Kakilalitachuwinaw akxni aktsujku xwanita.

Klakachilh kʼItalia kkata 1943. Kinatalan chu akit kstakwi kʼakgtum aktsu kachikin. Kintlat chanana xwanit chu na kxwaknan. Kintlat chu kintse xkinkalinkgoyan kpusikulan.

¿Tuku xlakata sacerdote litaxtu?

Akxni aktsujku xakwanit, xaklakgati xakan kmisa xlakata xakkgaxmatnilh sacerdote. Lu xaklakgati la xchuwinan chu kaks xkimalakawani tuku xtlawa. Lata ama kilhtamaku sacerdote klitaxtuputulh. Akxni xakkgalhi 13 kata, kintse kililh niku tlakg kamasiyanikan kamanan tiku sacerdote litaxtuputunkgo.

¿Lakputsanani Biblia akxni xkgalhtawakgapat xlakata sacerdote nawana?

Nitu klakputsananima. Akxni xakkgalhi 15 kata, chatum kimakgalhtawakgena kimaxkilh maktum libro nema xlimin Evangelios, nema lichuwinan xlakata xlatamat Jesús, chu makglhuwa klikgalhtawakgalh. Akxni xakkgalhi 18 kata kalh klatama kRoma xlakata xakkgalhtawakgalh kʼuniversidades pontificias nema katapakgsini papa. Anta kkatsinilh latín, griego, historia, filosofía, psicología chu teología. Xakkgaxmataw makgapitsi textos akxni xlikgalhtawakgakan Biblia kmisa xala domingo, pero ni xaklakputsananiyaw.

Akxni xpulalipina niku kamasiyanikan tiku sacerdote litaxtuputunkgo, ¿na xmakgalhtawakgenana?

Kmasiyalh xlakata decretos del Concilio Vaticano II, pero tuku tlakg xakliskuja wa pi xakpulalinan chu xaklakkaxwili putum tuku xtalakaskin anta.

¿Tuku xlakata nialh kanajlani mimpusikulan?

Pulaktutu tuku xlakata: xakakxilha pi pusikulan xmakgtanu kpolítica, pi nitu xkawani sacerdotes chu amakgapitsi católicos tiku nitlan tayat xkgalhikgo chu xakakxilha pi makgapitsi tamasiy ni xtatalakxtumi tuku wan Biblia. Pulaktum uma tamasiy wa pi Dios kamakgapatinan latamanin akxni nikgo, ¿pero tlan chuna tlawa chatum Dios tiku paxkinan? Chu ¿xlikana lakaskin pi kamaklakaskiw akgtum rosario xlakata watiya watiya tuku nawanaw kkiʼoracionkan? *

¿Tuku tlawa?

Ktasaskinilh Dios pi xkimakgtayalh, ktamawalh maktum Biblia de Jerusalén, nema aku xtaxtunit ktachuwin italiano, chu ktsukulh likgalhtawakga. Akgtum domingo tsisa akxni xakmaʼakganuwakama kilhakgat nema xakmaklakaskin akxni xaktlawa misa, chinkgolh chatiy lakchixkuwin niku xkamasiyanikan tiku sacerdote xlitaxtuputunkgo. Kiwanikgolh pi xtatayananin Jehová xlitaxtukgo chu ktsukuw kgalhchuwinanaw. Liwaka akgtum hora klichuwinaw tuku wan Biblia chu tuku masiya xlakata xaxlikana takanajla o religion.

¿Tuku lakpuwanti xpalakata xtatayananin Jehová?

Lu kaks klilakawa xlakata liwana xkatsikgo tuku xlichuwinamakgo chu ni tuwa xtekgskgo textos kmaktum Biblia católica. Alistalh, chatum xtatayana Jehová tiku wanikan Mario, tsukulh kilakgapaxialhnan. Xla ni lakapala ksitsi, chu putum sábados xmin kamakgnajatsa hora tsisa, maski ksenama o xchichinima, nitu xmalakgachokgo.

¿Chu tuku xlakpuwankgo amakgapitsi sacerdotes xlakata xlakgapaxialhnankana?

Kkawanilh pi akxtum xkinkatakgalhtawakgakgon, pero nipara chatum xlakaskinka liʼakxilhli uma takgalhtawakga. Pero akit lu xaklakgati. Lu tlan tuku xakkatsinima. Pulaktum tuku kkatsinilh, wa tuku xlakata Dios masta talakaskin kaʼanalh tapatin chu tuku nitlan, uma ni liwana xakʼakgatekgsa.

¿Wanikgon tiku xpulalinkgoyan pi nialh xlikgalhtawakga Biblia?

Kkata 1975 makglhuwa kkilalh Roma xlakata xakkalitachuwinalh tuku xakkatsinima. Tiku xkimpulalinkgo xkimakanajliputunkgo pi nitlan tuku xakkatsinima, pero nipara chatum maklakaskilh Biblia. Wa xlakata, 9 xla enero kata 1976, ktsokgli maktum carta niku xwan pi nialh xakama makgtapakgsi kpusikulan chu kmalakgachalh kRoma; akgtiy kilhtamaku alistalh ktaxtulh niku xakwi chu xlimakgtumku kkatatamakxtumilh xtatayananin Jehová. Uma lanka tamakxtumit xwanit, anta xwilakgo lhuwa congregaciones. ¡Ni xtachuna xwanit la tuku xakakxilhnit kpusikulan! Xchatunukan xkgalhikgo xbibliajkan chu xputsakgo texto nema xwan tiku xʼakgchuwinama.

¿Tuku wa mifamilia xlakata tuku tlawa?

Lhuwa kisitsinikgolh. Pero kkatsilh pi chatum kintala na xkatakgalhtawakgama xtatayananin Jehová kLombardía, nema wi kxnorte Italia. Kalh lakgapaxialhnan chu xtatayananin Jehová xala anta kintaputsakgolh taskujut chu niku tlan xaktawi. Watiya uma kata, xtatayana Jehová klitaxtulh.

¿Wi tuku xlakgpali xlakata tuku laksakti?

¡Nitu xaklakgpalilh! La uku tlan ktalalin Dios, xlakata kkatsininit tiku xla chuna la masiya Biblia, chu ni chuna la wankgo lakchixkuwin chu xtalismaninkan católicos. La uku tlan kkamasiyani latamanin chu tlan klimakgkatsi xlakata kkatsi pi xaxlikana tuku kkawanima.