1. Akxni kstalaninanin Cristo tamakxtumikgolh, ¿tuku tamakgtay makglhtinankgolh chu tuku xlakata xmaklakaskinkgo?

 AKXNI aku xlakastakwananit Jesús, kstalaninanin tamakxtumikgolh xlakata nalamatliwakglhkgo, pero xtalakgchuwatanukgonit xlakata xkapekuanikgo tiku ni xkaʼakxilhputunkgo. Xtapekuakan tapanulh akxni Jesús katasiyanilh chu kawanilh: «¡Kamakgamakglhtinantit spiritu Santo!» (kalikgalhtawakga Juan 20:19-22). Alistalh tamakxtumiparakgolh chu Jehová kamaxkilh espíritu santo, nema kamatliwakglhli xlakata tlan xlichuwinankgolh Dios (Hech. 2:1-7).

2. 1) ¿La kinkamatliwakglhan Jehová chu tuku xlakata maklakaskinaw? 2) ¿Tuku xlakata lu xlakaskinka kakninanikan Dios kfamilia? (Kaʼakxilhti nota chu recuadro « Kakninanikan Dios kFamilia», kpágina 175.)

² Akinin kgalhiyaw lhuwa taʼakglhuwit chuna la titaxtukgolh kinatalankan kxapulana siglo (1 Ped. 5:9). Chu min kilhtamaku kapekuaniyaw latamanin; nachuna lakaskinaw litliwakga nema Jehová kinkamaxkiyan xlakata chuntiyaku nalichuwinanaw xtukuwani (Efes. 6:10). Jehová kinkalimatliwakglhan tamakxtumit. La uku tlan anaw akgatunu semana akgtiy tamakxtumit niku lu kinkamasiyanikanan: Niku mastakan Taʼakgchuwin, Takgalhtawakga xla Makatsinina, chu tamakxtumit kxitat seamana wanikan Xlatamat chu xtaskujut kstalanina Cristo. a Na lipaxuwayaw makgapitsi tamakxtumit nema tatlawa akgatunu kata: asamblea regional, akgtiy asambleas de circuito, chu akxni lakapastakkan akxni tinilh Cristo. ¿Tuku xlakata lu xlakaskinka naʼanaw ktamakxtumit? ¿La lakatsukulh kintamakxtumitkan nema kgalhiyaw la uku? Chu ¿tuku limasiyayaw chuna la kaʼakxilhaw kintamakxtumitkan?

3, 4. ¿Tuku lakaskin Jehová katlawakgolh xkachikin? Kalichuwinanti makgapitsi liʼakxilhtit.

³ Jehová makgasa kaskini pi xkachikin katamakxtumikgolh xlakata nakakninanikgo. Akgtum liʼakxilhtit, kata 1513 akxni nina xmin Jesús, kamaxkilh limapakgsin kachikin Israel, chu xwan pi akgatunu sábado familia tlan xkakninanikgolh chu xkalimasiyanika Limapakgsin (Deut. 5:12; 6:4-9). Akxni israelitas xmakgantaxtikgo uma limapakgsin, familias tliwakga xtawilakgo chu nachuna kachikin chu putum tliwakga xtawila xtakanajlakan chu nitu xlixkajwanankgo. Akxni kachikin ni  xmakgantaxtikgo Limapakgsin, chu ni xtamakxtumikgo xlakata nakakninanikgo Jehová, xkamakgxtakga (Lev. 10:11; 26:31-35; 2 Crón. 36:20, 21).

⁴ Na kalichuwinaw liʼakxilhtit nema kinkamakgxtakgnin Jesús. Jesús xlismaninit xʼan ksinagoga akgatunu semana ksábado (Luc. 4:16). Akxni Jesús makgnika chu lakastakwanalh, kstalaninanin chuntiya tamakxtumikgolh chuna la xlismanikgonit maski nialh wa kstalanikgo limapakgsin xla sábado (Hech. 1:6, 12-14; 2:1-4; Rom. 14:5; Col. 2:13, 14). Kʼama tamakxtumit nema xtatlawa kxapulana siglo ni kaj wi tuku xkamasiyanikan o xkamatliwakglhkan wata na xlimalankikgo Jehová xʼoracioneskan, xcomentarioskan chu xtatlinkan (Col. 3:16; Heb. 13:15).

5. ¿Tuku xlakata anaw ktamakxtumit akgatunu semana chu klaklanka tamakxtumit akgatunu kata? (Kaʼakxilhti recuadro « Laklanka tamakxtumit makxtum katlawa xkachikin Dios».)

⁵ Chuna la xlakan, akxni anaw akgatunu semana kkintamakxtumitkan chu klaklanka tamakxtumit limasiyayaw pi tatayayaw xTamapakgsin Dios, makglhtinanaw xlitliwakga espíritu santo, chu kamatliwakglhaw amakgapitsin akxni lichuwinanaw kintakanajlakan. Chu tuku tlakg xlakaskinka, tlan likakninaniyaw Jehová kiʼoracioneskan, kintakgalhtinkan chu kintakilhtlinkan. Chuna la tlawakan kintamakxtumitkan ni xtachuna la akxni xtamakxtumikgo israelitas o kstalaninanin Cristo kxapulana siglo, pero na chuna xlilakaskinka. ¿La tsukuka lakkaxwilikan kintamakxtumitkan?

6, 7. 1) ¿Tuku xlakata tamakxtumiyaw? 2) ¿La tanu tanu xtlawakgo tamakxtumit akgatunu grupo?

⁶ Akxni tala Charles Taze Russell tsukulh putsa tuku xaxlikana kxTachuwin Dios, akxilhli pi xtalakaskin nakatatamakxtumi tiku na watiya tuku xputsamakgolh. Kkata 1879, tsokgli:  «Kkatatamakxtuminit amakgapitsi xalak Pittsburgh, xlakata naklakkaxwiliyaw chu naklikgalhtawakgayaw Biblia akgatunu domingo». Tiku xlikgalhtawakgakgo revista Watch Tower kawanika pi xtamakxtumikgolh chu kkata 1881, xtatlawama tamakxtumit Pittsburgh (Pensilvania, Estados Unidos), akgatunu domingo chu miércoles. Revista Watch Tower noviembre kkata 1895 wa pi xtamakxtumikgo xlakata tlakg «tlan xlatalalilh kstalaninanin Cristo, xlapaxkilh» chu tiku xʼankgolh tlan xlamatliwakglhkgolh (kalikgalhtawakga Hebreos 10:24, 25).

⁷ Akglhuwa kata, lhuwa grupos xla xLikgalhtawakgananin Biblia tanu tanu xtalakkaxwilinit la xtlawakgo tamakxtumit chu la xlimakglhuwa. Akgtum liʼakxilhtit, maktum carta nema malakgachalh akgtum grupo xalak Estados Unidos nema maxtuka kkata 1911 xwan: «Ktamakxtumiyaw makgkitsis akgatunu semana». Xtamakxtumikgo lunes, miércoles, viernes chu domingo makgtiy. Atanu carta xalak África, nema maxtuka kkata 1914 xwan: «Kgalhiyaw tamakxtumit makgtiy akgatunu papaʼ, litsukuyaw viernes chu xaʼawatiya ktlawayaw domingo». Pero alistalh lakkaxwilika la xʼama tatlawa kintamakxtumitkan. Kaj tsinu kalichuwinaw la xtatlawa akgatunu tamakxtumit.

8. ¿Tuku temas xtalichuwinan kxapulana taʼakgchuwin nema tamastalh?

⁸ Niku mastakan Taʼakgchuwin. Kkata 1880 akxni xtitaxtunita akgtum kata lata akxni Russell tsukulh maxtu revista Watch Tower, tsukulh stalani xliʼakxilhtit Jesús chu tsukulh lichuwinan Dios (Luc. 4:43). Akxni chuna xtlawama, tala Russell lakkaxwililh la xʼama tatlawa kintamakxtumitkan Niku Mastakan Taʼakgchuwin. Akxni xlichuwinan niku xʼama an, revista Watch Tower, xwan pi Russell «xatapaxuwan namasta taʼakgchuwin “Xlakata xTamapakgsin Dios”». Kkata 1911, akxni talakkaxwililh clases o congregaciones, klhuwa países, akgatunu clases kawanika pi xmalakgachakgolh chatum tiku tlan xʼakgchuwinalh anta lakatsu xlakata xmastakgolh akgchaxan taʼakgchuwin niku xlichuwinankgolh akxni nalakputsananinankan chu talakgmaxtut. Akxni xmasputukan akgtum taʼakgchuwin, xwankan tiku naʼakgchuwinan atanu semana chu tuku naliʼakgchuwinan.

9. ¿La talakgpalitilhanit tamakxtumit Niku Mastakan Taʼakgchuwin chuna la titaxtutilhanit kata chu la namakgtayananaw kʼuma tamakxtumit?

⁹ Kkata 1945, revista The Watchtower lichuwinalh pi xlikalanka katiyatni xʼama tsuku Niku Mastakan Taʼakgchuwin chu xʼamaka mastakan pulaktsayan taʼakgchuwin xlakata Biblia niku xʼamaka lichuwinankan «laklanka taʼakglhuwit xla kinkilhtamakujkan». Akglhuwa kata, tiku xmastakgo taʼakgchuwin ni kaj xlimaklakaskinkgo bosquejos nema xkamaxki skujni xalipaw, na xlimaklakaskinkgo nema xakstukan xtlawakgo. Pero kkata 1981, putum taʼakgchuwin xtakilhtikgo kbosquejos nema xkamaxkikan kcongregación. b Asta kata 1990, makgapitsi bosquejos xkaskini pi xkgalhtinankgolh tiku na anta xwilakgo chu xmastakgo makgapitsi liʼakxilhtit; pero watiya uma kata lakgpalika, chu wanka pi kaj taʼakgchuwin xʼama wan. Alistalh,  enero 2008 wi atanu tuku talakgpalilh, taʼakgchuwin nialh xʼama makgapala tipuxamakitsis minutos wata puxamakaw minutos. Maski talakgpalinit la tamasta taʼakgchuwin, taʼakgchuwin nema liwana lakkaxwilikan chuntiyaku tlawa pi nakanajlanikan xTachuwin Dios chu pulaklhuwa tuku kinkamasiyaniyan xlakata xTamapakgsin Dios (1 Tim. 4:13, 16). ¿Xatapaxuwan kawaniya tiku kalakgapaxialhnana chu tiku ni xtatayananin Jehová nakgaxmatkgo uma lu xlakaskinka taʼakgchuwin nema takilhtinit kBiblia?

10-12. 1) ¿Tuku talakgpalinit xlakata la xtatlawa Takgalhtawakga xla Makatsinina? 2) ¿Tukuya takgalhskinin kilitlawatkan?

¹⁰ Takgalhtawakga xla Makatsinina. Kkata 1922, natalan tiku xkalilakgapaskan peregrinos, tiku xkamalakgacha Sociedad Watch Tower xmastakgo taʼakgchuwin kcongregaciones chu xpulalinkgo natalichuwinan Dios, wankgolh pi akgatunu semana xkgalhikgolh tamakxtumit niku xlikgalhtawakgakgolh revista Makatsinina. Tsukukgolh tlawakgo tuku kawanika, chu xapulana, xlikgalhtawakgakgo Makatsinina kxitat semana o domingo.

¹¹ Kilhtamaku 15 xla junio kata 1932, revista The Watchtower tlakg lichuwinalh la xʼama tamatitaxti uma tamakxtumit. Tsukukgolh tlawakgo la xtatlawa kBetel, artículo xwan pi chatum tala xʼama pulalin tamakxtumit. Chatutu natalan tlan xtawilakgolh klakatin chu chatunu chatunu xlikgalhtawakga párrafo chuna la xlakgchantilha. Ama kilhtamaku artículos ni xkgalhikgo takgalhskinin, wa xlakata tiku xpulalin tamakxtumit xkawani tiku anta xwilakgolh pi xtlawakgolh takgalhskinin xlakata artículo chu amakgapitsi xkgalhtinankgolh. Pero xtalakaskin wi tuku tlakg tlan xtakatsilh, tiku xpulalima uma tamakxtumit kawanika «pi ni lhuwa» tuku xwankgolh.

¹² Pulana, akgatunu congregación kamaxkika talakaskin nalaksakkgo tukuya artículo xla revista xlikgalhtawakgaputunkgo.  Pero revista The Watchtower 15 xla abril kata 1933 (kxaʼespañol, La Torre del Vigía xla agosto kata 1933) wa pi putum congregaciones watiya artículo xmaklakaskinkgolh. Kkata 1937 wanka pi uma takgalhtawakga xʼama tamatitaxti domingo. Chu tuku tlakg wanka xlakata la xʼama tatlawa tamakxtumit nema asta la uku chuna tatlawa taxtulh krevista The Watchtower 1 xla octubre kata 1942. Xapulana, revista wa pi artículos nema xʼama talikgalhtawakga xʼama limin takgalhskinin niku wilakgolh párrafos chu wa xʼama tamaklakaskin. Alistalh wa pi uma tamakxtumit xʼama makgapala akgtum hora. Chu na kawanika pi «kxtachuwinkan» xmastakgolh xtakgalhtinkan chu ni kaj xlikgalhtawakgaparakgolh párrafo. Tamakxtumit xla Makatsinina chuntiyaku litaxtu tuku tlakg xlakaskinka nema skujni xalipaw kinkalimaxkiyan kxkilhtamaku tuku maklakaskinaw xla takanajla (Mat. 24:45). Kinchatunukan kilitlawatkan uma takgalhskinin: «¿Liwana klakkaxwili revista Makatsinina nema likgalhtawakgakan akgatunu semana? ¿Kmasta kintakgalhtin komo kmatlani?».

13, 14. ¿La xtatlawa Takgalhtawakga nema takilhtinit kBiblia kCongregación chu tuku xlakata lakgatiya uma tamakxtumit?

¹³ Takgalhtawakga nema takilhtinit kBiblia kCongregación. Kxitat década 1890 akxni aku xtaxtunit volúmenes xla libro Millennial Dawn (Xkilhtsukut akgtum Mil kata), tala H. N. Rahn, chatum xLikgalhtawakgana Biblia nema xlama kBaltimore (Maryland, Estados Unidos), wa pi xlikgalhtawakgakgolh Biblia nema xlilakgapaskan Círculos xla Kilhtsukut. Umakgolh tamakxtumit xtlawakgo kmakgapitsi chiki xlakata aku xliʼakxilhmaka. Pero kkata 1895, Círculos xla Kilhtsukut tsukuka tlawakan klakalhuwa kachikinin xalak Estados Unidos. Revista Watch Tower watiya uma papaʼ kawanilh putum tiku xputsamakgolh xaxlikana xkgalhikgolh uma tamakxtumit. Wa pi tiku xpulalilh uma tamakxtumit lu tlan xkgalhtawakgalh. Xlikgalhtawakgalh makgapitsi oraciones chu xkgalhkgalhilh wi tiku xkgalhtinalh; akxni xlikgalhtawakgakgolh, xputsalh chu xlikgalhtawakgalh texto nema anta xwilakgolh. Akxni xmasputukgo akgatunu capítulo, chatunu tiku xʼankgo xwankgolh tuku xkatsinikgonit.

¹⁴ Xtukuwani uma tamakxtumit makglhuwa talakgpalilh. Lilakgapaska Círculo Bereano xlakata Natalikgalhtawakga Biblia chuna xwanikan xlakata Bereanos xla xapulana siglo liwana lakputsananikgolh Biblia (Hech. 17:11). Alistalh lakgpalinika xtukuwani chu wanika Niku Talikgalhtawakga maktum Libro. La uku wanikan Takgalhtawakga nema takilhtinit kBiblia kCongregación chu putum natalan tamakxtumikgo kPukgalhtawakga chu nialh tamakxtumikgo kʼakgatunu chiki. Chuna la titaxtukgonit kata, talimaklakaskinit maklhuwa libros, folletos asta artículos xla revista Makatsinina. Lata xapulana, putum tiku ankgo kʼuma tamakxtumit kawanikan kamastakgolh xtakgalhtinkan. Umakgolh tamakxtumit kinkamakgtayanitan  tlakg nakatsiniyaw xlakata Biblia. ¿Liwana lakkaxwiliya chu mastaya mintakgalhtin chuna la matlaniya?

15. ¿Tuku xlakata lakkaxwilika Niku Masiyakan xlakata la Lichuwinankan Dios?

¹⁵ Niku Masiyakan xlakata la Lichuwinankan Dios. Carey Barber, tiku kskuja niku pulalinkan xtaskujut xtatayananin Jehová xlikalanka katiyatni kBrooklyn (Nueva York) lakapastaka: «Lunes katsisni, 16 xla febrero kata 1942, putum lakchixkuwin xalak Betel kawanika pi xtatsokgtawilakgolh nema la uku talilakgapasa Niku Masiyakan xlakata la Lichuwinankan Dios». Tala Barber, tiku alistalh litaxtulh Lakgkgolotsin tiku Pulalinkgo xTatayananin Jehová wa pi escuela «tuku tlakg xlakaskinka kamaxkilh Jehová xkachikin la uku». Uma escuela lu tlan kitaxtulh xlakata kamakgtayalh natalan tlakg tlan namasiyakgo chu nalichuwinankgo Dios nema tsukulh kkata 1943, folleto Curso en el Ministerio Teocrático tsinu tsinu kgalhikgolh putum congregaciones klakgatum kKatiyatni. Revista La Atalaya 15 xla octubre kata 1943, wa pi Niku Masiyakan xlakata la Lichuwinankan  Dios lakkaxwilika xlakata xkamakgtayalh xkachikin Dios «tlakg liwana xmakatsininankgolh akxni xlichuwinankgolh Tamapakgsin» (2 Tim. 2:15).

16, 17. Niku Masiyakan xlakata la Lichuwinankan Dios, ¿kaj xkatsiniyaw naʼakgchuwinanaw? Kawanti tuku xlakata chuna wana.

¹⁶ Xapulana, lhuwa akxilhkgolh pi tuwa xwanit mastakan takgalhchuwin kxlakatin lhuwa latamanin. Clayton Woodworth, xakgawasa, tiku xtlat na tatamaknuka kpulachin maski nitu xtlawanit tala Rutherford chu amakgapitsin natalan kkata 1918, lakapastaka la makgkatsilh akxni xlipulana mastalh taʼakgchuwin kkata 1943. Tala Woodworth wan: «Lu tuwa xwanit mastakan taʼakgchuwin, xakmakgkatsi pi kisimakgat xtalakgchi, kinkilhni kskaka, akxni xakchuwinan lixkajni xtakgaxmata». Chuna la tala Clayton tlakg katsinilh masta taʼakgchuwin tlakg maxkika taʼakgchuwin. Escuela ni kaj masiyanilh la tlan xmastalh taʼakgchuwin. Masiyanilh pi lu xlakaskinka taʼaktujukan chu la xlilakaskinka lipawankan Jehová. Xla wan: «Kkatsilh pi tiku akgchuwinan ni wa tiku xlakaskinka. Pero  xlakaskinka liwana nalakkaxwili chu nalipawan Jehová. Komo chuna tlawa, xatapaxuwan nakgaxmatnikan chu wi tuku nakatsinikgo».

¹⁷ Kkata 1959, natalan lakpuskatin na kawanika pi xtatsokgtawilakgolh kʼuma escuela. Tala Edna Bauer lakapastaka akxni mastaka uma tamakatsin klanka tamakxtumit niku xkilanit. Xla wan: «Klakapastaka la natalan lakpuskatin lu lipaxuwakgolh. La uku lhuwa tuku tlan xtlawakgolh». Akglhuwa kata, lhuwa natalan lakchixkuwin chu lakpuskatin litamakgtayakgonit Niku Masiyakan xlakata la Lichuwinankan Dios chu Jehová kamasiyaninit. La uku, chuntiya kinkamasiyanikanan ktamakxtumit nema kgalhiyaw kxitat semana (Kalikgalhtawakga Isaías 54:13.)

18, 19. 1) ¿La kinkamasiyanikanan xlakata liwana nalichuwinanaw Dios? 2) ¿Tuku xlakata kilhtliyaw kkintamakxtumitkan? (Kaʼakxilhti recuadro « Likilhtlikan xaxlikana».)

¹⁸ Tamakxtumit xlakata xTaskujut Dios. Akxni xtsukunita kata 1919, xtlawakan tamakxtumit xlakata natalichuwinan Dios. Ni paks natalan xʼankgo kʼuma tamakxtumit, kajwatiya tiku xmaʼakgpitsikgo likgalhtawakga. Kkata 1923 tsukulh tatlawa makgtum akgatunu papaʼ tamakxtumit xlakata xtaskujut Dios, chu putum xalak congregación xliʼanatkan. Kkata 1928 kawanika congregaciones pi xkgalhikgolh Tamakxtumit xlakata xTaskujut Dios akgatunu semana, chu kkata 1935, revista The Watchtower kawanilh putum congregaciones pi Tamakxtumit xlakata xTaskujut Dios xtakilhtikgolh klikgalhtawakga nema wanikan Director (nema alistalh lilakgapaska Informador chu alistalh, La Natlawayaw xTaskujut Dios). Kaj lakapala uma tamakxtumit makgtayanalh xlakata na xkamasiyanika natalan.

¹⁹ La uku kinkamaxkikanan ktamakxtumit nema kgalhiyaw kxitat semana, lakwan tastakyaw nema kinkamakgtayayan nalichuwinanaw Dios (Mat. 10:5-13). Komo makgatsiya tuku taskin chu maxkikana maktum likgalhtawakga Xlatamat chu xtaskujut kstalanina Cristo, Tuku natalikgalhtawakga, ¿likgalhtawakgaya chu tlawaya tastakyaw nema limin akxni lichuwinana Dios?

20-22. 1) ¿Tuku xlakata lakapastakaw akxni tinilh Cristo? 2) ¿La litamakgtayaya akxni pina akgatunu kata akxni talakapastaka akxni tinilh Cristo?

²⁰ Kstalaninanin Jesús kawanika pi xlilakapastakkgolh kilhtamaku akxni nilh asta akxni xchilh. Chuna la xtatlawa Pascua, kaj makgtum akgatunu kata xlitalakapastakat akxni nilh Jesús (1 Cor. 11:23-26). Akgatunu kata lhuwa millones ankgo kʼuma tamakxtumit. Tiku kalaksakkanit kamalakapastaka talakgalhaman nema kgalhikgo, pi na mapakgsinankgo kTamapakgsin (Rom. 8:17). Chu atanu borregos tlawa pi lu namaxkikgo kakni chu natatayakgo Mapakgsina xla xTamapakgsin Dios (Juan 10:16).

²¹ Tala Russell chu tiku xtaskujkgo xʼakxilhkgo pi lu xlakaskinka nalilakapastakkgo Taway xla kiMalanakan chu xkatsikgo pi kaj makgtum xlitatlawat akgatunu kata. Abril kata 1880 artículo xla Watch Tower xwan: «Akglhuwata kata lismaninitaw pi unu kPittsburgh [...] lilakapastakaw Pascua [akxni tinilh Cristo] chu wayaw liʼakxilhtit xla xmakni chu xkgalhni kiMalanakan».  Ni makgas kilhtamaku tlawaka klaklanka tamakxtumit akxni xtalakapastaka akxni nilh Cristo. Xapulana tamakxtumit nema tsokgwilikanit tatlawalh kkata 1889, kilakgolh 225 chu tamunukgolh 22.

²² La uku, nialh lilakapastakaw akxni tinilh Cristo akxni kgalhiyaw laklanka tamakxtumit, pero kawaniyaw putum xalak kinkachikinkan xlakata naʼankgo kPukgalhtawakga xla xTatayananin Jehová o chiki niku rentarliyaw. Kkata 2013 liwaka 19 millón kilakgolh akxni talakapastakli akxni tinilh Cristo. Kgalhiyaw lanka talakgalhaman: naʼanaw akxni talakapastaka akxni tinilh Cristo chu na tlan kamatliwakglhaw tiku kinkataʼankgoyan kʼuma xasanto katsisni. ¿Xatapaxuwan kawaniyaw amakgapitsin nakinkataʼankgoyan?

23. ¿La akxilha tamakxtumit?

²³ Xlakskujnin Jehová tiku ni makgxtakgkgo ni akxilhkgo la akgtum takuka akxni tamakxtumikgo (Heb. 10:24, 25; 1 Juan 5:3). Akgtum liʼakxilhtit, mapakgsina David lu xlakgati xʼan xchik Jehová xlakata nakakninani, chu tlakg xlakgati akxni xkatatawila tiku na xpaxkikgo Jehová (Sal. 27:4; 35:18). Chu kalilakapastakti xliʼakxilhtit Jesús. Asta akxni aktsujku xwanit, lu xtawilaputun kxchik xTlat niku xkakninanikan (Luc. 2:41-49).

24. ¿Tuku tlan tlawayaw akxni anaw ktamakxtumit?

²⁴ Akxni anaw ktamakxtumit, limasiyayaw pi paxkiyaw Jehová chu kamatliwakglhputunaw kinatalankan. Nachuna limasiyayaw pi katsiputunaw la nalinaw kilatamatkan xlakata natapakgsiniyaw xTamapakgsin Dios, wa xlakata lu xlakaskinka naʼanaw ktamakxtumit, klaklanka tamakxtumit xlakata anta kinkamasiyanikanan la kilitlawatkan. Nachuna, anta kinkamasiyanikanan chu kinkamakgtayakanan xlakata ni namakgxtakgaw tlakg xlakaskinka taskujut nema tlawama Tamapakgsin la uku: nakamasiyaniyaw nastalanikgo Mapakgsina Jesucristo chu nakamakgalhtawakgayaw (kalikgalhtawakga Mateo 28:19, 20). Xlikana akxni lakgatiyaw anaw ktamakxtumit limasiya la xlikana akxilhaw xTamapakgsin Dios. ¡Putum kilhtamaku lu xlakaskinka kaʼakxilhwi tamakxtumit!