KILATAMATKAN LA KSTALANINANIN CRISTO
Tlakg kakatsini la nalichuwinana Dios: Kamasiyani milimakgalhtawakget la nalakkaxwili tuku naʼakxilhatit
TUKU XLAKATA LU XLAKASKINKA. Komo tiku makgalhtawakgemaw lakkaxwili tuku natalikgalhtawakgayaw, tlakg nituwa katiʼakgatekgsli chu nalakapastaka tuku masiyaniyaw. Uma natlawa pi tlakg lakapala nastaktilha xtakanajla. Akxni tamununita nawan, xlakata skgalalh natawila, na natalakaskin nalakkaxwili tuku nataʼakxilha ktamakxtumit chu akxni nalichuwinan Dios (Mt 25:13). Wa xlakata, komo nakatsini chu nalismani la kgalhtawakgakan namakgtaya putum kilhtamaku. Lata tsukuyaw kamakgalhtawakgeyaw, kilimakgtayatkan tiku kamakgalhtawakgeyaw xlakata nalismanikgo nalakkaxwilikgo tuku nakalitakgalhtawakgayaw.
LA NATLAWAYAW
-
Kawili tlan liʼakxilhtit (Ro 2:21). Kalakkaxwili tuku nalikgalhtawakgaya, kalilakpuwanti tiku makgalhtawakgapat (km 11/15 pág. 3). Kamasiyani milikgalhtawakga nema lakalhtitnita.
-
Kamakgpuwantini nalakkaxwili tuku naʼakxilhatit. Akxni ankgalhin kgalhtawakgayatita, kawani pi lakkaxwilikan tuku nalikgalhtawakgayatit na makgtanu ktakgalhtawakga. chu kawani pi tlan kitaxtu chuna tlawakan. Kawani la tlan nalimaxtu kilhtamaku xlakata chuna natlawa. Makgapitsi natalan masakuanikgo tiku makgalhtawakgemakgo xlikgalhtawakgakan nema talakalhtitnit xlakata naʼakxilhkgo la talakgpali. Kawani pi tlan tuku tlawalh akxni lakkaxwili tuku nalikgalhtawakgayatit.
-
Kamasiyani la nalakkaxwili tuku nalikgalhtawakgayatit. Makgapitsi natalan, akxni xapulana tsukukgo kgalhtawakgakgo, kamasiyanikgo tiku makgalhtawakgemakgo la nalakkaxwilikgo akgtum lección.