1, 2. 1) ¿Tuku limasiya pi kiMapakgsinakan mapakgsinamaja lata kata 1914? 2) ¿Tuku naʼakxilhaw kʼuma capítulo?

 KINTAKANAJLAKAN tatliwakglhli xlakata akxilhwi tuku tlawanit xTamapakgsin Dios xlakgstipankan xtalamakgasitsin (Sal. 110:2). Kimapakgsinakan, Jesucristo kamastokgnit lhuwa tiku xatapaxuwan lichuwinankgo Dios, kamaskulunkininit xtakanajlakan chu xlatamatkan, chu kinkamakgtayanitan xlakata xlikalanka katiyatni linatalan nalaʼakxilhaw maski kintalamakgasitsinkan kinkatlawanikgoyan tuku nitlan. Kʼuma chu klhuwa tuku tlawanit limasiya pi lata 1914, kiMapakgsinakan mapakgsinama kxlakgstipan xtalatlawananin.

² Nialh makgas Tamapakgsin natlawa tuku tlakg tlan. Nakalakxpula chu nakamasputu putum xtalamakgasitsin (Dan. 2:44; Mat. 6:10). Pero pulana wi tuku lu xlakaskinka nakgantaxtu nema talichuwinan kBiblia pi nala. Kaʼakxilhwi tuku nala.

3. ¿Tuku pulana nala nema kgalhkgalhimaw kakgantaxtulh?

³ Nawankan pi naʼanan takaksni. Kcarta nema kamalakgachanilh Tesalonicenses, apóstol Pablo lichuwinalh tuku kgalhkgalhimaw pi pulana (kalikgalhtawakga 1 Tesalonicenses 5:2, 3). Anta lichuwinan «xkilhtamaku nkimPuchinakan» Jehová nema nalitsuku akxni namasputukan «xatlanka Babilonia» (Apoc. 17:5). Pero akxni nina tsuku uma kilhtamaku, laklanka kachikinin nawankgo: «Anan ntakaksni, ni tu ntamakpuwan anan». Max kaj makgtum o makglhuwa chuna nawankan. ¿Na namakgwankgo tiku pulalinkgo takanajla? Xlakata na makgtapakgsikgo kkakilhtamaku, max na akxtum nakatalakgo laklanka kachikinin xlakata nawankgo: «¡Anan takaksni!» (Jer. 6:14; 23:16, 17; Apoc. 17:1, 2). Uma tuku nawankgo nalitasiya pi xkilhtamaku Jehová lakatsuwa wi. Xtalamakgasitsin xTamapakgsin Dios «ni katilakgtaxtukgolh[...]».

4. ¿Tuku xlakata kinkamakgtayayan naʼakgatekgsaw tuku wa Pablo pi nala akxni nawankan pi anan takaksni chu ni anan tamakpuwan?

 ⁴ ¿Tuku xlakata kinkamakgtayayan nakatsiyaw tuku wamputun uma tuku wankanit pi nala? Pablo kgalhtinan: «Ni kapakglhtuta [o kapukswa] lapatit mpala kaj ni katikatsitit nakalakgchinan xtachuna nkgalhana akxni yama nkilhtamaku» (1 Tes. 5:3, 4). Amakgapitsin ni katsikgo, pero akinin katsiyaw tuku nakitaxtu xlakata tuku lama la uku. Pero ¿la nakgantaxtu tuku wankanit xlakata akxni nawankan pi anan takaksni chu ni anan tamakpuwan? Kilikgalhkgalhitkan xlakata naʼakxilhaw tuku nalatilha kkakilhtamaku. Wa xlakata talakaskin «skgalalh natawilayaw, chu nkatalakatlan natawilayaw» (1 Tes. 5:6; Sof. 3:8).

5. ¿Tuku pulana nala akxni natsuku lanka takatsanajwat?

⁵ Namalakgsputukan takanajla. Katsiyaw pi Pablo tsokgli: «Akxni nawankgoy: “Anan ntakaksni, ni tu ntamakpuwan anan,” pus akxni lakapala nalakgchinkgoy ntalakgsputni». Chuna la pulana tasiya makglipat chu alistalh jili, «lakapala nalakgchinkgoy ntalakgsputni» namin akxni nawankan pi anan takaksni chu ni anan tamakpuwan. Pero ¿tuku namasputukan? Pulana, putum nixaxlikana takanajla, «xaTlanka Babilonia». Biblia limapakuwi “makgwana” o tiku sta xmakni (Apoc. 17:5, 6, 15). Akxni nakamasputukan tiku kaj wankgo pi kstalaninanin Cristo chu amakgapitsi ni xaxlikana takanajla xalak uma kakilhtamaku wa tuku pulana nalitsuku «ntlanka takatsanajwat» (Mat. 24:21; 2 Tes. 2:8). Uma tuku nala lhuwa kaks nalilakawankgo. ¿Tuku xlakata? Xlakata tiku sta xmakni makgkatsikan pi mapakgsina chu lakpuwan pi nikxni katititaxtulh talakgaputsit. Pero, kaj lakapala nakatsi pi ni xlilat xlakpuwa pi nitu nalani. Lakapala namalakgsputukan xtachuna la «akgtum kilhtamaku» (Apoc. 18:7, 8).

6. ¿Tiku natlawa pi natalachipakan «xaTlanka Babilonia»?

⁶ ¿Tiku natlawa pi namasputukan «xaTlanka Babilonia»? Tantum «animal» nema xaspinini chu kgalhi «kgankaw akgalokgot». Libro xla Apocalipsis masiya pi uma animal wa Organización de las Naciones Unidas (ONU). Kgankaw akgalokgot kilhchanima mapakgsinanin xala uku tiku tatayakgo uma animal (Apoc. 17:3, 5, 11, 12). Namalakgsputukan Babilonia: países nema makgtapakgsikgo ONU namakglhtikgo tuku kgalhi tiku sta xmakni, nawakgo chu «nalhkuyukgoy» (kalikgalhtawakga Apocalipsis 17:16). a

7. 1) ¿La kgantaxtulh kxapulana siglo xtachuwin Jesús nema tatsokgnit kMateo 24:21, 22? 2) ¿La nakgantaxtu alistalh xtachuwin Jesús?

⁷ Namaktsuwikan kilhtamaku. Jesús wa tuku xʼama la klanka takatsanajwat: «Xpalakata ntalaksaknin, wa yuma nkilhtamaku namaktsuwikan» (kalikgalhtawakga Mateo 24:21, 22). Xtachuwin pulana kgantaxtulh kkata 66 akxni xminita Jesús, akxni Jehová maktsuwilh kilhtamaku akxni  romanos masputukgolh Jerusalén (Mar. 13:20). Tuku lalh kalakgmaxtulh kstalaninanin Cristo xalak Jerusalén chu Judea. ¿La nakgantaxtu xlikalanka katiyatni tuku wa Jesús? Jehová natlawa pi kiMapakgsinakan namaktsuwi kilhtamaku akxni ONU nakamalakgsputu takanajla. Chuna, xaxlikana takanajla ni natamasputukan nixaxlikana takanajla, kaj wa uma takanajla nalakgtaxtu (Sal. 96:5). ¿Tuku nala akxni nasputa uma pulaktu xla lanka takatsanajwat? Kaʼakxilhwi.

8, 9. ¿Tuku max xkilhchanima tuku wa Jesús chu tuku natlawakgo latamanin?

⁸ Xaʼawatiya kilhtamaku nema lichuwinalh Jesús, wan pi lhuwa tuku lu xlakaskinka nala nema natlawa pi natsuku guerra Armagedón. Pulaktiy nema pulana naʼakxilhaw wa tuku talichuwinan kMateo, kMarcos chu kLucas (kalikgalhtawakga Mateo 24:29-31; Mar. 13:23-27; Luc. 21:25-28).

⁹ Wi tuku nala kʼakgapun. Jesús wa: «Nchichini, chu wa mpapaʼ, ni katimakgaxkgakganalh. Chuj chi nataktakgoy staku nkakgapun». La uku, latamanin liʼakxilhkgo tiku pulalinkgo takanajla la tiku mastakgo xkgakganat. Pero alistalh nialh chuna katiliʼakxilhkgolh. Uma tuku wa Jesús, ¿na xkilhchanima pi wi tuku nala kʼakgapun? Max (Is. 13:9-11; Joel 2:1, 30, 31). ¿Tuku natlawakgo latamanin? Lu nalilakgaputsakgo «xlakata ni nakatsikgo tuku natlawakgo» (Luc. 21:25; Sof. 1:17). Xtalamakgasitsin xTamapakgsin Dios, mapakgsinanin asta skujnin, nalakgawitikgo «nchapikua nakgalhkgalhitawilakgoy nkatuwa ntu namin nalay». Naputsakgo niku natatsekgkgo, pero ni katitekgskgolh niku tlan natatsekgnikgo xtasitsi kiMapakgsinakan (Luc. 21:26; 23:30; Apoc. 6:15-17).

10. 1) ¿La nakatalakkaxla Jesús tiku natatayakgo Tamapakgsin chu tiku ni? 2) ¿Tuku natlawakgo akgatunu grupo?

¹⁰ Nakamapitsikan borregos chu cabras. Xtalamakgasitsin xTamapakgsin Dios naʼakxilhkgo tuku tlakg nakamakgapatinan. Jesús wan: «Nataukxilha chu Xkam nchixku, napumin mpuklhni, chu xawa xlitlanka xlitliwakga, chu xlikakni» (Mar. 13:26). Uma litliwakga nema nalimasiya nalitasiya pi Jesús mima xlakata nakatalakkaxla latamanin. Alakatanu niku na lichuwinalh xlakata xaʼawatiya kilhtamaku tlakg talichuwinan xlakata uma. Anta talichuwinan kparábola xla borregos chu cabras (kalikgalhtawakga Mateo 25:31-33, 46). Latamanin tiku tatayakgo xTamapakgsin Dios «borregos» nakaliʼakxilhkan. Natalakayawakgo akxni nakatsikgo pi “xlakgtaxtutkan, lakatsuwa wij nawan” (Luc. 21:28). Pero tiku ni tatayakgo xTamapakgsin Dios nakaliʼakxilhkan la «cabras». «Natsukukgoy tasakgoy» akxni nakatsikgo  pi «xliputum kilhtamaku nakamasputukan» (Mat. 24:30, TNM; Apoc. 1:7).

11. ¿Tuku kililakapastakatkan xlakata tuku aku nala?

¹¹ Pero, guerra xla Armagedón ni katitsukulh akxni Jesús katalakkaxlanita nawan «putum kachikinin» (Mat. 25:32, TNM). Pulana wi atanu tuku lu xlakaskinka nala. Kaʼakxilhwi pulaktiy: Gog natalachipa xkachikin Dios chu nakamamakxtumikan tiku kalaksakkanit naʼankgo kʼakgapun. Akxni nalikgalhtawakgatilhayaw kuenta katlawaw pi xTachuwin Dios ni liwana wan kilhtamaku akxni nalatilha pulakatunu. Max watiya kilhtamaku chuna nala.

12. ¿Tuku natlawa Satanás akxni xaʼawatiya natalachipa Tamapakgsin?

¹² Xaʼawatiya talachipat. Gog xla Magog nakamakgniputun tiku kalaksakkanit naʼankgo kʼakgapun nema wilakgolhku kKatiyatni chu amakgapitsi borregos (kalikgalhtawakga Ezequiel 38:2, 11). Uma guerra nema Satanás natatlawa xTamapakgsin Dios, wa xaʼawatiya nema nakatatlawa tiku kalaksakkanit lata akxni maxtuka kʼakgapun (Apoc. 12:7-9, 17). Maski Akgskgawini nila laktlawa xtakanajlakan tiku kalaksakkanit, tlakg chuna kitaxtulh akxni kamamakxtumika kcongregación xla kstalaninanin Cristo nema maskulunkika (Mat. 13:30). Pero akxni nixaxlikana takanajla xla uma kakilhtamaku nialh katitawilakgolh chu natasiya pi xkachikin Dios niti kamakgtaya «ni kgalhikgo xpatsaps, chu nitu xtalayaw chu xmalakcha», Satanás nalakpuwan pi chanit kilhtama namasputu. Natlawa pi tiku tatayakgo nakatalachipakgo tiku skujnanikgo Tamapakgsin.

13. ¿La nakalakgmaxtu Jehová xlakskujnin xalak katiyatni?

¹³ Ezequiel wan tuku nala. Xla wan: «Natana niku xwila, [Gog,] niku tlakg makgat anta knorte, wix chu lhuwa kachikinin nataminkgoyan, xputumkan kgewilakgo kawayu, akgtum lanka congregación, asta lhuwa soldados. Chu xlikana pi max natalatlawaputuna kinkachikin» (Ezeq. 38:15, 16). ¿Tuku natlawa Jehová akxni namasputuputunkan xkachikin? Jehová wan: «Lu nataliwaka kintasitsi. Naktlawa pi [...] natalachipakgo akgtum espada» (Ezeq. 38:18, 21; kalikgalhtawakga Zacarías 2:8). Dios nakalimakgtaya xlakskujnin xalak katiyatni guerra xla Armagedón.

14, 15. ¿Tuku na nala akxni Satanás natsuku talachipanan?

¹⁴ Pulana kaʼakxilhwi xlipulaktiy tuku lu xlakaskinka nala akxni Satanás natsuku kaputsastalani kskujnin Dios chu akxni natsuku Armagedón. Alistalh naʼakxilhaw la Jehová nakalakgmaxtu xkachikin kʼArmagedón. Chuna la lichuwinaw kpárrafo 11, uma xlipulaktiy tuku nala wa akxni kamamakxtumikan kʼakgapun tiku kalaksakkanit nema wilakgolhku kKatiyatni.

¹⁵ Kamamakxtumikan tiku kalaksakkanit. Mateo chu Marcos tsokgwilikgolh tuku Jesús wa xlakata «xtalaksaknin», uma kilhchanima, kstalaninanin tiku kalilaksakkanit espíritu  santo, akxni lichuwinalh tuku xʼama la akxni nina xmilh Armagedón (kaʼakxilhti párrafo 7). Akxni lichuwinalh pi mapakgsina xʼama litaxtu, Jesús wa: «Akxniku namalakgachakgoy xʼángeles, namamakgstokgkgoy xtalaksaknin xlikatlanka nkatuxawat, chu asta nta ni nkikgatsputa akgapun» (Mar. 13:27; Mat. 24:31). Akxni Jesús wa pi xʼama kamamakxtumi tiku xkalaksaknit, ni xlichuwinama akxni kamamakgstokgkan putum tiku kalaksakkanit, nema nala akxni nina tsuku lanka takatsanajwat (Apoc. 7:1-3). Wata xlichuwinama tuku xʼama la klanka takatsanajwat. Wa xlakata, akxni Satanás natsuku putsastalani xkachikin Jehová, tiku kalaksakkanit chu lamakgolhku nawan kKatiyatni nakamamakxtumikan kʼakgapun.

16. ¿Tuku natlawakgo tiku kalaksakkanit naʼankgo kʼakgapun nema lakastakwanankgonita kʼArmagedón?

¹⁶ ¿Nakamamakxtumikan putum tiku kalaksakkanit akxni nina natsuku guerra xla Armagedón? Chuna, putum tiku kalaksakkanit nakalinkan kʼakgapun akxni nina tsuku xguerra Dios. Ama kilhtamaku nakamaxkikan limapakgsin xlakata na namakgtayakgo Jesús nakalimasputu «ntsatsu likan» xtalamakgasitsin Tamapakgsin (Apoc. 2:26, 27). Kʼuma kilhtamaku, 144,000 tiku kalaksakkanit nema nalakastakwanankgo akxtum natatawilakgo lakgtliwakga ángeles tiku skgalalh wilakgolh xlakata natlawakgo tuku nakalimapakgsi Mapakgsina Jesucristo, nema takaxma nawan xlakata natalachipa «lhuwa soldados» nema stiliwilikgonit xkachikin Dios (Ezeq. 38:15). Akxni natsuku uma lanka guerra, natsuku Armagedón (Apoc. 16:16).

17. ¿Tuku nakaʼakgspula kʼArmagedón latamanin tiku la «cabras» nakaliʼakxilhkan?

¹⁷ Akxni nakamalakgaxokgekan. Armagedón wa tuku nalisputa lanka takatsanajwat. Akxni nachan kilhtamaku, Jesús atanu tuku natlawa. Akxni kalakputsananita «xlipaks nchixkuwin», nakamasputu putum latamanin tiku «cabras» litaxtukgo (Mat. 25:32, 33, TNM). Kimapakgsinakan nakalimasputu kachikinin «stakaka spada». Chuna, putum tiku nalitaxtukgo la «cabras», mapakgsinanin chu lakskujnin, nakamasputukan xliputum kilhtamaku (Apoc. 19:15, 18; Mat. 25:46).

18. 1) ¿Tuku xlakata natalakgpali xlatamatkan latamanin tiku la «borregos» nakaliʼakxilhkan? 2) ¿Tuku natlawa Jesús xlakata liwana natlajanan?

¹⁸ ¡Lu natalakgpali la natawilakgo tiku la «borregos» nakaʼakxilhkan! Lhuwa xcabras Satanás nialh katikaʼakgchipakgolh umakgolh «borregos», nema tasiya pi nila tamakgtayakgo chu ni katilakgtaxtunikgolh «ntlanka tapatin» o lanka takatsanajwat. Chuna, «lhuwa tachixkuwitat» o latamanin nalakgtaxtukgo akxni nakamasputuputunkan (Apoc. 7:9, 14). Akxni Jesús natlaja chu nakamasputu xtalamakgasitsin Tamapakgsin, nakamakan Satanás chu xdemonios niku kapulhman. Akgtum mil kata la xanin natawilakgo chu  nialhtu katitlawakgolh (kalikgalhtawakga Apocalipsis 6:2 chu 20:1-3).

19, 20. ¿La tlan namakgantaxtiyaw tuku kinkamasiyaniyan Isaías 26:20 chu 30:21?

¹⁹ ¿Tuku kilitlawatkan la uku, xlakata akxni nala tuku nalakgpali kakilhtamaku? Nina lhuwa kata, revista La Atalaya wa pi «xlakata tlan nalakgtaxtuyaw talakaskin nakgalhakgaxmatnanaw». ¿Tuku xlakata? Xtakgalhtin tekgsaw ktastakyaw nema Jehová kawanilh tiku xkachilinkanit kxamakgan Babilonia. Jehová wa pi Babilonia xʼamaka akgchipakan, chu xtalakaskin pi xkachikin xtakaxli xlakata akxni xchilh kilhtamaku xʼakgchipaka. Jehová wa: «Kapit, kinkachikin, katanu niku tlakg xatsekg kminchik chu kamalakchuwa mi malakcha. Kaj tsinu katatsekgti asta akxni nasputa tasitsi» (Is. 26:20). Verbos nema limin uma versículos «kapit», «katanu», «kamalakchuwa» chu «katatsekgti», akgtum limapakgsin. Xlakata xkgalhakgaxmatkgolh, xtalakaskin pi judíos xtalakgachitanukgolh kxchikkan, xlakata soldados tiku xlamakgolh ktiji ni xkamakgnikgolh. Wa xlakata, xlakgtaxtukgolh komo xkgalhakgaxmatkgolh tuku Dios xkawaninit. b

²⁰ ¿Tuku katsiniyaw xlakata tuku tlawakgolh xlakskujni Dios xala makgasa? Pi tlan nalakgtaxtuyaw tuku aku namin komo kgalhakgaxmataw tuku kinkawaniyan Jehová (Is. 30:21). Umakgolh limapakgsin nakinkamaxkikanan anta kcongregación. Wa xlakata, lata uku kilismanitkan xatapaxuwan nakgalhakgaxmataw limapakgsin nema kinkamaxkikanan (1 Juan 5:3). Komo la uku kgalhakgaxmatnanaw, na nakgalhakgaxmatnanaw ama kilhtamaku chu nakinkalakgmaxtuyan kinTlatkan Jehová chu kiMapakgsinakan Jesús (Sof. 2:3). Xlakata Jehová nakinkalakgmaxtuyan naʼakxilhaw la Tamapakgsin nakamasputu xtalatlawananin Dios. ¡Putum kilhtamaku nalakapastakaw uma!