Tuku litsuku
«Chuna katlawatit la tiku kgalhikgo takanajla chu xlakata kgalhkgalhinankgo makglhtinankgo tuku wankanit namastakan.» (HEBREOS 6:12, TNM)
1, 2. ¿La xkaʼakxilha chatum superintendente viajante tiku talichuwinankgo kBiblia chu tuku xlakata lu tlan xwa komo kiʼamigoskan xwankgolh?
«LICHUWINAN tiku tilatamakgolh akxni tsokgka Biblia xtachuna la miʼamigos nema makgasa kalakgapasa.» Chuna wa chatum tala akxni aku xkgaxmatnit xtaʼakgchuwin superintendente viajante tiku lina kata. Chu xlikana tuku wan, xlakata uma tala akglhuwata kata xlikgalhtawakganit chu xmasiyanit xlakata Biblia, xlakata lakchixkuwin chu lakpuskatin nema anta xtalichuwinan xkaʼakxilha la xaxlikana xlamakgolh chu la lu xatlan xʼamigos xlitaxtukgonit.
2 ¿Ni xlikana pi lu tlan xwa pi tiku talichuwinan kBiblia kiʼamigoskan xwankgolh? ¿Chuna kaʼakxilha wix? Kalakpuwanti la xmakgkatsi komo tlan xtachuwinanti chatum, tlan xtalalipi chu tlakg tlan xkalakgapasti xlakskujnin Dios la Noé, Abrahán, Rut, Elías chu Ester. ¿La xmakgtayan kmilatamat? ¡Kaj kalakpuwanti la xlilhuwa tastakyaw xmaxkikgon chu la xmatliwakglhkgon! (Kalikgalhtawakga Proverbios 13:20.)
3. 1) ¿La nakinkamakgtayakgoyan lakchixkuwin chu lakpuskatin tiku xkgalhikgo takanajla nema talichuwinan kBiblia? 2) ¿Tuku takgalhskinin namastayaw xtakgalhtin?
3 Akxni nalakastakwanankgo tiku tlan likatsikgo, tlan nakatalalinaw (Hech. 24:15). Pero la uku, tiku xkgalhikgo takanajla nema talichuwinan kBiblia tlan nakinkamakgtayakgoyan. ¿La nakinkamakgtayakgoyan? Apóstol Pablo kinkawaniyan tuku kilitlawatkan: «Chuna katlawatit la tiku kgalhikgo takanajla chu xlakata kgalhkgalhinankgo makglhtinankgo tuku wankanit namastakan» (Heb. 6:12, TNM). Naʼakxilhaw xlakata lhuwa lakchixkuwin chu lakpuskatin tiku xkgalhikgo takanajla, pero pulana kakgalhtiw makgapitsin takgalhskinin xlakata tuku lichuwinalh Pablo: ¿Tuku wamputun takanajla chu tuku xlakata maklakaskinaw? ¿Chu la tlan natlawayaw la xlakskujnin Dios xalamakgasa?
¿Tuku wamputun takanajla chu tuku xlakata maklakaskinaw?
4. ¿Tuku lakpuwankgokan xlakata takanajla chu tuku xlakata nitlan tuku lakpuwankgo?
4 Takanajla lu stlan tayat, akgtum tayat nema lu xlakaskinka xʼakxilhkgo lakchixkuwin chu lakpuskatin tiku talichuwinankgo kBiblia nema nakalichuwinanaw kʼuma libro. Pero la uku lhuwa tiku nitu liʼakxilhkgo. Lakpuwankgo pi ni anan niku takilhti o tuku limasiya pi xlikana tuku kanajlakan. Pero ¿xlikana tuku wankgo? Ni, xaxlikana takanajla ni kaj kilhchanima tuku makgkatsiyaw o akxni ni liwana kanajlaniyaw Dios. Tuku makgkatsiyaw kinkaʼakgskgawiyan, chu kaj lakapala talakgpali. Ni kaj talakaskin nakanajlaniyaw Dios, xlakata Biblia wan pi asta «na kanajlakgoy akgskgawinanin, wampi lilhpipikgoy» (Sant. 2:19).
5, 6. 1) ¿Tuku pulaktiy nema nila akxilhaw takilhti kintakanajlakan? 2) ¿Tuku liʼakxilhtit limasiya pi tliwakga xlitawilat kintakanajlakan?
5 Xaxlikana takanajla tlakg lhuwa tuku kilhchani. Kaʼakxilhwi tuku wan Biblia xlakata uma lu tlan tayat (kalikgalhtawakga Hebreos 11:1). Pablo lichuwinalh pi takanajla pulaktiy tuku kilhchani nema nila akxilhaw. Pulana lichuwinan tuku xlikana anan maski «ni ukxilhmaw»: kilakgastapukan nila akxilha Jehová, xKgawasa chu xTamapakgsin nema mapakgsinamaja kʼakgapun. Takanajla na kilhchanima «wantu kgalhkgalhimaw»: tuku nina a kgantaxtu. Akgtum liʼakxilhtit, nila akxilhaw xasasti kakilhtamaku nema nialh makgas nalimin xTamapakgsin Dios. Pero ¿wamputun pi nila nakanajlayaw uma tuku xlikana nala nema kgalhkgalhimaw?
6 Ni. Apóstol Pablo kinkawaniyan pi takanajla wi niku liwana takilhtinit. Akxni wa pi takanajla «xlikana wi» o tuku limasiya pi xlikana, limaklakaskilh akgtum tachuwin nema na wamputun akgtum «escritura». Kalakpuwaw pi wi tiku maskiwiputunan akgtum chiki. Max namaxkiyan escritura chu nawaniyan: «Kmakamaxkiyan xasasti minchik». Akgatekgsa pi ni waniman pi natawilaya kʼuma kapsnat, pero uma escritura limasiya pi chiki mila, tlan nawanaw pi uma kapsnat kilhchanima minchik. Nachuna, kintakanajlakan tlawa pi putum tuku Dios wan natlawa kxTachuwin nakgantaxtu.
7. ¿Tuku kilhchanima xaxlikana takanajla?
7 Wa xlakata, xaxlikana takanajla kilhchanima liwana nakanajlayaw, lu nalipawanaw Jehová. Akxni chuna kgalhiyaw kintakanajlakan, akxilhaw Dios la kinTlatkan tiku kinkapaxkiyan chu liwana kanajlayaw pi namakgantaxti putum tuku wanit natlawa. Pero ni kaj wa uma talakaskin. Chuna la tiku staknankgo, takanajla na talakaskin namatliwakglhaw. Chu wi tuku natlawayaw xlakata nalimasiyayaw, komo nichuna natlawayaw nasputa (Sant. 2:26).
8. ¿Tuku xlakata lu xlakaskinka takanajla?
8 ¿Tuku xlakata lu xlakaskina takanajla? Apóstol Pablo kinkawaniyan tuku xlakata lu xlakaskinka (kalikgalhtawakga Hebreos 11:6). Komo ni kanajlayaw nila talakatsuwiniyaw Jehová chu nila makgapaxuwayaw. Wa xlakata xlakaskinka namakgantaxtiyaw xtalakaskin nema ni anan xtachuna: natalakatsuwiniyaw Jehová, kinTlatkan xalak akgapun chu namalankiyaw.
9. ¿La limasiyanit Jehová pi katsi pi maklakaskinaw takanajla?
9 Jehová katsi pi lu maklakaskinaw takanajla, chu wa xlakata kinkamaxkin xliʼakxilhtit latamanin tiku xlikana latamakgolh xlakata nakinkamasiyaniyan la tlan nakgalhiyaw chu nalimasiyayaw. Nachuna, tiku pulalinkgo congregación kinkamaxkikgoyan lu tlan liʼakxilhtit, wa xlakata Biblia kinkawaniyan: «Na kakgalhitit xtakanajlakan» (Heb. 13:7). Pablo na lichuwinalh «lhuwa kxlakskujnin Dios», xlichuwinama xlakskujnin Dios xalamakgasa tiku limasiyakgolh lhuwa takanajla (Heb. 12:1, TNM). Apóstol kalichuwinalh makgapitsi kcapítulo 11 xla Hebreos, pero lhuwaku anankgo. Anta kBiblia talichuwinan lhuwa lakchixkuwin chu lakpuskatin tiku tanu tanu kata xkgalhikgo chu tanu tanu tuku titaxtukgolh. La uku, niku lhuwa ni kanajlanikgo Dios, lu nakinkamakgtayayan naʼakxilhaw xliʼakxilhtitkan.
¿La tlan nakgalhiyaw xtakanajlakan?
10. ¿La tlan nakinkamakgtayayan akxni kiakstukan kgalhtawakgayaw xlakata na nakgalhiyaw kintakanajlakan la lakchixkuwin chu lakpuskatin tiku talichuwinan kBiblia?
10 Talakaskin liwana naʼakxilhaw tuku tlawa chatum xlakata na chuna natlawayaw. Wa xlakata akxni lakkaxwilika uma libro, liwana lakputsananka xlakata xtachuna la tlan nakaʼakxilha lakchixkuwin chu lakpuskatin tiku xkgalhikgo takanajla nema unu talichuwinan. Pero wix na tlan tlakg nalakputsananiya klibros xlakata tiku kalichuwinankan unu. Akxni miʼakstu nakgalhtawakgaya, kalimaklakaskinti likgalhtawakga nema kgalhiya. Na kalilakapastakti tuku nalikgalhtawakgaya, na katlawa la akxilhpat niku wilakgolh chu tuku titaxtumakgolh tiku talichuwinan. Kalakpuwanti pi anta wila, la kawan, la takgankgawanan chu kakgaxpatti tuku lama. Chu tuku xlakaskinka, kakatsi tuku makgkatsikgo chu tuku lakpuwankgo tiku talichuwinama. Komo chuna natlawaya, uma xlakskujnin Dios tiku ni xmakgxtakgkgo nema makgasa latamakgolh, tlakg xlikana naʼakxilha xtakanajlakan. ¡Lu liwana nakalakgapasa chu la miʼamigos nawankgo!
11, 12. 1) ¿Tuku kilitlawatkan xlakata namakgkatsiyaw pi tlakg tlan katalalinaw Abrahán chu Sara? 2) ¿La tlan nakinkamakgtayakgoyan xliʼakxilhtit Ana, Elías chu Samuel?
11 Akxni tlakg nakatsiniya xlakata umakgolh tiku talichuwinan kBiblia, nachuna natlawaputuna. Kaʼakxilhwi la nakinkamakgtayakgoyan tuku titaxtukgolh. Kalakpuwanti pi xkachikin Jehová maxkiyan talakaskin pi tlakg kaskujni. Max nawaniyan kapit niku tlakg talakaskin tiku lichuwinankgo Dios, o max naskiniyan nalichuwinana Dios pero tuwa makgkatsiya chu lipekuana la wanika natlawaya. Akxni nalilakapastaka uma tuku aku lakgayawaka chu natlawaniya oración Jehová, max lu namakgtayayan nalilakapastaka xliʼakxilhtit Abrahán. Abrahán chu Sara makgxtakgkgolh tuku tlan xkgalhikgo kkachikin, Ur chu wa xlakata lhuwa tasikulunalin makglhtinankgolh. Akxni nachuna natlawaya, namakgkatsiya pi tlakg tlan katalalipina.
12 Na kalakpuwanti uma. Chatum tiku tlan talalipina nitlan likatsinin, chu nitlan limakgkatsiya asta nialh pimputuna ktamakxtumit. Komo chuna titaxtupat max namakgtayayan nalilakapastaka Ana, tiku ni mastalh talakaskin pi taʼakglhuwit nema xtakgalhi Peniná, xtlawalh pi nialh xkakninanilh Jehová. Xliʼakxilhtit namakgtayayan nalaksaka tuku tlan, chu tuku talichuwinan xlakata Ana tlakg xlikana naʼakxilha. Nachuna, komo kgalhiya nitlan talakapastakni chu lakpuwana pi nitu litaxtu tuku tlawaya, max namakgtayayan xliʼakxilhtit Elías. Akxni nalikgalhtawakgaya naʼakxilha pi titaxtulh lhuwa taʼakglhuwit, pero Jehová matliwakglhli. ¿Chu tuku nakamakgtaya lakgkgawasan tiku xcompañeros kamatlawiputunkgo talakgxtumit xalimaxana? Nakamakgtaya xliʼakxilhtit Samuel, tiku ni tlawalh tuku nitlan maski xkamanan Elí nitlan tuku xtlawakgo ktabernáculo.
13. Akxni lhkaxtuyaw xtakanajla chatum tiku talichuwinan kBiblia, ¿wamputun pi ni lu xaxlikana kintakanajlakan? Kawanti tuku xlakata.
13 ¿Wamputun pi ni lu xaxlikana kintakanajlakan xlakata kaj tlawamaw la tlawakgolh amakgapitsin? ¡Ni chuna! Anta kxTachuwin Dios kinkawaniyan pi katlawaw chuna la tlawakgolh (1 Cor. 4:16; 11:1; 2 Tes. 3:7, 9). Chu makgapitsi tiku nakalichuwinanaw kʼuma libro na tlawakgolh tuku tlawakgolh atanu xlakskujnin Dios tiku pulana latamakgolh. Akgtum liʼakxilhtit, kcapítulo 17 xla uma libro naʼakxilhaw pi María lichuwinalh oración nema xtlawanit Ana, uma limasiya pi xtlawa chuna la Ana. ¿Xtlawa uma pi ni lu xaxlikana xwa xtakanajla? Ni. Xliʼakxilhtit Ana makgtayalh María tlakg xlipawa Jehová chu xliskujli xlakata Dios tlan xakxilhli.
14, 15. ¿Tuku limin uma libro chu la tlakg tlan nalitamakgtayayaw?
14 Uma libro tlawakanit xlakata namatliwakglha kintakanajlakan. Capítulos nema liminkgo wa artículos nema taxtukgolh krevista Makatsinina, nema kawanikan: «Tlan liʼakxilhtit xtakanajlakan». Pero na wi atanu tuku na talichuwinan. Limin takgalhskinin xlakata nakinkamakgtayayan nakatsiyaw tuku lichuwinan akgatunu capítulo chu la nakinkamakgtayayan. Nachuna, uma libro limin lakswan dibujos chu lhuwa tuku masiya, na kalakgpalikanit chu kamalankikanit makgapitsi dibujos nema xwilakgolha. Uma libro na limin makgapitsi tuku nalikatsiyaw kata akxni lalh tuku talichuwinan chu akgtiy mapa. Uma libro Tlan liʼakxilhtit xtakanajlakan tlan miʼakstu nalikgalhtawakgaya o kcongregación. Na tlan nalimaklakaskinkgo familias. ¡Tlan pixlanka likgalhtawakgayatit! ¡Chu chuna lu nalipaxuwatit!
15 Xlikana, uma libro nakinkamakgtayayan xlakata na natlawayaw la tlawakgolh xlakskujnin Dios xalamakgasa. Akxni nalikgalhtawakgayaw, tlakg natatliwakglha kintakanajlakan chu tlakg natalakatsuwiniyaw kinTlatkan xalak akgapun, Jehová.
