Arco xla Tito kgalhi pulaktiy tuku masiya nema lu xlakaskinka lanit. Maski chuna, ni lhuwa tiku katsikgo la uma monumento tataya tuku wan Biblia. Maski Arco xla Tito ni chuwinan, masiya pi tuku lichuwinan Biblia ni akgtsankga.

Kkata 30 xla kinkilhtamakujkan, xtamapakgsin Roma xtalakgatuminit lata kBritania chu kʼGalia (Francia) asta kʼEgipto, chu putum kachikin nema xkamapakgsi ni xkgalhikgo taʼakglhuwit chu xkgalhikgo lhuwa tumin. Pero xʼanan akgtum kachikin nema makgat xwi chu ankgalhin xmaʼakatsani Roma: xalakatakina xtiyat Judea.

Encyclopedia of Ancient Rome wan: «Kaj ni lhuwa kachikin nema xmapakgsi Roma ni xlaʼakxilhputun mapakgsinanin chu tiku xkamapakgsikan, pero kxtiyat Judea tlakg ni xlaʼakxilhputun. Judíos lu ksitsikgo xlakata xmapakgsinakan ni xalak xkachikin xwankgonit chu ni xmaxkikgo kakni xtalismaninkan. Chu Roma ni xʼama katapati judíos». Lhuwa judíos xkgalhkgalhikgo pi xchilh chatum mesías nema xkalakgmaxtulh kxtamapakgsin Roma chu xtlawalh pi Israel xlakaskinka xlitaxtupa. Pero kkata 33, Jesucristo lichuwinalh pi Jerusalén xʼamaka masputukan.

Jesús wa: «Nalakgchinan nkilhtamaku, wa akxni nalimakgstiliwilikgoyan lipaxtokgnu mintalatlawananin; chu na nawilinikgoyan lipakan; chu na lu[...] kanikawa nalakxkayakgoyan. Na namalakanikgoyan nkatiyatna wix, chu wa milakgskgatan nti anta ntanumakgoj nawan kmimpulakni; na nitu katimakgaxtakgnikgon nchiwix mpala lakgalhwij nawan» (Lucas 19:43, 44).

Xlikana pi tuku wa Jesús kaks kamalakawanilh kstalaninanin. Akgtiy kilhtamaku alistalh, akxni xʼakxilhmakgo templo xla Jerusalén, wi tiku wa: «Makgalhtawakgana, kaukxilhti lantla lu[...] likaknit yuma nchiwix, chu nchiki lantla xlitlanka». Chuna xwankgo xlakata katsikan pi chiwix nema xlitatlawanit templo 11 metros xlilhman xwanit, 5 metros xlitulanka chu 3 metros xlilanka. Maski chuna, Jesús kakgalhtilh: «Wa yuma nkatuwa ntu ukxilhatit, namin nkilhtamaku wa akxni ni akgtum nchiwix natamakgaxtakga mpala nalakgalhtawilay lantla mpaks namalakgsputukan» (Marcos 13:1; Lucas 21:6).

Chu alistalh wa: «Akxni naʼukxilhatit, Jerusalén limakstuka nkgamputum ntropa, wa nalikatsiyatit mpi wa xlisputni chinita. Pus wan chu nti wilakgolh nawan kxatiyat Judea, katsalakgolh; kalaksipijni kaʼankgolh; chinchu wa nti ntanumakgo kchuchutsipij [o kkachikin], kataxtunikgolh; chinchu wa nti kpukuxtu xtawilakgolh, ni katitanukgolh kchuchutsipij» (Lucas 21:20, 21). ¿Kgantaxtulh xtachuwin Jesús?

Puxamakututu kata, judíos tayanikgolh pi romanos xkamapakgsilh. Pero kkata 66 procurador xalak Judea, Gesio Floro, kgalhalh tumin xalak templo. Wa uma tuku matsukilh taʼakglhuwit, xalakatakinanin judíos  xafuerza tanukgolh kJerusalén chu makgnikgolh soldados romanos nema xkuentajtlawanamakgo chu wankgolh pi nialh xʼamakgo tapakgsinikgo Roma.

Akgtutu papaʼ alistalh, liwaka puxamakaw mil soldados nema xkapulalin Cestio Galo, ankgolh kJerusalén xlakata namasputukgo tatalachipat. Romanos lakapala tanukgolh kkachikin chu tampilhukikgolh xapulana xpatsaps templo. Pero kaj xalan tapanukgolh, chu ankgolh. Judíos paxuwakgolh chu tsukukgolh kaputsastalanikgo. Uma mastalh talakaskin pi kstalaninanin Cristo xmakgantaxtikgolh xtastakyaw Jesús pi xtaxtukgolh kJerusalén chu xtsalakgolh kkasipijni, kxa’akilhtutu kgalhtuchokgo Jordán (Mateo 24:15, 16).

Akgtum kata alistalh, Roma lakkaxwilipa natalachipa Judea, chu wa lakgayawalh general Vespasiano chu Tito, xkgawasa. Pero kkata 68, akxni nina makgas xninit mapakgsina Nerón, Vespasiano taspitli kRoma xlakata mapakgsina nalitaxtu, chu Tito wa tiku lakgayawaka namasputu Judea chu xkapulalin tutumpuxam mil soldados.

Junio kata 70, Tito kamapakgsilh xsoldados pi xtankamikgolh kiwi xalak Judea xlakata xlipakawililh 7 kilómetros xlilhman Jerusalén xakinkaslajaja kiwi. Kaj akgtutu papa’ titaxtulh, romanos x’akgchipakgonit chu klhkuyukonit kachikin chu templo. Chuna la xwanit Jesús, nipara akgtum chiwix tamakgxtakgli (Lucas 19:43, 44). Chuna la putsanankanit, «max 250,000 o 500,000 latamanin nikgolh kJerusalén chu kxliputum país».

Kkata 71, Tito taspitli k’Italia chu Roma xatapaxuwan makgamakglhtinalh. Putum xalak kachikin ankgolh lipaskuajnankgo pulaktum xlakaskinka tatlaja nema nikxni chuna xtlawakanit k’Italia.

Latamanin kaks xlilakawankgo akxni x’akxilhkgo tuku lhuwa xtapalh kxtiji Roma. Kxlakatinkan xtitaxtukgo barcos nema x’akgchipakgonit, laklanka carros nema xmasiyakgo la xtalachipanankgonit chu tuku xmaxtukgonit kxtemplo Jerusalén.

Kkata 79, akxni Vespasiano, xtlat Tito xninita, Tito mapakgsina litaxtulh, pero akgtiy kata alistalh kaj xalan nilh. Domiciano, xtala Tito, tsukulh mapakgsinan chu alistalh matlawinalh akgtum arco xlakata nalilakapastakkan Tito.

Arco xla Tito tlawa pi kaks nalilakawankgo lhuwa tiku ankgo lakgapaxialhnankgo Foro romano akgatunu kata. Wi tiku lakpuwankgo pi uma lu stlan la tlawakanit, amakgapitsi wankgo pi malanki xtamapakgsin Roma chu amakgapitsin wankgo pi akgtum monumento nema lilakapastakkan la masputuka Jerusalén chu xtemplo.

Pero xpalakata chatum xlikgalhtawakgana Biblia, Arco xla Tito wi tuku lu xlakaskinka kilhchanima. Masiya pi tuku lichuwinan Biblia ni akgtsankga, tlan lipawankan chu wa matsokgninalh Dios (2 Pedro 1:19-21).