1, 2. 1) ¿Tuku xlakata min kilhtamaku lu tuwa xlikana naʼakxilhaw Paraíso? 2) ¿Tuku natlawa pi nakanajlayaw tuku Dios wanit natlawa?

 CHATUM tala tiku lu tlakgwanit xlakata tantaku skujli chan ktamakxtumit. Xpuxku nitlan likatsinilh, lilakgaputsa la nakamaxki tuku maklakaskin xfamilia chu lilipuwan xlakata xpuskat tatatla. Akxni kgaxmata tuku litsuku takilhtlin skayaj limakgkatsi, lipaxuwa xlakata katawi kPukgalhtawakga xnatalan tiku lu kapaxki. Takilhtlin lichuwinan Paraíso chu makgkatsi pi anta wi. Tala lu lakgati uma takilhtlin, chu chuna la kilhtlima kxpaxtun xfamilia, makgkatsi la xnaku nema lu xlajwananit tatliwakglha xlakata uma takgalhkgalhin.

² ¿Minit kilhtamaku akxni chuna makgkatsi? Kimputumkan max chuna makgkatsinitaw. Pero xlakata lu katuwa tuku titaxtuyaw min kilhtamaku tuwa makgkatsiyaw nakanajlayaw pi Paraíso tlakg lakatsu wi. La uku «lu tuwa» kʼuma kakilhtamaku chu nipara tsinu xtachuna la paraíso (2 Tim. 3:1, TNM). ¿Tuku nakinkamakgtayayan lu xlikana naʼakxilhaw uma takgalhkgalhin? ¿La likatsiyaw pi xTamapakgsin Dios nialh makgas nakamapakgsi putum latamanin? Xlakata nakgalhtiyaw uma takgalhskinin, kaʼakxilhwi tuku xwankanit pi nala nema makgapitsi xlakskujnin Jehová akxilhkgolh la kgantaxtulh. Alistalh, naʼakxilhaw la kgantaxtuma uma chu atanu tuku xwankanit pi nala. Chu xaʼawatiya, akxni tliwakgata wi kintakanajlakan, naʼakxilhaw la nakgantaxtu nialh makgas.

3. ¿Tuku tamalaknun kamatliwakglhli judíos tiku xkachilinkanit kBabilonia?

³ Kalilakpuwanti la latamakgolh judíos tiku ni xmakgxtakgkgo Dios nema kalinka kBabilonia ksiglo VI akxni nina xmin Jesús. Lhuwa anta stakkgolh, lu tuwa xwanit latamat, babilonios xkalikgalhkgamanankgo xlakata xkanajlanikgo Jehová (Sal. 137:1-3). Akglhuwa kata kamakgtayalh tuku xkgalhkgalhimakgolh: Jehová xkawaninit pi xʼama kamaspita kxkachikinkan, kJudá, chu tlakg tlan xtawilakgolh. Asta kawanilh pi xʼama wan xtachuna la jardín xla Edén. ¡Chuna, akgtum paraíso! (Kalikgalhtawakga Isaías 51:3.) Uma tachuwin  xlimatliwakglhputun xkachikin chu liwana xkanajlakgolh tuku xkawaninit. Kalichuwinaw makgapitsi.

4. ¿Tuku kawanilh Jehová judíos xlakata nitu xlipekuankgolh?

⁴ Nitu makgapekuanan. Judíos tiku xkachilinkanit xʼamakgolh taspitkgo, pero ni kʼakgtum paraíso, wata kʼakgtum tiyat nema tutupuxamakaw kata xʼakgxtakgwilikanit, chu lhuwa nipara xʼakxilhkgonit. Ama kilhtamaku xʼanankgo leones, lobos, leopardos chu amakgapitsi lapanit. Natlatni max xlakpuwankgo: «¿Tlan natawilakgo kimpuskat chu kinkamanan? ¿Tuku nalanikgo kiborregos chu kiwakax?». Wa tuku xlilakgaputsakgo natlatni. Pero kalakpuwanti la kamatliwakglhli tuku Dios kawanilh kʼIsaías 11:6-9 (kalikgalhtawakga). Uma lu lakswan tachuwin xkalimasiyani pi xʼamaka kakuentajtlawakan judíos tiku ni xmakgxtakgkgo Dios chu xʼanimales. Tlan nawanaw pi león xʼama wa sakgat xlakata ni xʼama kawa xʼanimales, chu ni xkapekuanikgolh. Jehová wanilh xkachikin pi nitu xʼamakgolh lanikgo kkakiwin chu kdesierto xla Judá (Ezeq. 34:25).

5. ¿Tuku wa Jehová nema kamakgtayalh judíos tiku xkachilinkanit pi xʼamakgolh kgalhikgo putum tuku xmaklakaskinkgolh?

⁵ Lhuwa tuku naʼanan. Max makgapitsi judíos na xlakpuwankgo: «¿Tlan nakkamaxki tuku maklakaskinkgo kifamilia akxni naktaspitaw? ¿Niku naktawilayaw? ¿Tuku nakliskuja? ¿Tlakg tlan unu natamakgxtakgaw niku kinkaʼakgchipakgonitan babilonios?». Jehová tlawalh pi nialh xlilakgaputsakgolh uma akxni lichuwinalh makgapitsi tuku xʼama la. Kawanilh pi lhuwa xʼama senan chu katiyatni lhuwa xʼama makgalanan (Is. 30:23). ¿Chu tuku xʼama la xlakata taskujut chu chiki? Jehová kawanilh: «Natlawakgo chiki chu anta natawilakgo; chu nachankgo uvas chu nawakgo xtawakat. Ni atanu tiku natawila kchiki nema natlawakgo; ni katichananankgolh chu atanu tiku nawakgo» (Is. 65:21, 22). Chuna la akxilhaw, tiyat niku xʼamakgolh taspitkgo tlakg tlan xʼama wan nixawa Babilonia niku xkachilinkanit. Pero, israelitas xkgalhikgonit tlakg xalanka taʼakglhuwit nema tlawalh pi xkachilinka kBabilonia. ¿Xʼama lakkaxla xtaʼakglhuwitkan?

6. 1) ¿Tuku tajatat xkgalhikgo israelitas? 2) ¿Tuku kawanilh Jehová israelitas tiku xkachilinkanit nema taspitkgolh kxkachikinkan?

⁶ Tlan tawila takanajla. Lhuwa kata akxni nina xkachilinkan, xkachikin Dios nitlan xwi xtakanajlakan. Jehová limaklakaskilh palakachuwina Isaías xlakata xkawanilh: «Putum miʼakgxakgakan xatatatla chu minakujkan ni lakgtliwakga» (Is. 1:5). Judíos xaʼakgatapa chu lakgaxokgo xwankgonit xlakata ni xkgaxmatkgo xtastakyaw Jehová chu ni xʼakxilhputunkgo taxkgakget nema xkamaxki (Is. 6:10; Jer. 5:21; Ezeq. 12:2). Komo chuntiyaku xlikatsikgolh akxni xtaspitkgolh kxkachikinkan, ¿la xʼamakgolh kgalhkgalhikgo pi nitu xkamakgapekualh? ¿Ni xʼama tlawa uma pi Jehová xkalakgmakgampa? Uma tuku kawanilh tlawalh pi wi tuku xkgalhkgalhikgolh: «Chu ama kilhtamaku akgatapanin nakgaxmatkgo xtachuwin uma libro, chu niku kapokglhwa chu asta niku kapukswa  xlakgastapukan lakgaxokgo naʼakxilhkgo» (Is. 29:18). Chuna, Jehová xtachuna la xʼama makuchi xtakanajla uma kachikin tiku nitlan xlimakgkatsi xtalakgalhin. Komo xkgalhakgaxmatnankgolh, xʼama kamaxki xkgakganat chu xʼama kapulalin.

7. ¿La makgantaxtilh Jehová tuku kawanilh israelitas tiku xkachilinkanit kBabilonia chu tuku xlakata akxni lilakapastakaw matliwakglha kintakanajlakan?

⁷ ¿Xʼama makgantaxti Jehová tuku xwanit? Tuku lalh kinkamaxkiyan xtakgalhtin. Judíos tiku taspitkgolh kxkachikinkan, nitu kamakgapekualh, lhuwa tuku kgalhikgolh chu tlan tawi xtakanajlakan. Dios kakuentajtlawalh xlakata kachikinin tiku lakatsu xwilakgolh, nema tlakg tliwakga chu xlhuwakan xwankgonit, chu kuentajtlawalh xlakata xʼanimales nitu xkatlawanikgolh lapanit. Xlikana pi kaj tsinu akxilhkgolh la kgantaxtulh tuku xwankanit xlakata paraíso nema Isaías, Jeremías, Ezequiel chu amakgapitsi tsokgwilikgolh. Pero lu lipaxuwakgolh tuku akxilhkgolh chu wa tuku xmaklakaskinkgo. Lu tlan akxni lilakapastakaw tuku Jehová tlawalh xpalakata xkachikin, xlakata matliwakglha kintakanajlakan. Nachuna komo makgasa lu tlan la kgantaxtulh tuku xlichuwinankanit, ¡kalakpuwanti la nawan akxni putum nakgantaxtu! Kaʼakxilhwi tuku Dios tlawanit kimpalakatakan.

8. ¿Niku wilakgolh la uku xkachikin Dios?

⁸ Xkachikin Jehová la uku ni akgtum kachikin nema wi kʼakgtum país. Wata kstalaninanin Cristo tiku kalaksakkanit litaxtukgo akgtum kachikin xaʼespiritual nema wanikan «xIsrael Dios» (Gál. 6:16). Tiku litaxtukgo “tanu borrego” akxtum katalamakgolh la kaj kʼakgtum tiyat, akgtum paraíso xaʼespiritual niku akxtum kakninanikgo Jehová chu wa tuku pulana wilikgo kxlatamatkan (Juan 10:16; Is. 66:8). Kʼuma paraíso kgantaxtunit tuku wanit Jehová xlakata takanajla xtachuna la xwi Edén. Kalichuwinaw makgapitsi liʼakxilhtit.

9, 10. 1) ¿La kgantaxtuma uku tuku wanit Isaías 11:6-9? 2) ¿Tuku limasiya pi xkachikin Dios kgalhikgo takaksni?

⁹ Nitu makgapekuanan. Tuku lichuwinanit pi nala Isaías 11:6-9 lu stlan tuku lichuwinan xlakata tlan nalatalalinkgo chu nitu nalatlawani animales nema wanankgo chu la nalatalalinkgo chixku chu xʼanimales. ¿Kgantaxtuma la uku uma tuku xwankanit pi nala? Chuna... pero xaʼespiritual. Kversículo 9 tekgsaw tuku xlakata animales nialhtu xʼamakgolh tlawakgo. Anta wan: «Xlakata katiyatni nalitatsama xtamasiy Jehová chuna la chuchut litsama pupunu». ¿Xʼama talakgpali la likatsikgo animales kaj xlakata «xtamasiy Jehová»? Ni, wa latamanin tiku lakgpalikgo la likatsikgo akxni lakgapaskgo Dios xala Talhman chu tlan likatsikgo la xla. Chu kgantaxtuma kʼuma paraíso xaʼespiritual. Xlakata Tamapakgsin, kstalaninanin Cristo katsinimakgolh la nalakgmakgankgo xtasitsikan chu tlan nakatalalinkgo xnatalan.

¹⁰ Akgtum liʼakxilhtit, kʼuma libro lichuwinanitaw tuku wan Biblia nema kilitlawatkan xlakata ni namakgtanuyaw  kkakilhtamaku chu la kinkaliputsastalanikanitan. Kaks lilakawanaw pi kʼuma kakilhtamaku nema lu xaluku, wi akgtum lanka kachikin nema putum tiku anta wilakgolh ni tlawakgo tuku nitlan, maski akxni kawanikan pi nakamakgnikan. Uma liwana masiya pi tiku tapakgsinikgo Mapakgsina Mesías nitu lipekuankgo chuna la lichuwinalh Isaías. Jesús wa pi kstalaninanin xʼamaka kalilakgapaskan xlakata xlapaxkikgolh (Juan 13:34, 35). Chu kcongregación limaklakaskima «skujni xalipaw chu xaskgalala» nakinkamasiyanikgoyan ni xaluku nawanaw chu napaxkinanaw (Mat. 24:45-47, TNM).

11, 12. 1) ¿Tukuya tatsinksni anan uku kkakilhtamaku? 2) ¿La kuentajtlawanit Jehová xkachikin xlakata ni natsinksa?

¹¹ Lhuwa tuku naʼanan. Kakilhtamaku titaxtuma tatsinksni xaʼespiritual, chuna la Biblia xlichuwinanit: «Namin kilhtamaku, wan kiMalanakan Jehová Mapakgsina xlikalanka kakilhtamaku, chu xlikana nakmalakgacha tatsinkstat kpaís, akgtum tatsinkstat, ni xla kaxtalanchu, chu takgalhputit, ni xla chuchut, wata xlakata nakgaxmatputunkan xtachuwin Jehová» (Amós 8:11). ¿Chu tuku nawanaw xlakata tiku tapakgsinikgo Tamapakgsin? ¿Na tsinksnimakgolh? Ni. Jehová lichuwinalh la xʼamakgolh tawilakgo xkachikin chu xtalamakgasitsin: «Kilakskujnin nawayankgo, pero wixin natsinksatit. ¡Kaʼakxilhtit! Kilakskujnin nakgotnankgo, pero wixin nakgalhputiyatit. ¡Kaʼakxilhtit! Kilakskujnin napaxuwakgo, pero wixin natamamaxaniyatit»  (Is. 65:13). ¿Akxilhnita la kgantaxtuma uma tachuwin?

¹² La uku tlakg lhuwa kgalhiyaw tuku xla kintakanajlakan: likgalhtawakga, grabaciones xla audio chu video, tamakxtumit, laklanka tamakxtumit chu sitio xla Internet nema lhuwa likgalhtawakga kgalhi. Chuna, kgalhiyaw lhuwa liwat xaʼespiritual kʼuma kakilhtamaku nema xtachuna akgtum desierto (Ezeq. 47:1-12; Joel 3:18). ¿Ni lipaxuwayaw akxni akxilhaw la kgantaxtu tuku Jehová xwanit pi lhuwa tuku nakgalhiyaw kkilatamatkan? ¿Liskujpat xlakata putum kilhtamaku naliwayana tuku Jehová wilinit kxmesa?

13. ¿La kgantaxtunit tuku wankanit pi lakgaxokgo nalakawanankgo chu akgatapa nakgaxmatparakgo?

¹³ Tlan tawila takanajla. La uku xlikalanka kakilhtamaku tlakg talhuwima tiku ni kgaxmatkgo o ni lakawanankgo kxaʼespiritual (2 Cor. 4:4). Pero Cristo kamapaksama xlikalanka Katiyatni. ¿Akxilhnita la tiku xtachuna lakgaxokgo lakawanankgo chu tiku akgatapa kgaxmatparakgo? Komo akxilhnita tiku katsininit tuku xaxlikana xlakata xTachuwin Dios chu lakgmakgan taʼakgsanin xla takanajla nema xtachuna lakgaxokgo chu akgatapa, komo chuna, uma wamputun pi akxilhnita la kgantaxtu uma tuku xwankanit pi nala: «Ama kilhtamaku akgatapanin nakgaxmatkgo xtachuwin uma libro, chu niku kapokglhwa chu asta niku kapukswa xlakgastapukan lakgaxokgo naʼakxilhkgo» (Is. 29:18). Akgatunu kata, akglhuwa miles latamanin xlikalanka Katiyatni tekgskgo xlikuchun uma tajatat xaʼespiritual. Chatunu tiku taxtu kBabilonia xaLanka chu makgtapakgsi kparaíso xaʼespiritual xlakata nakakninani Dios limasiya pi tuku wanit natlawa Dios kgantaxtuma.

14. ¿Tuku kililakapastakatkan xlakata natatliwakglha kintakanajlakan?

¹⁴ Putum capítulos xla uma libro lichuwinan tuku limasiya pi Cristo kamamakxtuminit kstalaninanin kʼakgtum xaxlikana paraíso espiritual kʼuma xaʼawatiya kilhtamaku. Kalilakpuwaw pulaklhuwa la kinkasikulunatlawamakan kʼuma paraíso; chuna natatliwakglha kintakanajlakan kxtamalaknun Dios nema aku nakgantaxtu.

15. ¿Tuku xlakata liwana kanajlayaw pi Katiyatni akgtum paraíso nawan?

¹⁵ Lata xapulana Jehová lakkaxwilinit pi Katiyatni akgtum paraíso nawan. Akxni katlawalh Adán chu Eva, kawililh niku lu xakastlan chu kalimapakgsilh pi xmalakgatsamakgolh Katiyatni chu xkakuentajtlawakgolh animales (Gén. 1:28). Pero, xlakan tatayakgolh Satanás akxni nialh kgalhakgaxmatli Dios chu tlawakgolh pi putum latamanin lakgalhinanin xwankgolh, chu xnikgolh. Maski chuna, ni talakgpalilh tuku lakapastaknit natlawa Dios. Xtachuwin putum kilhtamaku kgantaxtu (kalikgalhtawakga Isaías 55:10, 11). Wa xlakata tlan nakanajlayaw pi xkamanan Adán chu Eva namalakgatsamakgo Katiyatni, akgtum paraíso nawan chu liwana nakuentajtlawakgo tuku Jehová tlawanit. Ama kilhtamaku, tuku kawanika judíos tiku xkalinkanit  kBabilonia pi nala, niku lichuwinan pi akgtum paraíso nawan, tlakg liwana nakgantaxtu. Kaʼakxilhwi makgapitsi liʼakxilhtit.

16. ¿Tuku wan Biblia xlakata nitu nalipekuanaw kilhtamaku nema aku mima?

¹⁶ Nitu makgapekuanan. Xaʼawatiya, uma lu stlan tachuwin nema wi kʼIsaías 11:6-9 liwana nakgantaxtu. Lakchixkuwin, lakpuskatin chu kamanan nitu nalipekuankgo xanikuta niku naʼankgo. Ni katikapekuaniw animales nipara latamanin. Kaj kalakpuwanti: nachan kilhtamaku akxni xlikalanka Katiyatni niku napina la kminchik namakgkatsiya. Tlan napaxtawakatnana kkgalhtuchokgo, lagos chu kpupunu; tlan nalatapuliya kkasipijni chu niku kaxtum. Chu akxni natsiswan, nitu nalipekuana. Xlikana nakgantaxtu tuku wan Ezequiel 34:25: xlakskujnin Dios “nalatamakgo kdesierto chu nitu katilipekuankgolh, chu nalhtatakgo kkakiwin”.

17. ¿Tuku xlakata tlan nakanajlayaw pi akxni namapakgsinan xTamapakgsin Dios nakgalhiyaw lhuwa liwat?

¹⁷ Lhuwa tuku naʼanan. Kaj kalakpuwanti nalatapaya kkakilhtamaku niku ni naʼanan tiku nitu kgalhi, tiku lukutwa xlakata ni wayan, nipara tatsinkstat, chu niku niti lakaskin pi mapakgsina namakgtaya. Tuku lhuwa anan la uku xaʼespiritual kxkachikin Dios limasiya pi Mapakgsina, Jesús, nakamaxki tuku maklakaskinkgo tiku tapakgsinikgo chu ni kaj xaʼespiritual. Akxni Jesús milh kKatiyatni, na limasiyalh pi tlan namakgantaxti, xlakata kamawilh lhuwa mil tiku lu xtsinksmakgolh chu kaj xkgalhi makgapitsi kaxtalanchu chu skiti o tamakgnin (Mat. 14:17, 18; 15:34-36; Mar. 8:19, 20). Akxni xTamapakgsin Dios natsuku mapakgsinan xlikalanka Katiyatni, liwana nakgantaxtu uma tuku wankanit pi nala: «Chu xla namakamin sen xlakata namastaja mintalhtsi nema chanita kminkatakuxtu, chu, katiyatni namasta, kaxtalanchu, lu lhuwa nawan chu lu kgama nawan. Ama kilhtamaku miʼanimales napuchwayankgo niku lhuwa anan liwat» (Is. 30:23).

18, 19. 1) ¿La nakgantaxtu tuku tawan kʼIsaías 65:20-22? 2) ¿Tuku wamputun tachuwin «chuna la xlimakgas latama kiwi»?

¹⁸ La uku lhuwa tiku max nipara lakpuwankgo pi namin kilhtamaku natawilakgo kʼakgtum lu stlan chiki chu naliskujkgo tuku nakamakgapaxuwa. Kʼuma kakilhtamaku niku lu kalixkajni, lhuwa latamanin akxilhkgo pi tlakg skujkgo pero ni lhuwa kaxokgonikan xlakata nakamaxkikgo tuku maklakaskinkgo xfamiliajkan, chu tiku kgalhikgo tumin chu tlakg kgalhiputunkgo tlakg ricos wankgo. Kalakpuwanti tuku nala akxni nakgantaxtu xlikalanka Katiyatni uma tuku wankanit: «Natlawakgo chiki chu anta natawilakgo; chu nachankgo uvas chu nawakgo xtawakat. Ni atanu tiku natawila kchiki nema natlawakgo; ni katichananankgolh chu atanu tiku nawakgo. Xlakata chuna la xlimakgas latama kiwi nachuna nawan kinkachikin; chu tiku kkalaksaknit putum kilhtamaku namaklakaskinkgo xtaskujutkan nema litlawakgonit xmakankan» (Is. 65:20-22).

¹⁹ ¿Tuku wamputun tachuwin «chuna la xlimakgas latama kiwi nachuna nawan kinkachikin»? ¿Minit kilhtamaku akxni  tayanita xtantin kgantum lanka kiwi? ¿Ni kaks lilakawana akxni lakpuwana la xlilhuwa kata kgalhi? ¡Max pulhli akxni nina xlakachin xtata mintlat, chu max natayayku akglhuwa kata nixawa akinin komo chuntiyaku xkgalhiw talakgalhin. Chuntiya xtayalh asta akxni pokgxni xwanti. Pero xlakata, xtalakgalhaman Jehová wanit pi nalatamayaw kParaíso akglhuwa kata chu nakgalhiyaw takaksni (Sal. 37:11, 29). Lu makgas nalatamayaw asta nachan kilhtamaku akxni umakgolh kiwi nema akglhuwa mil kata yakgolh nakaliʼakxilhaw la kgantum xanat nema lakapala skaka. ¡Chuna, putum kilhtamaku nalatamayaw!

20. ¿La nitu nalitatatlakgo tiku tapakgsinikgo Tamapakgsin?

²⁰ Nialh katiʼanalh tajatat. La uku ni tatatlaputunaw o ni niputunaw. Pero tlan nawanaw pi kimputumkan tatatlayaw. Kinkamapasikanitan tajatat nema makgninan chu wanikan talakgalhin, kaj akgtum likuchun anan: xtamakamastan Jesús (Rom. 3:23; 6:23). Akxni natawila xTamapakgsin xaʼAkgtum Mil Kata, tiku ni makgxtakgkgo Dios tsinu tsinu nakamaxkikan tasikulunalin nema limin uma tamakamastan: Jesús chu 144,000 tiku natamapakgsinankgo tsinu tsinu nakaxakanikgo talakgalhin nema makglhtinankgonit. Amakgtum liwana nakgantaxtu tuku Isaías xlichuwinanit: «Chu ni chatum lataman nawan: “Ktatatlay.” Latamanin tiku nalatamakgo [kkatiyatni] wa tiku nakatapatikan xtalakgalhinkan» (Is. 33:24). Nachan kilhtamaku akxni nialh katiʼanalh tiku ni lakawanan chu tiku akgatapa (kalikgalhtawakga Isaías 35:5, 6). Nipara akgtum tajatat lu snun nawan nema Jesús nila katimakuchilh. ¡Tiku ni makgxtakgkgo Tamapakgsin ni katitatatlakgolh!

21. 1) ¿Tuku natlawanikan linin? 2) ¿Tuku xlakata tlan limakgkatsiyaw uma tamalaknun?

²¹ ¿Tuku natlawanikan linin, nema kitaxtu xlakata tajatat chu talakgalhin? Wa xaʼawatiya «talatlawana», nema kimputumkan kinkalaklinan (1 Cor. 15:26). Pero ¿tlakg tliwakga linin nixawa Jehová? Kaʼakxilhwi tuku wa Isaías: «Xlikana xla xliputum kilhtamaku namalakgsputu linin, chu Malana tiku lakgchan namapakgsinan Jehová xlikana nalakxaka putum lakgpixtajat» (Is. 25:8). ¡Kaj kalakpuwanti! Nialhti nalakgatawilakan xlakata nilh, nialh katiʼanalh niku kamaknukan, o akgtapukan ninin, na nipara lakgpixtajat xla takatsanajwat. Wata nalipaxuwayaw xlakata naʼakxilhaw la Jehová namakgantaxti tuku lakkaxwilinit xlakata tiku nikgonita (kalikgalhtawakga Isaías 26:19). Ama kilhtamaku namasputukan putum tapatin nema liminit linin.

22. ¿Tuku nala akxni Tamapakgsin liwana namakgantaxti kKatiyatni xtalakaskin Dios?

²² Akxni nasputa akgtum mil kata, Tamapakgsin tlawanita nawan putum xtalakaskin Dios kKatiyatni chu Cristo namakamaxki Tamapakgsin xTlat (1 Cor. 15:25-28). Latamanin nialh nakgalhikgo talakgalhin chu uma nakamakgtaya natayanikgo tuku xaʼawatiya nakaliʼakxilhkan akxni Satanás namaxtukan  niku xakapulhman. Ama kilhtamaku, Cristo naʼakxkiti uma luwa chu putum tiku makgtayakgo (Gén. 3:15; Apoc. 20:3, 7-10). Pero tiku paxkikgo Jehová chu ni makgxtakgkgo nalatamakgo putum kilhtamaku. Ni anan atanu tachuwin nema limasiya tuku nala chuna la wan Biblia. Wa tuku wankanit nema lakchixkuwin chu lakpuskatin tiku ni makgxtakgkgo Dios namakgamakglhtinankgo «natalipaxuwakgoy xlakgskgatan Dios wa yuma lilakgatit ntalakgtaxtun ntu namin» (Rom. 8:21).

23, 24. 1) ¿Tuku xlakata wanaw pi tuku Dios wanit natlawa nakgantaxtu? 2) ¿Tuku liwana lakkaxwilinita natlawaya?

²³ Tuku Dios wa pi natlawa ni kaj tamanixnat. ¿La likatsiyaw? Kalakapastakti xtachuwin Jesús nema akxilhwi kcapítulo akgtum xla uma libro. Jesús kamasiyanilh kstalaninanin naskinikgo Jehová: «Kamilh mintamapakgsin. Katatlawalh mintalakaskin, chuna la kʼakgapun, nachuna kkatiyatni» (Mat. 6:9, 10, TNM). Uma xTamapakgsin Dios ni kaj wi tiku lakpuwa; uma xlikana. La uku mapakgsinamaja kʼakgapun. Takgatsinita akgtum ciento kata makgantaxtima tuku Jehová wanit natlawa nema liwana tasiya kcongregación. Putum tuku Dios wanit natlawa nakgantaxtu akxni xTamapakgsin namapakgsinan xlikalanka Katiyatni. ¡Xlikana nakgantaxtu!

²⁴ Wa xTamapakgsin Dios namin chu putum tuku Jehová wanit natlawa nakgantaxtu. ¿La likatsiyaw? ¡Xlakata xTamapakgsin Dios mapakgsinamaja! Pero takgalhskinin nema putum kilitlawatkan wa uma: «¿Kmastama talakaskin pi Tamapakgsin kakimapakgsilh? La uku kaliskujwi nalinaw kilatamatkan chuna la tiku tapakgsinikgo Tamapakgsin, xlakata xliputum kilhtamaku nalipaxuwayaw uma tasikulunalin.