstukan xkapaxkikan chu lhuwa tuku xkgalhiputunkgo nachuna xtlawaputunkgolh amakgapitsi. Akxni lakgkgolotsin wanikgolh Samuel tuku xtlawamakgo xkamanan, skinikgolh: «Kakilaputsaniw chatum mapakgsina tiku nakinkamapakgsiyan chuna la amakgapitsi kachikinin». ¿La akxilhli tuku skinikgolh Samuel? ¿Nitlan limakgkatsilh o lakpuwa pi kaj xlakgmakgamakgolh? Jehová makgasa juez xtlawanit. Chu la uku nialh xlakaskinkgo kaj chatum palakachuwina. ¡Xlakaskinkgo pi xkamapakgsilh chatum mapakgsina la amakgapitsi kachikinin! ¿La akxilhli Samuel tuku skinikgolh? Biblia wan: «Tuku skinikgolh Samuel nitlan akxilhli» (1 Sam. 8:5, 6).

18. ¿Tuku wanilh Jehová Samuel xlakata tuku kskimakgo kachikin?

¹⁸ Kaʼakxilhwi la kgalhtilh Jehová akxni Samuel wanilh tuku kskimakgolh israelitas: «Kakgaxpatni kachikin putum tuku naskinikgoyan; xlakata ni wix tiku lakgmakgamakgon, akit tiku lakgmakgankgolh  tiku kamapakgsi». Jehová maʼakxilhnilh Samuel pi ni xlilipuwa, xlakata wa Jehová tiku kgalhi xliputum litliwakga xlakgmakgamakgo kachikin. ¡Nipara tsinu xmaxkikgo kakni Jehová! Jehová kalimakatsinilh Samuel pi lu nitlan xʼama kakitaxtuni xlakata xlakaskinkgo chatum mapakgsina, pero wankgolh: «Ni, wata chatum mapakgsina klakaskinaw». Wa xlakata Jehová, laksakli chatum mapakgsina, chu Samuel alh putsa xlakata naʼakmawaka aceite (1 Sam. 8:7-19).

19, 20. 1) ¿Tuku wa Samuel akxni Jehová wanilh pi xʼalh akmawaka aceite Saúl xlakata mapakgsina nawan? 2) ¿La chuntiya kamakgtayalh Samuel israelitas?

¹⁹ Pero ¿kaj xafuerza kgalhakgaxmatninalh Samuel? ¿Mastalh talakaskin pi xlakata tuku tlawanikgolh xlisitsilh? Komo atanu chuna xtlawanika, max putum kilhtamaku ksitsilh pero Samuel nichuna tlawalh. Xlakata xkatsi pi wa Dios tiku xlaksaknit Saúl xlakata namapakgsi kachikin, akmawakalh aceite chu asta tsukli, chu chuna limasiyalh pi xatapaxuwan makgamakglhtinalh chu ni xʼama makgxtakga. Na kawanilh israelitas: «¿Akxilhtit pi tiku laksakli Jehová namapakgsinan, niti malakgchani xliputum kachikin?» (1 Sam. 10:1, 24).

²⁰ Samuel putum kilhtamaku lu tlan talakapastakni kgalhilh. Ni wa akxilhli tuku nitlan xtlawa tiku xlaksaknit Dios, wata wa akxilhli lakwan tayat nema xkgalhi. Ni putum kilhtamaku lisitsilh xlakata lakgmakgankgolh israelitas tiku lu nitlan xtayatkan xwanit, wata wa akxilhli la liwana kskujninit Jehová xliputum xlatamat (1 Sam. 12:1-4). Nachuna, chuntiya skujli, xlakata kamakatsinilh israelitas tuku xtlawalh pi xtamakgatlinikgolh Jehová chu kawanilh pi ni xmakgxtakgkgolh. Chu xlakata israelitas akxilhkgolh pi lu nitlan tuku xtlawakgonit, skinikgolh Samuel pi xtlawalh oración xpalakatakan. Wa xlakata Samuel kawanilh: «Ni chuna ktitlawalh, ni ktitlawanilh Jehová tuku nitlan, chuntiya nakkapalakaskinan; chu chuntiya nakkamasiyaniyan xatlan tiji chu xalakatitum» (1 Sam. 12:21-24).

21. Komo nitlan limakgkatsiyaw xlakata achatum lakgayawaka tuku xlakaskinaw xkinkalakgayawakan, ¿la nakinkamakgtayayan tuku tlawalh Samuel?

²¹ ¿Minit kilhtamaku akxni achatum lakgayawaka tuku xlakpuwana pi wix xpimpaka lakgayawakana? ¿Lu lisitsi? Komo natlawayaw chuna la Samuel, nikxni katimastaw talakaskin pi natamakgxtakga tasitsi kkinakujkan chu ni katilakgsitsiniw (kalikgalhtawakga Proverbios 14:30). Kalakapastakwi pi kxkachikin Jehová anan lhuwa taskujut nema kamakgapaxuwa putum tiku ni makgatsankgananikgo.

22. ¿Tukuya lakwan tayat akxilhli Samuel pi xkgalhi Saúl?

²² Samuel akxilhli pi Saúl xkgalhi lakwan tayat. Xlikana pi Saúl niti xmalakgchani. Ni xpekuan chu skgalala xwanit chu asta xmaxkikan kakni akxni xʼakxilhkan. Nachuna, akxni tsukulh mapakgsinan, xtataktuju chu ni lhuwa tuku xlakaskin (1 Sam. 10:22, 23, 27). Chuna la putum latamanin, tlan xakstu xlaksaka la nalin xlatamat chu tuku natlawa (Deut. 30:19). ¿Xʼama laksaka tuku tlan?

23. ¿Tuku lu tlan tayat makgatsankgalh Saúl chu la limasiyalh pi lanka xmakgkatsikan?

²³ Lu nitlan, pero akxni kgalhikan limapakgsin laktlawanan, chu akxni chuna kitaxtu tunkun nialh tataktujukan. Chuna akgspulalh Saúl. Lakapala lanka tsukuka makgkatsikan chu nitu xkaliʼakxilha amakgapitsin, lakgmakgalh xlimapakgsin Jehová nema xmaxki Samuel. Akgtum kilhtamaku, nialh kgalhkgalhiputulh Samuel chu makamaxkilh tamakamastan Dios maski wa palakachuwina xlakgchan natlawa. Wa xlakata Samuel kilhnilh chu makatsinilh pi xfamilia nialh xʼamakgolh mapakgsinankgo. Pero Saúl ni listaktayalh wata tlakg laklanka talakgalhin tlawalh alistalh (1 Sam. 13:8, 9, 13, 14).

24. 1) ¿La limasiyalh Saúl pi ni kgalhakgaxmatli Jehová akxni katatlawalh guerra amalequitas? 2) ¿Tuku wa Saúl akxni stakyawaka, chu tuku tlawalh Jehová?

²⁴ Jehová wanilh Samuel pi xmakatsinilh Saúl pi xkatatlawalh guerra amalequitas, xmasputukgolh tuku xkgalhikgo chu xmakgnilh Agag, mapakgsina tiku lixkajni xlikatsi. Pero, Saúl ni makgnilh chu ni masputulh tuku xʼanan kkachikin. Akxni stakyawalh, Samuel akxilhli pi lu xtalakgpalinit Saúl. Ni makgamakglhtinalh tastakyaw wata kaj tsukulh katuwa wani, lakputsalh tuku nalimawaka chu tsukulh wan pi ni lu lanka talakgalhin tuku xtlawanit. ¡Asta kalimawakalh kachikin! Wa pi xmakgataxtinit tuku tlakg xalakwan animales xlakata xʼama makamaxki Jehová. Samuel lakatanks kgalhtilh: «Tlakg tlan kgalhakgaxmatninankan nixawa tamakamastan». Samuel nipara tsinu pekualh chu makatsinilh Saúl la xʼama malakgaxokge Dios: xʼamaka makglhtikan xtamapakgsin chu achatum tiku xʼama tawila xlakgxokgo (1 Sam. 15:1-33). *

25, 26. 1) ¿Tuku xlakata Samuel lu lakglipuwa Saúl, chu tuku wanilh Jehová xlakata nialh chuna xmakgkatsilh? 2) ¿Tuku katsinilh Samuel akxni alh kxchik Jesé?

 ²⁵ Samuel lu nitlan xlimakgkatsi xlakata tuku nitlan xtlawanit Saúl asta tantaskaka tlawanilh oración Jehová. Biblia wan pi lhuwa kilhtamaku lakglipuwa Saúl. ¡Max lu nitlan limakgkatsilh xlakata Saúl lanka xmakgkatsikan chu ni kgalhakgaxmatli Dios! Chu akxni lakgapasli xtasiya pi lhuwa tuku tlan xʼama tlawa... Nialh makgtum akxilhputulh. Akxni Jehová akxilhli pi lu xlipuwanit, wanilh: «¿Asta tukuya kilhtamaku chuntiya nalakglipuwana Saúl, chu akit klakgmakganit xlakata nialh namapakgsinan kʼIsrael? Kalimatsama aceite akgalokgot chu kapit. Nakmalakgachayan niku wi Jesé tiku xalak Belén, xlakata chatum tiku xkamanan klaksaknit xlakata namapakgsinan» (1 Sam. 15:34, 35; 16:1).

²⁶ Ni wa latamanin makgantaxtikgo xtalakaskin Jehová, xlakata maski wi tiku tlan skujnanikgo la uku alistalh makgxtakgkgo. Komo namakgxtakga tiku laksaka Jehová putsapara atanu. Wa xlakata palakachuwina tiku xlina kata, nialh lakglipuwa Saúl chu chuna la limapakgsilh Dios, alh kxchik Jesé kBelén xlakata naʼakmawaka aceite xasasti mapakgsina. Anta akxilhli pi Jesé xkgalhi chalhuwa kamanan nema xtasiyakgo pi tlan mapakgsina nawankgo. Pero, Jehová malakapastakalh pi ni wa xʼakxilhli la xtasiyakgo (kalikgalhtawakga 1 Samuel 16:7). Alistalh, liminika David tiku tlakg aktsujku xwanit, chu wa laksakka.

27. 1) ¿Tuku matliwakglhli xtakanajla Samuel akxni kgolota xwanit? 2) ¿Tuku lakpuwana xlakata xliʼakxilhtit Samuel?

²⁷ Akxni kgolota xwanit, Samuel akxilhli pi lu tlan tuku tlawalh Jehová xlakata wililh David xlakgxokgo Saúl. Saúl makgatlajalh tasitsi asta xmakgninamputun chu na xlakgkatsaninan chu alistalh makgxtakgli Dios. Pero David limasiyalh lakwan tayat, ni xpekuan, xaʼakgstitum xlin xlatamat, xkanajlani Dios chu ni xmakgxtakga. Akxni tataja xwanit tlakg tatliwakglhli xtakanajla. Katsilh pi Jehová tlan nakinkamakgtayayan akxni kgalhiyaw talipuwan o taʼakglhuwit, asta akxni kgalhiyaw laklanka taʼakglhuwit alistalh Jehová sikulunatlawanan. Akxni nilh Samuel, putum kachikin lakgtasakgolh. Lu lakglipuwankgolh xlakata atsinu ni chalh akgtum ciento kata akgstitum skujnanilh Jehová. La uku, putum xlakskujnin Jehová tlan natlawakgo uma takgalhskinin: «¿Nachuna nakkgalhi kintakanajla la Samuel?».