¡LU STLAN TAKGALHKGALHIN! Kimalakatsukinakan kinkamalaknuninitan pi putum kilhtamaku nalatamayaw unu kKatiyatni. Maski chuna, lhuwa tiku nila kanajlakgo. Lakpuwankgo pi namin kilhtamaku putum naniyaw chu chuna kinkalimalakatsukikan. Amakgapitsin lakpuwankgo pi tlan nalatamayaw putum kilhtamaku, pero asta akxni naniyaw chu na’anaw k’akgapun. ¿Tuku lakpuwana wix?

Xlakata nakgalhtinana, pulana kaʼakxilhti la Biblia kgalhti umakgolh takgalhskinin: Chuna la kinkatlawakanitan, ¿la xlilhuwa kilhtamaku kililatamatkan? ¿Tuku xlakata Dios tlawalh Katiyatni chu latamanin? ¿Tuku xlakata niyaw?

Akxni tatalakxtumiyaw amakgapitsi tuku katlawanit Dios kKatiyatni nema staknankgo, akxilhaw pi akinin ni xtachuna atanu tamalakatsukin. ¿Tuku wamputun uma? Biblia wan pi kaj akinin kinkamalakatsukikan chuna la Dios (Génesis 1:26, 27). ¿Tuku kilhchanima uma? Pi Dios kinkamaxkin tayat nema kgalhi, la tapaxkit chu xalakatitum nalikatsiyaw.

Asta Dios kinkatlawan xlakata tlan nalakapastaknanaw, nakatsiyaw tuku tlan chu tuku nitlan, nalakgapasputunaw chu xʼamigos nawamputunaw. Wa xlakata lipaxuwayaw akxni akxilhaw tuku anan kʼakgapun chu kkakilhtamaku, nachuna arte, tatlakgni chu poesía. Pero wa tuku tlakg litalakgpaliyaw nixawa amakgapitsi tamalakatsukin, wa pi tlan kakninaniyaw kiMalakatsukinakan. Putum uma tlawa pi akinin ni xtachuna nawanaw la amakgapitsi tuku staknankgo.

Kalilakpuwanti uma: komo Dios xlakaskin pi latamanin kaj ni lhuwa kata xlatamakgolh, ¿tuku xlakata kinkalimalakatsukin putum uma tuku tlan tlawayaw chu tlawa pi tlakg lhuwa nakatsinitilhayaw? Xlakata lakaskin pi putum kilhtamaku kalipaxuwaw latamat kKatiyatni.

Wi tiku wankgo pi Dios nikxni lakkaxwililh pi latamanin putum kilhtamaku xlatamakgolh. Wankgo pi kKatiyatni anta niku titaxtukgo latamanin xlakata nakaliʼakxilhkan chu nakatsikan tiku kalakgchan natalatamakgo Dios kʼakgapun. Pero komo uma chuna, ¿ni xlikana pi Dios xlilh kuenta xlakata anan tapatin unu kKatiyatni? Uma xtalalakatawakalh la likatsi Dios. Biblia wan xlakata Dios: «Putum tuku tlawa xaʼakgstitum. Dios tiku ni makgxtakgnan, wantiku ni tlawa tuku ni xaʼakgstitum; xla xaʼakgstitum chu ni tlawa tuku ni xalakatitum» (Deuteronomio 32:4).

 Biblia liwana wan tuku xlakapastaknit Dios akxni malakatsukilh Katiyatni: «Akgapun tapakgsini kimapakgsinakan Dios, pero katiyatni kamaxkinit lakchixkuwin xlakata ana natalatamaj» (Salmo 115:16, SXP). Chuna, Dios tlawalh xastlan Katiyatni xlakata anta xlatamakgolh latamanin putum kilhtamaku chu liwana lakkaxwililh xlakata xkgalhiw putum tuku maklakaskinaw chu xlipaxuwaw latamat putum kilhtamaku (Génesis 2:8, 9).

«Akgapun tapakgsini kimapakgsinakan Dios, pero katiyatni kamaxkinit lakchixkuwin xlakata ana natalatamaj» (Salmo 115:16, SXP).

Anta kxTachuwin, Dios na wan tuku xlakata kamalakatsukilh latamanin. Wa uma tuku kalakgayawalh xapulana latamanin: «Kamalakgatsamatit katiyatni chu kakuentajtlawatit, chu kakuentajtlawatit [...] putum animales nema tatsuwikgo kkatiyatni» (Génesis 1:28). ¡Lu lanka talakgalhaman: xkuentajtlawakgolh Katiyatni chu akgtum paraíso xtlawakgolh! Adán chu Eva tlan xkatalatamakgolh xkamanan putum kilhtamaku kKatiyatni, ni kʼakgapun.

Biblia lichuwinan pi chatum ángel nema Dios malakatsukilh, tiku alistalh litapakuwilh Satanás, talalakatawakalh Dios chu lakxtlawaputulh tuku Dios xlakapastaknit lata xapulana. ¿La tlawalh?

Satanás kaʼakgskgawilh xapulana kinatlatnikan Adán chu Eva, xlakata na xtalalakatawakakgolh Dios. Kawanilh pi Dios ni xkamaxkima tuku tlakg tlan, pi xʼakstukan xlaksakkgolh tuku tlan chu tuku nitlan. Xlakan tatayakgolh Satanás chu ni kgalhakgaxmatkgolh Dios. ¿Tuku kitaxtulh? Titaxtulh kilhtamaku, nikgolh chuna la Dios xkawaninit. Nialhla latamakgolh putum kilhtamaku kParaíso unu kKatiyatni (Génesis 2:17; 3:1-6; 5:5).

Lata xkilhtsukutkan latamanin, patikgonit tuku nitlan kitaxtulh xlakata Adán chu Eva ni kgalhakgaxmatnankgolh. Biblia wan: «Ntsukulh ntalakgalhin nkatuxawat nkaj xpalakata nchatum nchixku [Adán], pus wa linin nkitaxtunilh ntalakgalhin; cha nchu linin, chuna nkgalhikgolh xlipaks nchixkuwin sampi paks lakgalhinankgolh» (Romanos 5:12). Niyaw xlakata kinkamatitaxtinikanitan talakgalhin chu linin, ni wa xlakata Dios «wi tuku lakkaxwilinit» nema akinin nila akgatekgsaw.

Tuku nitlan lalh kʼEdén ni lakgpalilh tuku xlakapastaknit Dios lata xapulana xlakata Katiyatni chu latamanin. Xlakata Dios kgalhi xatlan tapaxkit chu xalakatitum tayat, tlawalh tuku xtalakaskin xlakata xkinkalakgmaxtun ktalakgalhin chu kkalinin. Apóstol Pablo wa: «Xtaxokgo ntalakgalhin, wa linin, wampi wa xtatakin Dios, wa latamat wantu xaliankgalhin, xpalakata nCristo Jesús nkimPuchinakan» (Romanos 6:23). Tapaxkit nema kinkakgalhiniyan Dios maʼakgpuwantinilh namasta «nchastum xKam [Jesucristo], lakimpi xlipaks wa nti nkanajlaniy, ni katitsankgalh, wampi wata nakgalhiy xlatamat wa ntu xaliankgalhin» (Juan 3:16). Akxni xatapaxuwan tamakamastalh, Jesús xokgolh tuku xtalakaskin xlakata xlakgmaxtulh putum tuku Adán xmakgatsankganit. a

Nialh makgas nakgantaxtu xtamalaknun Dios pi Katiyatni akgtum Paraíso nawan. Xlakata wix tlan nalipaxuwaya tuku aku namin, militlawat uma xtastakyaw Jesús: «Anta nkalaktanutit kxatitsu malakcha; sampi lu[...] pakgtlanka xamalakcha, chu na lu[...] titlanka xatiji wa ntu an kputsankgan, na lu[...] lhuwa nti laktanukgo anta. Sampi lu[...] titsu xamalakcha, chu xatiji, na lu[...] titsu wa ntu an klatamat, na lu[...] tsinu wa nti ntakgskgoy» (Mateo 7:13, 14). Chuna, wix tlan nalaksaka tuku aku nala kmilatamat. ¿Tuku nalaksaka?