1. ¿Tuku kilhtamaku tlakg nitlan tuku tlawalh Pedro xliputum xlatamat?

PEDRO nikxni katipatsankgalh la lakaʼakxilhli Jesús. ¿Xtasiya pi xlikilhnima xlakgastapu o xliwaniputun pi nialhtu xlilaka? Ni katsiyaw, xlakata Biblia wan pi Jesús «lakgtalakgaspitli [...] chu lakukxilhli Pedro» (Luc. 22:61). Pero akxni lakaʼakxilhli Jesús makgtayalh Pedro xlakata xkatsilh pi lu nitlan tuku xtlawanit. Aku kgantaxtulh tuku xwaninit Jesús, tuku Pedro xwanit pi nikxni chuna xʼama tlawa: wa pi ni xlakgapasa xMakgalhtawakgana. Xliputum xlatamat max wa uma kilhtamaku tuku tlakg nitlan tlawalh. Pedro lakpuwan pi tlawalh tlakg lanka talakgalhin.

2. ¿Tuku lu xlakaskinka katsinilh Pedro chu la tlan nakinkamakgtayayan uma tuku nitlan titaxtulh?

² Pero ¿nialh la tuku tlan xtlawalh? Nichuna, xlakata alistalh maxkika talakaskin xlakkaxtlawalh tuku nitlan xtlawanit. Chu xlakata lu xkgalhi takanajla, nialh tlawalh tuku ni xlitlawat chu tuku tlakg xlakaskinka, Jesús masiyanilh tuku wamputun tapatinankan. Wa uma tuku lu xlakaskinka nema kimputumkan kiliʼakgatekgsatkan chu tuku lu nitlan titaxtulh Pedro tlan nakinkamakgtayayan.

3, 4. 1) ¿Tuku kgalhskilh Pedro Jesús chu tuku max xlakpuwan apóstol? 2) ¿La makgtayalh Jesús Pedro xlakata xmasiyanilh pi nachuna xlakapastaka la amakgapitsin latamanin?

³ Max akgchaxan papaʼ xtitaxtunit, akxni xwilakgo kCapernaum, kkachikin niku xlama Pedro, xla kgalhskilh Jesús: «Tlati, ¿ni makglit nakmatsankgananiy nkintala mpala xkilakgalhinanilh? ¿[...] Asta mpala makgtujun?». Xlikana, Pedro xlakpuwan pi lu xtapatinan, xlakata tiku xpulalinkgo takanajla xmasiyakgo pi kaj makgtutu natapatinankan. Pero Jesús kgalhtilh: «Ni kwaniyan asta mpala makgtujun, wampi asta tutumpuxamakaw makgtujun» (Mat. 18:21, 22).

⁴ ¿Xkilhwama Jesús pi naputlakgatilhayaw la makglit nakinkatlawaniyan tuku nitlan achatum? Ni, tanu tuku xwamputun. Akxni wanilh pi ni makgtujun wata tutumpuxamakutujun, xwaniputun pi  tiku xlikana paxkinan ni putlakge akxni tlawanikan tuku nitlan (1 Cor. 13:4, 5). Jesús xmasiyaniputun apóstol pi na xlakapastakma la amakgapitsin tiku ni xlakgalhamanankgo chu ni xtapatinankgo, pi xputlakgatilhakgo akxni xtapatinankgo la akxni wi tiku xkalaklini chu xtsokgwilikgo klibreta. Pero tiku likatsikgo la Dios tlakg xlilakgalhamanatkan chu xliputum xnakujkan xlitapatinatkan (kalikgalhtawakga 1 Juan 1:7-9).

5. ¿Tukuya kilhtamaku liwana akgatekgsaw pi lu xlakaskinka natapatinanaw?

⁵ Pedro ni talakgalhtilh xMakgalhtawakgana, pero ¿pi kawa lakgchalh kxnaku tuku wanika? Pero, min kilhtamaku akgatekgsaw pi lu xlakaskinka natapatinanaw akxni lu lakaskinaw nakinkatapatikanan. Wa uma tuku akgspulalh Pedro akxni Jesús xʼamakaja makgnikan. Uma xaʼawatiya horas nema tuwa tuku xtitaxtuma, Pedro maklakaskilh pi Jesús makglhuwa xtapatilh.

6. ¿Tuku tlawalh Pedro akxni Jesús xkamasiyaniputun xʼapóstoles pi ni tlankajwa xlikatsikgolh, pero la kalikatsinilh Jesús?

⁶ Uma katsisni lu xlakaskinka, wa xaʼawatiya katsisni akxni Jesús nalatama kKatiyatni la chatum lataman. Chu lhuwaku tuku nakamasiyani xʼapóstoles. Pulana kamasiyani pi ni lankajwa nawankgo. ¿La kamasiyani? Katantuchakge, akgtum taskujut nema xtlawakgo lakskujnin tiku nitu xkaliʼakxilhkan. Pulana, Pedro nitlan akxilha tuku Jesús tlawama. Alistalh ni masta talakaskin pi Jesús natantuchakge, pero akxni wanilh tuku xlakata, na xlakaskin xmakgachakgekga chu xʼakgchakgaka. Jesús ni lisitsilh, wata liwana kawanilh tuku xkilhchanima chu la xlilakaskinka tuku tlawalh (Juan 13:1-17).

7, 8. 1) ¿Tuku tlawapa Pedro nema limasiya komo Jesús lakapala nasitsi? 2) ¿La chuntiyaku limasiyalh Jesús pi tlan xlikatsi chu xkaʼakgatekgsni xʼapóstoles?

⁷ Kaj tsinu kilhtamaku titaxtulh, Pedro wi tuku tlawapara nema limasiya komo Jesús ni lakapala sitsi. Apóstoles tsukukgolh litaʼakglhuwikgo xlakata xkatsiputunkgo tiku tlakg xlakaskinka xwanit chu max Pedro makgtanulh kʼuma xalimaxana taʼakglhuwit. Pero Jesús ni kakilhnilh akxni kastakyawalh chu kawanilh pi lu tlan xlakata ni makgxtakgkgo. Pero na kawanilh pi alistalh namakgxtakgkgo. Pedro tunkun kgalhtilh xMakgalhtawakgana chu wanilh pi nikxni xʼama makgxtakga chu asta wanilh pi namasta xlatamat xpalakata Jesús. Jesús wanilh pi ni chuna xʼama la: watiya uma katsisni, akxni tantum puyu makgtiy xʼama tasa, Pedro makgtutu xʼama wan pi ni xlakgapasa. Ama kilhtamaku ni kaj talakgalhtilh Jesús, wata wa pi nikxni xʼama makgxtakga maski amakgapitsin xmakgxtakgkgolh (Mat. 26:31-35; Mar. 14:27-31; Luc. 22:24-28; Juan 13:36-38).

⁸ Lu kaks lilakawanaw pi Jesús ni lisitsilh. Chu maski lu tuwa tuku xtitaxtuma, chuntiyaku akxilha tlan tayat nema kgalhikgo  umakgolh lakchixkuwin maski lakgalhinanin. Xkatsi pi Pedro xʼama makgxtakga pero wanilh: «Wampi wix nti kpalakaskinitan kkiʼoración lakimpi ni namakgatsankgaya mintakanajla. Akxni nchu wix [...] [nataspitparaya], tliwakglh kawilikgo minatalan» (Luc. 22:32). ¡Jesús lu kalakgalhaman chu tlan kalikatsini! Xkatsi pi Pedro natatliwakglhpara xtakanajla chu tlan naskujnanipara Dios.

9, 10. 1) ¿Tuku xlakata Pedro stakyawaka kjardín xla Getsemaní? 2) ¿Tuku liwana kinkamasiyaniyan tuku ttlawalh Pedro?

⁹ Alistalh, akxni xwilakgolh kjardín xla Getsemaní, Pedro makglhuwa stakyawaka. Jesús skinilh Pedro, Santiago chu Juan pi skgalalh xtawilakgolh akxni xtlawama oración, xlakata lu xlipuwan chu lu xlakaskin pi xʼamigos xmakgtayakgolh. Pero xlakan makglhuwa lhtatawilakgolh. Maski chuna, Jesús katapatilh chu limasiya pi kaʼakgatekgsni chu kalakgalhaman akxni kawani: “Wa spiritu, lu wa xlikana skgalalh wi, wampi wa ntiyatliwa, xaxlajwani” (Mar. 14:32-41).

¹⁰ Ni makgas titaxtulh kilhtamaku, kalakgchankgolh lhuwa latamanin tiku xlinkgo makgskgot, espadas chu kiwi. Xlikana pi la uku xtalakaskin kuenta xtlawakgolh chu liwana xlakapastakkgolh tuku natlawakgo. Pero ¿tuku tlawa Pedro? Lakapala maxtu xʼespada chu kaktinilh xtakgan Malco, chatum xlakskujni xapuxku sacerdote. Pero Jesús amakgtum ni sitsipa, wata liwana stakyawalh Pedro chu mapaksalh Malco. Na kawanilh kstalaninanin pi ni namakgninankgo, chu uma tastakyaw chuntiyaku makgantaxtiyaw la uku kstalaninanin Cristo (Mat. 26:47-55; Luc. 22:47-51; Juan 18:10, 11). ¡Tuku tlawalh Pedro makglhuwa liʼakxilhli pi Jesús ni lakapala xsitsi! Tuku tlawalh uma apóstol kinkamasiyaniyan pi putum akinin makglhuwa lakgalhinanaw (kalikgalhtawakga Santiago 3:2). ¿Pi wi tiku lama kkakilhtamaku tiku ni talakaskin naskini Dios katapatilh chali chali? Pero, Pedro lhuwaku tuku xʼama titaxtu uma katsisni. Chu aku xʼama titaxtu tuku tlakg nitlan.

11, 12. 1) ¿Tuku xlakata wanaw pi Pedro limasiyalh pi ni xpekuan akxni xchipakanita Jesús? 2) ¿Tuku xlakata wanaw pi Pedro ni makgantaxtilh tuku xwanit natlawa?

¹¹ Jesús kawani latamanin pi kakamakgxtakgolh kstalaninanin, xlakata kaj wa xputsamakgolh. Xlakata Pedro nila tuku tlawa xlakata ni nalinkan xMakgalhtawakgana, katatsala amakgapitsin apóstoles.

¹² Ni makgas titaxtu, Pedro chu Juan nialh tsalakgo. Max tayakgolh lakatsu niku wi xchik tiku xapuxku sacerdote xwanit, Anás, xlakata anta niku pulana linka Jesús xlakata namakgalhapalikan. Akxni Jesús alakatanu niku linkan, Pedro chu Juan «makgat» kstalanitilhakgo (Mat. 26:58; Juan 18:12, 13). Nila nawanaw pi Pedro kaj xapekua xwanit. Xlakata xtalakaskin pi ni xpekualh xkastalanilh  latamanin tiku xlinkgo limakgnin. Nachuna, kalakapastakwi pi Pedro xʼakgachukunit chatum soldado. Pero ¿xlimasiyama pi ni makgxtakga Jesús chuna la xwaninit? ¡Asta xwanit pi xʼama masta xlatamat xpalakata Jesús! (Mar. 14:31.)

13. ¿Tuku kilitlawatkan xlakata liwana nastalaniyaw Cristo?

¹³ Chuna la Pedro, la uku lhuwa tiku «kaj makgat» stalanikgo Cristo, ni lakaskinkgo pi nakatsikan. Pero chuna la Pedro tsokgli alistalh, xlakata tlan liwana nastalaniyaw talakaskin lakatsu natawilaniyaw. Talakaskin putum kilhtamaku nastalaniyaw xliʼakxilhtit, chu ni napekuanaw maski wi tuku nakinkaʼakgspulayan (kalikgalhtawakga 1 Pedro 2:21).

14. ¿Niku tamakgxtakgli Pedro ama katsisni akxni xmakgalhapalimaka Jesús?

¹⁴ Pedro tsekg tsekg talakatsuwi xchik sacerdote Caifás, tiku kgalhi lhuwa limapakgsin chu tumin, xchik wa nema tlakg xalanka xlikalanka Jerusalén. Kxpulakni umakgolh chiki xkgalhikgo akgtum patio chu kxlakatin xkgalhikgo akgtum malakcha. Akxni Pedro chan niku laktanukan, tsumat tiku xkuentajtlawanan ni maxki talakaskin natanu. Pero Juan, tiku xlakgapasa xapuxku sacerdote chu xtanunita, taspita, skini pi kamaxkilh talakaskin katanulh chu tamaknulh. Max, Pedro ni akxtum taʼan Juan chu na ni talakatsuwi niku wi xMakgalhtawakgana tiku wi kxpulakni lanka chiki. Wata tamakgxtakga kpatio, niku lhuwa lakskujni wilakgolh xlakatin klhkuyat xlakata uma katsisni lu lonkgnan, chu lhuwa akgsaninanin tanukgo chu taxtukgo kchiki nema lhuwa tuku nixaxlikana limawakamakgolh Jesús (Mar. 14:54-57; Juan 18:15, 16, 18).

15, 16. ¿La kgantaxtulh tuku Jesús xlichuwinanit xlakata Pedro?

¹⁵ Xlakata lhkuyat lu maxkgakganan, uma tsumat nema maxkilh talakaskin Pedro natanu, tlakg liwana akxilha. Akxni lakgapasli wanilh: «Na xa wix nti xtalapat Jesús xala kʼGalilea». Ni katsilh tuku nakgalhtinan. Wa xlakata apóstol wan pi ni lakgapasa Jesús chu asta wan pi ni katsi tuku lichuwinama uma tsumat. Alistalh an lakatsu niku laktanukan, xlakata ni lakaskin naʼakxilhkan. Anta atanu tsumat akxilha chu na wani: «Wa yuma nchixku, na xawa xtalama Jesús xala kNazaret», chu Pedro wan: «Ni klakgapasa yuma nchixku» (Mat. 26:69-72; Mar. 14:66-68). Asta la uku Pedro makgtiya wanit pi ni lakgapasa Jesús. Max akxni xlimakgtiy xwanita pi ni xlakgapasa Jesús kgaxmatli pi tasay tantum puyu, pero lu pekuanit chu ni lakapastaka tuku Jesús aku xlichuwinanit pi xʼama la.

¹⁶ Pedro chuntiyaku ni lakaskin nalakgapaskan, pero makgapitsi latamanin talakatsuwinikgo. Chatum wa xpariente Malco, lakskujni tiku Pedro xkaktininit xtakgan. Chixku wani: «[...] Ktaʼukxilhni nkit anta klipakan[...]». Pedro kawani pi ni xlikana tuku wankgo, chu wan pi xlikana tuku kawanima, ¡chu wan pi wi tuku nitlan  kaʼakgspulalh komo kaj xʼakgsaninama! Xlimakgtutu wan pi ni lakgapasa xMakgalhtawakgana. Chu akxni aku chuna xwanit, tantum puyu tasa, xlimakgtiy nema Pedro kgaxmata uma katsisni (Juan 18:26, 27; Mar. 14:71, 72).

17, 18. 1) ¿Tuku tlawalh Pedro akxni katsilh pi lu nitlan tuku xtlawanit? 2) ¿Tuku max lakpuwa Pedro?

¹⁷ Ama kilhtamaku, Jesús talakaxtu niku xwi patio, chu lakaʼakxilha xʼamigo, chuna la talichuwinalh niku tsuku uma capítulo. ¡Makgatsankgananilh xMakgalhtawakgana! Xlakata lu nitlan xmakgkatsi, taxtuy kchiki chu kalakapukswa tsukulh tlawan kcalles nema kaj tsinu xmaxkgakga papaʼ nema xtsankgamaja. Pero xlakata lu lakgpixtajma nila lakapala tlawan. Ama kilhtamaku nialh tayanilh chu tsuku tasa xlakata lu lipuwan (Mar. 14:72; Luc. 22:61, 62).

¹⁸ Akxni wi tiku tlawa akgtum lanka talakgalhin la uma, max wi tiku nalakpuwan pi lu lanka talakgalhin chu ni xlilat natapatikan. Max Pedro chuna makgkatsilh. ¿Xʼamaka tapatikan Pedro?

19. ¿La makgkatsilh Pedro xlakata tuku xtlawanit chu tuku likatsiyaw pi uma ni tlawalh pi nialh xkatsilh tuku natlawa?

¹⁹ Tuwa nakatsiyaw putum tuku max makgkatsilh Pedro uma tsisa chu tantaku. ¡Max lu nitlan xlimakgkatsi, xlakata Jesús lhuwa horas patinalh chu alistalh makgnika! ¡Max lu lilipuwan xlakata lu makgalipuwa xMakgalhtawakgana xaʼawatiya kilhtamaku nema latamalh la chatum lataman! Xlikana, Pedro lu nitlan xlimakgkatsi, pero uma ni lakxtlawalh xtakanajla. Biblia wan pi tunkun katatamakxtumilh atanu kstalaninanin Cristo (Luc. 24:33). Max, putum nitlan xmakgkatsikgo xlakata pekuankgolh ama katsisni. Pero, xlakata makxtum xwilakgolh lamatliwakglhkgolh.

20. ¿Tuku kinkamasiyaniyan xlakata Pedro tlan tuku laksakli natlawa?

²⁰ Tlan nawanaw pi akxni makxtum xwilakgolh Pedro laksakli natlawa tuku tlakg tlan kxlatamat. Akxni chatum xlakskujni Dios tlawa akgtum talakgalhin, tuku tlakg xlakaskinka ni wa komo lu lanka talakgalhin tlawanit, wata komo lakkaxwilinit natakipara chu nalakkaxtlawa tuku nitlan tlawanit (kalikgalhtawakga Proverbios 24:16). Pedro limasiyalh pi xlikana xkgalhi takanajla akxni alh niku xwilakgolh xnatalan maski nitlan xmakgkatsi. Akxni lipuwanaw chu nitlan limakgkatsiyaw xlakata tuku nitlan tlawanitaw, max tamakgatliyaw, pero uma lu nitlan (Prov. 18:1). Xlakata natatliwakglha  kintakanajlakan talakaskin ni namakgxtakgaw congregación (Heb. 10:24, 25).

21. ¿Tuku lu tlan tamakatsin katsilh Pedro xlakata xkatawi xnatalan?

²¹ Xlakata xkatawi xnatalan tiku na watiya takanajla xkgalhikgo, Pedro katsilh akgtum lu tlan tamakatsin: ¡xmakni Jesús nialhtu xwi niku xmaknukanit, maski xlakgatalakanit! Pedro chu Juan lakapala ankgolh niku xmaknukanit Jesús. Pulana chalh Juan xlakata max tlakg kgawasaku xwanit. Pero akxni akxilhli pi xtalakkinit niku xmaknukanit Jesús, ni tanuputulh. Pero Pedro maski nialh lu la xjaxanan, lakapala tanulh. ¡Xmakni Jesús nitu xwi niku xmaknukanit! (Juan 20:3-9.)

22. ¿Tuku kanajlalh Pedro chu tuku xlakata nialh lipuwa?

²² Pulana, Pedro ni kanajlalh pi Jesús xmalakastakwanikanit. Nipara kakanajlanilh lakpuskatin tiku kawanikgolh stalaninanin pi makgapitsi ángeles xkawanikgonit pi Jesús xmalakastakwanikanit (Luc. 23:55–24:11). Pero akxni xkgotanumaja, kanajlalh chu nipara tsinu lipuwa. ¡Jesús xlakastakwananit! Chu la uku akgtum lu tliwakga espíritu xwanit, chu xlakata xlimasiyalh, katasiyanilh putum kstalaninanin. Pero pulana wi tuku lu xlakaskinka tlawalh xpalakata Pedro. ¿Tuku tlawalh? Tekgsaw xtakgalhtin kBiblia. Ama kilhtamaku apóstoles wankgolh: «Lu wa xlikana xlakastakwananit nkimPuchinakan, na xtasiyuninit Simón» (Luc. 24:34). Alistalh apóstol Pablo na tsokgli xlakata tuku xlanit uma kilhtamaku akxni Jesús «na titasiyunilh Cefas, alistalh nchu ntitasiyunikgolh wa xkgalhakutuykan» (1 Cor. 15:5). Kalakapastakwi pi Simón chu Cefas wa atanu tukuwani nema xlilakgapaskan Pedro. Biblia lichuwinan tuku lu xlakaskinka titaxtulh Pedro: ama kilhtamaku akxni xakstu xlama, Jesús tasiyanilh.

23. ¿Tuku xlakata xlilakapastakatkan xliʼakxilhtit Pedro kstalaninanin Cristo tiku tlawakgonit akgtum lanka talakgalhin?

²³ Biblia ni kinkawaniyan tuku lalh akxni Jesús tasiyalh Pedro. Tlan nalakpuwanaw la lu lipaxuwalh apóstol akxni akxilhli pi xMakgalhtawakgana tiku lu xpaxki xlama chu nachuna wanilh pi lu xlipuwan chu nitlan xlimakgkatsi xlakata tuku xtlawaninit. Tuku tlakg xlakaskin Pedro wa pi Jesús xtapatilh. Chu akinin katsiyaw pi xliputum xnaku Jesús tapatilh. La uku kstalaninanin Cristo tiku lakgalhinankgonit xlilakapastakatkan xliʼakxilhtit Pedro chu nikxni xlilakpuwanatkan pi ni xlilat nakatapati Dios. Kalakapastakwi pi Jesús likatsi chuna la xTlat tiku «lu tapatinan» (Is. 55:7).

24, 25. 1) ¿La kitaxtulh Pedro ama katsisni akxni kskitinama kpupunu xalak Galilea? 2) ¿Tuku tlawalh Pedro akxni akxilhli milagro nema tlawalh Jesús akxni kxkgakgamaja?

²⁴ Jesús xkawaninit xʼapóstoles pi xʼankgolh kʼGalilea, niku  xʼama kaʼakxilhpara. Akxni chankgo, Pedro alh skitinan kpupunu, chu makgapitsi kstalaninanin na taʼankgolh. Amakgtum Pedro lama kchuchut niku akglhuwa kata anta kskuja. Akxni kgaxmata la makasanan barco, la tachayawa pupunu chu akxni chaxa redes lu tlan limakgkatsi. Pero tantaskaka nitu chipakgo (Mat. 26:32; Juan 21:1-3).

²⁵ Akxni tsukulh xkgakga wi tiku kawani pi kamujukgolh redes kxʼakgalhpatuku barco. Chuna tlawakgo... ¡chu chipakgolh 153 skiti! Akxni katsilh tiku xkatachuwinama, Pedro lhkgan alh kchuchut chu paxtawakatnan asta kxkilhtun pupunu. Kxkilhtun pupunu Jesús  kamaxki xʼamigos tiku ni xmakgxtakgkgo makgapitsi skiti nema xkamakchanit kjalanat. Chu ama kilhtamaku tachuwinan Pedro (Juan 21:4-14).

26, 27. 1) ¿Tuku skinilh Jesús Pedro pi makgtutu xwa? 2) ¿La limasiyalh Jesús pi xlikana xtapatinit Pedro?

²⁶ Jesús kgalhskin Pedro, chu max xkaʼakxilhma lhuwa skiti nema aku xchipakgonit chu wani: «¿[Pi] tlakg kimpaxkiya ni xawa yu wilakgo?». ¿Tlakg xpaxkilh Pedro xtaskujut nixawa Jesús? Nina makgas Pedro makgtutu wa pi ni xlakgapasa Jesús. Chu la uku Jesús maxki talakaskin pi makgtutu nawan pi paxki pero xlakatin amakgapitsi kstalaninanin, chu Pedro chuna tlawa. Chu Jesús skini wi tuku xtlawalh xlakata xlimasiyanilh. ¿La xʼama limasiyani? Akxni pulana xwililh naskujni Dios: nakakuentajtlawa xborregos Cristo, uma wamputun pi xkuentajtlawalh chu xkamatliwakglhli xnatalan (Luc. 22:32; Juan 21:15-17).

²⁷ Chuna Jesús limasiyani Pedro pi chuntiyaku lu xlakaskinka akxilha chu nachuna xTlat. Apóstol lu namakgtaya congregación nema pulalin Cristo. ¡Uma limasiya pi xlikana xtapatinit! Xlakata Jesús lu lakgalhaman, Pedro lu tlan limakgkatsilh kxnaku.

28. ¿Tuku tlawalh Pedro xlakata xmakgantaxtilh tuku xwamputun xtukuwani?

²⁸ Akglhuwa kata Pedro liwana makgantaxtilh tuku xlakgayawakanit. Kamatliwakglhli xnatalan chuna la Cristo xlimapakgsinit katsisni akxni nina xmakgnikan. Akxni kakuentajtlawalh kstalaninanin Cristo ni kasitsinilh chu kapaxkilh. Simón tiku Jesús limapakuwilh Pedro, tlawalh chuna la wamputun xtukuwani, «chiwix», lu tatliwakglhli chu lipawanka kcongregación. Chuna limasiya maktiy cartas nema tsokgli nema na wilakgolh kBiblia. Uma cartas na limasiya pi Pedro putum kilhtamaku lakapastakli tuku Jesús masiyanilh, xlakata tuku wamputun tapatinankan (kalikgalhtawakga 1 Pedro 3:8, 9 chu 4:8).

29. ¿La tlan nakgalhiyaw kintakanajlakan chuna la Pedro chu nalakgalhamananaw chuna la xMakgalhtawakgana?

²⁹ ¡Lu xlakaskinka pi kimputumkan na nakatsiyaw tuku kilhchanima natapatinanaw! ¿Skiniyaw Dios chali chali kakinkatapatin xlakata kintalakgalhinkan? ¿Kanajlayaw pi nakinkatapatiyan chu xapa putum tuku nitlan tlawanitaw? ¿Na katapatiyaw amakgapitsin? Chuna nalimasiyayaw takanajla nema xkgalhi Pedro chu tlakg nalimasiyayaw talakgalhaman nema xlimasiya Makgalhtawakgana.