1-3. ¿Tuku nila tamakanajla akxilhli Pedro ama kilhtamaku, chu tuku tuwa titaxtukgolh ama katsisni?

PEDRO xliputum xlitliwakga lima barco kpupunu xalak Galilea chu lu kapukswa. Kaj xalan akxilha pi wi tuku skgo lakgamakgat. ¿Naxkgakgaya? Pupunu lakgsnokgwilima barco. Xlakata lu palha unama pupunu tlakg tachayawa. Maski makstajnit chu makkatsan, Pedro chuntiya lima barco chu ni tamakgxtakga.

² Maski taʼankgo makgapitsi kstalaninanin Cristo kbarco, Jesús ni anta katawi, xlakata tamakgxtakgli kxkilhtun pupunu. Ama kilhtamaku Pedro xʼakxilhnit la xMakgalhtawakgana malhuwilh kaxtalanchu chu nachuna skiti o tamakgnin xlakata xkamawilh lhuwa mil latamanin. Wa xlakata mapakgsina xtlawaputunkgo Jesús. Pero xla liwana xlakapastaknit ni namakgtanu kpolítica chu xkamasiyaniputun kstalaninanin nachuna xtlawakgolh. Wa xlakata katsalanilh chu kalimapakgsilh kstalaninanin pi xʼankgolh kbarco kxaʼakilhtutu pupunu. Chu Jesús xʼama kʼakgtum sipi xlakata xakstu xtlawalh oración (Mar. 6:35-45; kalikgalhtawakga Juan 6:14-17).

³ Akxni kstalaninanin taxtukgolh, papaʼ talhmana xwi, pero la uku tsankgamaja kʼoeste. Chu maski tantaskakaja limakgolh barco nina lhuwa kilómetros ankgonit. Xlakata pupunu ni kamaxki talakaskin nalinkgo barco chu xlakata un chu pupunu pixlanka makasanankgo, ni lu lakgaxmatni akxni latachuwinan. Wa xlakata Pedro max lhuwa tuku lilakapastaknama.

4. ¿Tuku xlakata Pedro akgtum lu tlan liʼakxilhtit?

⁴ Pedro lhuwa tuku tlan nalilakapastaka. Titaxtunita liwakaya akgtiy kata akxni lakgapasli Jesús xalak Nazaret, chu lhuwa tuku akxtum titaxtukgonit. Maski lhuwata tuku katsininit, katsi pi lhuwaku  tsankgani. Lu tlan kstalanina Cristo wamputun, wa xlakata tlakg kanajlaputun chu nialh napekuan chu uma kinkawiliniyan lu tlan liʼakxilhtit. La uku liwana naʼakxilhaw tuku tlawalh xlakata nialh xpekualh chu lu xkanajlalh.

5, 6. ¿La xwanit xlatamat Pedro?

⁵ Pedro nikxni xʼama patsankga kilhtamaku akxni lakgapasli Jesús. Xtala Andrés tiku wanilh uma lu tlan tamakatsin: «Ktakgsnitaw Mesías». Nipara tsinu xkatsi pi ama kilhtamaku lu xʼama talakgpali xlatamat (Juan 1:41).

⁶ Pedro xlama kCapernaum, kachikin nema xwi knorte niku xwi pupunu xalak Galilea, akgtum lanka lago nema xasakgsi chuchut xwanit. Andrés chu Pedro xnegociojkan xwanit skitinankan chu akxtum xkataskujkgo Santiago chu Juan xkamanan Zebedeo. Kxchik Pedro chu xpuskat na anta xwi xputiatsi chu Andrés. Xlakata skitinanin tlan xkamaxkikgolh tuku xmaklakaskinkgo xfamilias, xtalakaskin pi lakgtliwakgan xwankgolh, xalakskujnin chu lu xkatsinikgolh tlawakgo xtaskujutkan. Max makglhuwa tantaskaka xlatajukgo kpupunu, xmakankgo chu xmakutukgo xredeskan chu xlimaklakaskinkgo akgtiy barcos xlakata xmaxtukgolh skiti. Akxni kxkgakga chuntiyaku kskujkgo, xlakata xlaksakkgo chu kstakgo skiti, nachuna xchakgakgo chu xlakgtsapakgo xredeskan.

7. ¿Tuku tamakatsin wanika Pedro chu tuku xlakata lu tlan xwanit?

⁷ Biblia kinkawaniyan la Pedro kstalanina Cristo litaxtulh. Wan pi xtala Andrés kstalanina Juan tiku xMununan xwanit, wa xlakata max Pedro liwana xkgaxmata putum tuku xwan xtala xlakata Juan. Akgtum kilhtamaku Andrés akxilhli pi wi tuku lalh nema ni chali chali xla. Akxni Juan akxilhli Jesús xalak Nazaret uma tuku wa: «¡Kaʼukxilhtit aktsu xkalhnilu [o xborrego] Dios!». Andrés lakapala kstalanina Cristo litaxtulh, chu xlakata lu xpaxuwanit alh putsa Pedro chu makatsinilh pi xchinita Mesías (Juan 1:35-41). Xtitaxtunita max akgtati mil kata akxni ni kgalhakgaxmatnika Dios kjardín xaʼEdén, chu Jehová xwanit pi xʼama makamin chatum tiku lu xlakaskinka xlakata tlan xkalakgmaxtuka latamanin (Gén. 3:15). Andrés akxilhli pi wa uma Lakgmaxtuna, Mesías tiku xwankanit pi namin. Akxni Pedro katsilh lakapala lakgalh.

8. ¿Tuku wamputun tukuwani nema Jesús wilinilh Pedro chu tuku xlakata lhuwa lakpuwankgo pi uma tukuwani ni xminini?

⁸ Ama kilhtamaku Pedro xlilakgapaskan Simón, o Symeón. Pero xapulana akxni Jesús akxilhli wanilh: «Wix wanikana Simón xkgawasa Jonás, wampi kit naklimapakuwiyan Cefas (yuma kxatachiwin arameo wamputun Pedro, usu chiwix)» (Juan 1:42, Hua Xasasti Talaccaxlan, 1999). Uma limasiya pi Jesús wilinilh xtukuwani «Cefas»  nema wamputun «chiwix. Max akxilhli pi Pedro xʼama litaxtu la akgtum chiwix: chatum tiku lu tliwakga xkgalhilh xtakanajla, tiku tlan xlipawanka nema xʼama matliwakglha congregación. Pero ¿nachuna xlakpuwan Pedro? Max ni. Lhuwa tiku likgalhtawakgakgo evangelios lakpuwankgo pi ni xkgalhi umakgolh lu tlan tayat. Wilakgolh tiku lakpuwankgo, pi chuna la wan Biblia, tasiya pi kaj lakapala talakgpali chu ni liwana xkatsi tuku natlawa.

9. ¿Tuku akxilhkgo Jehová chu Jesús chu tuku xlakata nakanajlayaw chuna la xlakan kinkaʼakxilhkgoyan?

⁹ Jesús liwana xkatsi pi Pedro wi tuku nila liwana xmakgantaxti. Pero Jesús xlakpuwan chuna la xTlat, putum kilhtamaku wa xakxilha tuku tlan xtlawakgo latamanin. Wa xlakata akxilhli pi Pedro lhuwa tuku tlan xtlawalh chu xmakgtayaputun xlakata xkgalhilh lakwan tayat. La uku Jehová chu Jesús na wa akxilhkgo tuku tlan tlawayaw. Pero ¿tuwa makgkatsiyaw nakanajlayaw pi wi tuku tlan tlawayaw? Komo chuna, talakaskin nakanajlayaw chuna la kinkaʼakxilhkgoyan chu namastayaw talakaskin nakinkamasiyanikgoyan chu nakinkastakyawakgoyan la tlawalh Pedro (kalikgalhtawakga 1 Juan 3:19, 20).

10. ¿Tuku akxilhli Pedro, chu tuku tlawalh alistalh?

¹⁰ Akxni Pedro lakgapasli Jesús, max taʼalh kmakgapitsin kachikinin niku xʼan lichuwinan Dios. Max akxilhli xapulana milagro, akxni chuchut vino tlawalh akxni xʼankgonit kʼakgtum paskua kCaná niku xtamakgaxtokgmaka. Chu tuku tlakg xlakaskinka, kgaxmatli akxni Jesús lichuwinalh xatlan tamakatsin xlakata xTamapakgsin Dios. Pero alistalh makgxtakgli chu tsukupa skitinan. Titaxtulh makgapitsi papaʼ, Pedro tatanokglhpa Jesús chu uma kilhtamaku wanilh pi xlimaklakaskilh xlatamat chu xlitliwakga xlakata kstalanina xwa.

11, 12. 1) ¿La kitaxtulh Pedro ama tsini akxni xʼama chipa skiti? 2) Akxni xkgaxmatma tuku xwan Jesús, ¿tukuya takgalhskinin max xlilakapastakma Pedro?

¹¹ Tsisni nema xtitaxtunita akxni nina xtatanokglha Jesús, Pedro nitu xchipanit skiti. Pedro chu xcompañeros makglhuwa makankgolh xredeskan kpupunu pero nitu chipakgolh. ¿Niku xwilakgolh skiti? Xlakata Pedro liwana xkatsini skitinan max lakalhuwa niku xmakankgonit xredeskan. Xlakata nitu xchipanit max akxilhputun niku wilakgolh skiti chu lakaskin pi katanukgolh kred. Pero komo chuna xtilakpuwa tlakg nitlan xtimakgkatsilh. Chu ni xchipa skiti kaj xlakata xlakgati: chipa skiti xlakata tlan nakamaxki tuku maklakaskinkgo xfamilia. Alistalh nialh litsakgsalh, taspitli chu nitu chipalh chu tsuku chakga xred. Chu wa tuku xtlawama akxni lakgchilh Jesús.

 ¹² Lhuwa latamanin xtaminkgo Jesús xlakata xkgaxmatputunkgo tuku xmasiya. Xlakata latamanin lu xtalakatsuwinikgo, tawakalh kxbarco Pedro chu skinilh pi xtamakgatlilh tsinu. Anta tlakg tlan xtakgaxmatli akxni xchuwinalh. Chuna la amakgapitsi latamanin tiku wilakgolh xkilhtun pupunu, Pedro na liwana kgaxmatnima. Putum kilhtamaku xkgaxmatniputun akxni Jesús xlichuwinan xlakata xTamapakgsin Dios. ¡Lanka talakgalhaman xwa xmakgtayalh Cristo namalakgatumi uma tamakatsin nema masta takgalhkgalhin! Pero ¿tlan xlakpuwa pi tlan xmakgtayalh Jesús? ¿La xʼama tlawa xlakata xkamaxkilh xfamilia tuku xmaklakaskinkgolh? Max lakapastaka pi nitu chipalh skiti katsisni nema aku titaxtulh (Luc. 5:1-3).

13, 14. ¿Tuku tlawalh Jesús xpalakata Pedro chu tuku tlawalh Pedro?

¹³ Akxni Jesús chuwinankgolh wanilh Pedro: «Kapit ntlakg kxapulhman ktakgayawana, na namakapina mintsalhkan [o miredeskan] lakimpi machipayatit skiti». Maski ni lu xkanajla, kgalhtilh: «Makgalhtawakgana, sampi tantaskaka kskujnitaw, na ni mpala tu kchipaw; wampi wa xpalakata mpi wix nkiwanipat, nakmakan nkintsalh». Max nialh xmakaʼamputumpara xredes, xlakata aku xkachakganit, chu na xtitaxtunita hora akxni tlakg tlan xchipakan skiti. Maski chuna kgalhakgaxmatli chu max kawanilh amakgapitsi tiku xwilakgolh kʼatanu barco pi kstalanikgolh (Luc. 5:4, 5).

¹⁴ Akxni tsukukgolh maxtukgo xredes, Pedro chu xcompañeros lu tsinka makgkatsikgolh. Nila xkanajlakgo, tliwakga lhtankgolh chu ¡kaks lilakawankgolh! ¡Lhuwa skiti xchipakgonit! Tunkun kamakawanikgolh amakgapitsi skitinanin nema xwilakgolh kʼatanu barco xlakata xkamakgtayakgolh. Lhuwa skiti chipakgolh chu lakapala tatsamakgolh akgtiy barcos, chu asta xtsankgaputun xlakata lu tsinka xwanit. Pedro nila xkanajla. Maski xʼakxilhnit la xlilhuwa litliwakga kgalhi Cristo, uma milagro lu makgtaya Pedro. ¡Xya kxlakatin chixku tiku tlan xtlawa pi skiti xtanukgolh kxred! Xlakata lu xpekuanit, Pedro tatsokgostanilh Jesús chu wanilh: «Kakintapanuni. Tlati, sampi lakgalhina chixku nkit». Liwana litasiya pi Pedro xlakpuwan pi ni lakgchan natawila lakatsu niku xwi Mesías, tiku xkgalhi litliwakga nema xmaxkinit Dios (kalikgalhtawakga Lucas 5:6-9).

15. ¿Tuku tlawalh Jesús xlakata xmasiyanilh Pedro pi ni xtalakaskin napekuan?

¹⁵ Pero Jesús ni kilhnilh wata wanilh: «Ni kapikuanti. Chiyuj asta naʼan kilhtamaku, xchipana chixkuwin nawana nchu»  (Luc. 5:10, 11). Ama kilhtamaku ni xlilat xwanit ni lu xkanajlalh o xpekualh, xlakata xwanima xmakgtayanalh kʼakgtum taskujut nema ni xʼanan xtachuna. Ni xtalakaskin pi Pedro xlakpuwa la xʼama kamaxki xfamilia tuku xmaklakaskinkgo. Na ni xtalakaskin nalilakgaputsa tuku nila xtlawa o xlakata ni lakwan tayat nema xkgalhi. Tlan xlipawa pi Dios tiku kskujni Jesús «lu tapatinan» (Is. 55:7). Chu tlan xkanajlalh pi Jehová xʼama makgtaya xkgalhilh putum tuku xmaklakaskilh chu nachuna xlakata xtakanajla (Mat. 6:33).

16. ¿Tuku tlawakgolh Pedro, Santiago chu Juan akxni Jesús kawanilh pi kstalanikgolh chu tuku xlakata lu tlan tuku laksakkgolh?

¹⁶ Pedro tunkun stalanilh Jesús akxni wanilh pi kstalanina xwa chu nachuna tlawakgolh Santiago chu Juan. Biblia wan pi «tilichankgolh nkatiyatna mputakutnu, xlipaks timakgaxtakgkgolh, chuna  nchu ntistalanikgolh» (Luc. 5:11). Uma litasiya pi Pedro tlakg tlan tuku laksakli natlawa: kanajlanilh Jesús chu Dios tiku xmalakgachanit. La uku kstalaninanin Cristo na limasiyakgo uma takanajla akxni nialh pekuankgo xlakata naskujnanikgo Jehová. Na kanajlakgo pi xTlatkan xalak kʼakgapun nikxni nakamakgxtakga (Sal. 22:4, 5).

17. ¿Tuku akxilhnit Pedro uma akgtiy kata nema xtalatamanit Jesús?

¹⁷ Kaʼakxilhparaw tuku likgalhtawakgaw niku tsuku uma capítulo. Titaxtunit akgtiy kata akxni Pedro lakgapasli Jesús. Pedro chu xcompañeros limakgolh barco kpupunu xalak Galilea, katsisni chu lu palha unama. Nila katsiyaw tuku lakapastakma Pedro, pero lhuwa tuku titaxtunit nema max lakapastakma. Akxilhnit lhuwa milagros nema tlawanit Jesús. Akgtum liʼakxilhtit, akxni xputiatse o xpuwitichat tatatlalh, akxilhli la Jesús mapaksalh. Nachuna kgaxmatli tuku Jesús masiyalh kTaʼakgchuwin xalak Sipi. Xliputum tuku akxilhnit, Pedro liwana katsi pi Jesús wa Mesías, tiku Laksaknit Jehová. Xlakata titaxtunita makgapitsi papaʼ, talakgpalinit la likatsi, nialh lakapala pekuan. Lu talakgpalinit wa xlakata Jesús laksakli xlakata na xʼapóstol xwa. Maski chuna, chuntiya xtalakaskin xliskujli xlakata ni xpekualh.

18, 19. 1) ¿Tuku akxilhli Pedro kpupunu xalak Galilea? 2) ¿Tuku tlawalh Jesús akxni Pedro wi tuku skinilh?

¹⁸ Akxni xʼamaja xkgakga max liwakaya makgtutu hora tsisa. Kaj xalan Pedro akxilha pi lakgamakgat wi tuku tatsuwima. Katsiputun tuku uma, wa xlakata tayalh xlakata naʼakxilha. ¿Pi kawa kxkgakganat papaʼ nema lakgxkgakgatajuma kpupunu? Ni wa, tasiya pi wi tiku talakatsuwima. Akxni tlakg liwana akxilhkgolh, nila kanajlakgo: ¡chatum chixku tlawama kxkgalhni chuchut chu kalakgtalakatsuwima! Kstalaninanin Cristo, lu lipekuankgo, lakpuwankgo pi nitlan un. Pero xla kawani: «Kamatliwakglhkantit, sampi kit, ni kapikuantit». Wa Jesús (Mat. 14:25-28).

¹⁹ Wa xlakata, Pedro kgalhti: «Tlati, wa mpalapi wix, kalakaskinti mpi naklakganachan kxokgspun chuchut». Ni pekuan chu lu paxuwa xlakata uma milagro, na makgkatsiputun chu matliwakglhputun xtakanajla. Jesús tlawa tuku skini chu tasanilh. Pedro lakapala takuta kbarco chu tsuku tlawan kxkgalhni chuchut. ¿Tlan xlakpuwanti la makgkatsi akxni akxilha pi ni tsankga kchuchut? Lu nila kanajla, tsuku tlawan xlakata nalakgan Jesús. Pero kaj xalan wi tuku tsuku makgkatsi (kalikgalhtawakga Mateo 14:29).

20. 1) ¿Tuku nitlan tlawalh Pedro chu tuku kitaxtulh? 2) ¿Tuku wanilh Jesús Pedro?

²⁰ Akxni akxilha xtakanajla kstalanina, Jesús limaklakaskilh litliwakga nema xmaxkinit Jehová xlakata tlan xtlawalh kxkgalhni  chuchut. Xtalakaskin pi Pedro xlakaʼakxilhli Jesús, pero xlakata lu xtachayawama pupunu nialh kuenta tlawalh. Biblia wan: «Cha nchu mpi ukxilhli un, lu wa tliwakga xmima, pus pikualh». Akxni Pedro akxilha pi lu takgayawama pupunu chu lakgsnokgwilima barco lu pekuan. Max xlakpuwan pi anta nani kchuchut. Kaj lakapala, tapekua tlawa pi kxlajwanalh xtakanajla chu Pedro tiku Jesús xlimapakuwinit «Chiwix» xlakata xakxilha pi lu tliwakga xʼama tawila xtakanajla, la uku tsankgama la akgtum chiwix nema mujukan kpupunu. Maski katsini paxtawakatnan, ni xakstu lipawankan, chu tsuku wan: «Tlati, kakimalakgtaxti». Jesús tunkun makachipalh chu makutulh. Chu akxni xmakutunita, wani: «Kana tsinu wix mintakanajla, chixku. ¿Tuwan makpuwanti?» (Mat. 14:30, 31).

21. ¿Tuku xlakata lu nitlan akxni ni lu kanajlayaw chu la tlan nalakgmakganaw?

²¹ ¡Lu xlakaskinka tuku kinkamasiyaniyan uma tachuwin! Lu nitlan akxni ni tliwakga wi kintakanajlakan, xlakata uma lhuwa tuku nitlan kinkamatlawiyan. Tlan namalakgsputu kintakanajlakan chu nialh nakanajlaniyaw Dios. Wa xlakata talakaskin liwana nalakkaxwiliyaw xlakata ni napekuanaw chu tliwakga natawila kintakanajlakan. ¿La tlan chuna natlawayaw? Talakaskin liwana nalakapastakaw. Komo kaj wa nalilakpuwanaw tuku kinkamakgapekuanan, max nalixlajwananaw o natlawa pi nialh nastalaniyaw Jehová chu Cristo, chu tlakg natalhuwi tuku ni nakanajlayaw. Pero komo liwana lakaʼakxilhaw kiDioskan chu xKgawasa, xlakata putum tuku tlawanit, tuku tlawama chu tuku natlawa xpalakatakan tiku paxkikgo, tlan nalakgmakganaw tuku lakxtlawaputun kintakanajlakan.

22. ¿Tuku xlakata Pedro kinkamakgxtakgnin akgtum lu tlan liʼakxilhtit?

²² Pedro stalani Jesús akxni taju kbarco. Akxni tanu kbarco akxilha pi nialh unama. Pupunu xalak Galilea amakgtum kaks tawilapa. Pedro chu amakgapitsin kstalaninanin kanajlakgo chu wankgo: «Lu wa makgtum xlikana mpi xKam Dios wix» (Mat. 14:33). Akxni chichini tsuku taxtuyacha, max Pedro lu paxtikatsini Jesús. Uma katsisni makgtayaka xlakata nialh xpekualh chu lu xkanajlanilh Jehová chu Jesús. Pero lhuwaku tsankgani xlakata nalitaxtu tiku namatliwakglha congregación chuna la xlichuwinanit Cristo. Pero liwana xlakkaxwilinit pi xʼama liskuja. Chu akinin, ¿nachuna lakkaxwilinitaw natlawayaw? ¡Lu tlan liʼakxilhtit xlakata takanajla kinkamakgxtakgnin Pedro!