Dios lakaskin pi xatapaxuwan kalatamaw xliputum kilhtamaku kparaíso chu nialh nakgalhiyaw ta’akglhuwit.

Pero max nalakpuwana: «¿La chuna nakgantaxtu?». Biblia wan pi xTamapakgsin Dios chuna natlawa. Dios lakaskin pi putum latamanin kakatsinikgolh xlakata uma Tamapakgsin chu tuku lakpuwanit natlawa xpalakata latamanin (Salmo 37:11, 29; Isaías 9:7).

Dios lakaskin pi tlan natawilayaw.

Chuna la chatum tlat kamaxkiputun tuku lu tlan xkamanan, nachuna kinTlatkan xalak akgapun lakaskin pi putum kilhtamaku xatapaxuwan katawilaw (Isaías 48:17, 18). Wanit pi «nti ntlawa xtalakaskin Dios, [putum kilhtamaku] nalatama» (1 Juan 2:17).

Dios lakaskin natlawayaw xtalakaskin.

Biblia masiya pi kiMalakatsukinakan «nakinkamasiyaniyan xtiji» xlakata anta «nalatamayaw» (Isaías 2:2, 3). Xla kaxwilinit akgtum kachikin xlakata «naliyankgoy xtukuwini» chu namakatsininankgo xtalakaskin xlikalanka kKatiyatni (Hechos 15:14).

Dios lakaskin pi makxtum nakakninaniyaw.

Xaxlikana takanajla ni kamapapitsi latamanin wata tlawa pi nalapaxkikgo (Juan 13:35). ¿Tiku kamasiyani lakchixkuwin chu lakpuskatin xlikalanka Katiyatni xlakata makxtum naskujnanikgo Dios? Kkawaniyan pi kalikgalhtawakga uma folleto xlakata natekgsa xtakgalhtin.