¿XLIKANA TLAN NALAKSAKA TUKU NALA KMILATAMAT? Lhuwa tiku lakpuwankgo pi talhkanitata tuku nala kxlatamatkan, chu amakgapitsi lakpuwankgo pi Dios wa tiku laksaka tuku nala kxlatamatkan. Wa xlakata, akxni ni matlanikgo tuku xlakpuwankgonit, chuntiya makgxtakgkgo chu wankgo: «Chuna xtalhkanit».

Wi tiku lilipuwankgo akxni akxilhkgo pi kkakilhtamaku nila sputa tuku ni xa’akgstitum chu tapatin. Max liskujkgo xlakata nakgalhikgo tlakg tlan latamat, pero nitu litaxtu tuku tlawakgo xlakata anan guerras, tiku nitlan likatsikgo, tajatat chu tuku masputunan. Xa’awatiya lakpuwankgo pi nitu litaxtu maski naliskuja.

Xlikana pi tuku lama kkakilhtamaku max nalakgpali tuku lakkaxwilinitaw (Eclesiastés 9:11). Pero putum tlan nalaksakaw tuku nala kkilatamatkan kilhtamaku nema aku mima. Asta Biblia masiya pi tuku nala kkilatamatkan, akinin nalaksakaw. ¿Tuku xlakata chuna wanaw?

Akxni kachikin Israel nialh makgas x’amakgo tanukgo kTiyat nema xKawanikanit pi Nakamaxkikan, Dios limaklakaskilh Moisés xlakata nakawani: «Kwilinit kmilakatin latamat chu linin, tasikulunalin chu tuku nitlan nakitaxtuniyan; chu mililaksakat latamat xlakata nalatapaya, wix chu minkamanan, napaxkiya Jehová miDios, nakgaxpata xtachuwin chu ni namakgxtakga» (Deuteronomio 30:15, 19, 20).

«Kwilinit kmilakatin latamat chu linin, tasikulunalin chu tuku nitlan nakitaxtuniyan; chu mililaksakat latamat» (Deuteronomio 30:19).

Chuna, Dios kalakgmaxtulh israelitas nialh tachin xtawilakgolh k’Egipto chu kamaxkilh talakaskin pi xlipaxuwakgolh xlatamatkan kTiyat nema xKawanikanit pi Nakamaxkikan. Pero umakgolh tasikulunalin ni x’akstu x’ama min. Wi tuku xlitlawatkan xwanit: “xlilaksakatkan xwanit latamat”. ¿La x’amakgo tlawakgo? Xpaxkikgolh Dios, xkgalhakgaxmatkgolh chu ni xmakgxtakgkgolh.

Wix na xtachuna militlawat, chu tuku nalaksaka natlawa pi tlan o nitlan nakitaxtuniyan kilhtamaku nema aku mima. Komo nalaksaka napaxkiya Dios, nakgalhakgaxpata chu ni namakgxtakga, nalaksaka latamat, latamat nema nikxni sputa kParaíso unu kKatiyatni. Pero ¿tuku kilhchanima pulakatunu uma?

Dios matsokgnilh apóstol Juan pi «Dios, tapaxkit», xlakata wa uma tayat nema tlakg litalakgapasa (1 Juan 4:8). Xlakata Jesús xkatsi, akxni kgalhskinka tuku limapakgsin tlakg xlakaskinka, kgalhtinalh: «Milipaxkit Jehová miDios xliputum minaku chu xliputum milatamat chu xliputum mintalakapastakni» (Mateo 22:37, TNM). Wa xlakata, talalinkan Dios xlakata paxkikan chu ni kaj xlakata pekuanikan o kaj akglakgawani kgalhakgaxmatkan. Pero ¿tuku xlakata kilipaxkitkan Dios?

Tapaxkit nema Jehová kakgalhini latamanin xtachuna la natlatni kapaxkikgo xkamanankan. Maski makglakgalhinanin, liskujkgo xlakata nakamasiyanikgo, nakamakgpuwantinikgo, nakamakgtayakgo chu xatapaxuwan nakastakyawakgo xkamanankan xlakata lakaskinkgo pi kapaxuwakgolh chu tlan kakakitaxtunilh. ¿Chu tuku kgalhkgalhikgo natlatni? Pi xkamanankan kakapaxkikgolh, kakakgalhakgaxmatkgolh chu kaʼakgatekgskgolh pi putum tuku kawanikan kaj xlitlankan. ¿Ni xlikana pi kinTlatkan xalak akgapun, tiku ni kgalhi talakgalhin, lakgchan nakinkaskiniyan pi kapaxkiw chu kapaxtikatsiniw putum tuku tlawanit kimpalakatakan?

Ktachuwin nema xapulana tsokgka Biblia, tachuwin kgaxmatkan makglhuwa kilhchanima «kgalhakgaxmatnankan». ¿Ni xlikana pi wa uma tuku kgalhkgalhi chatum tlat akxni wani xkgawasa: «Kakinkgaxpatni»? Wa xlakata, kgaxmatnikan Dios kilhchanima nakatsiyaw tuku kinkaskiniyan chu natlawayaw. Xlakata la uku Dios nialh katachuwinan latamanin, xlakata tlan nakgaxmatniyaw, kilikgalhtawakgatkan Biblia, chu nalilatamayaw tuku wan (1 Juan 5:3).

Xlakata xlimasiyalh la xlilakaskinka kgaxmatnikan Dios, Jesús wa: «Ni xman wa nkaxtalanchu nkatililatamalh nchixku, wampi wa nalilatamay xlipaks ntachuwin wa ntu wan Dios» (Mateo 4:4). Wayankan lu xlakaskinka, pero nalimatliwakglhaw kintalakapastakninkan xtakatsin Dios tlakg xlakaskinka. ¿Tuku xlakata? Xaskgalala mapakgsina Salomón wa: «Liskgalala litamakgtayakan xtachuna tumin litamakgtayakan; pero tuku tlakg tlan limin takatsin wa pi liskgalala maxki latamat xmalana» (Eclesiastés 7:12). Xliskgalala chu xtakatsin Dios tlan kinkakuentajtlawayan la uku chu kinkamakgtayayan nalaksakaw xatlan tiji: nema nakinkalinan klatamat nema nikxni sputa.

Kʼartículo nema titaxtulh, lichuwinaw xtachuwin Jesús, niku xwan: «Titsu xamalakcha, chu xatiji, na lu[...] titsu wa ntu an klatamat, na lu[...] tsinu wa nti ntakgskgoy» (Mateo 7:13, 14). Xlakata xʼaw kʼuma tiji, xpaxtikatsiniw pi wi tiku xkinkapulalin xlakata nachanaw niku amaw: klatamat nema nikxni sputa. Wa xlakata, ni kilimakgxtakgtkan Dios (Salmo 16:8). Pero ¿la natlawayaw?

Chali chali lhuwa tuku tlawayaw chu tlakg lhuwa tuku tlawaputunaw. Lhuwa tuku lakapastakaw o lilakgaputsayaw chu nialh kgalhiyaw kilhtamaku nalakapastakaw tuku Dios lakaskin natlawayaw. Wa xlakata, Biblia kinkamalakapastakayan: «Kuintaj kakatlawakantit lantla nalatapayatit, lu[...] taskgalanaj, ni wa xtachuna wa nti ni akkatsi, wampi wa xtachuna nti akkatsiy. Xlitamalakgtaxtit nkilhtamaku, sampi wa nchu uma nkilhtamaku, lu[...] nitlan» (Efesios 5:15, 16). Ni namakgxtakgaw Dios kilhchanima pulana nawiliyaw kkilatamatkan la talalinaw (Mateo 6:33).

Maski nila lakgpaliya tuku lanita, tlan wi tuku natlawaya xlakata mifamilia chu wix xatapaxuwan nalatapayatit kilhtamaku nema aku mima. Biblia masiya pi kinTlatkan xalak akgapun, Jehová, lu kinkapaxkiyan chu kinkawaniyan tuku lakaskin natlawayaw. Kaʼakxilhti uma xtachuwin palakachuwina Miqueas:

«Xla waninitan tuku tlan. ¿Chu tuku skiniman Jehová mimpalakata? Kajwatiya kalimasiya tuku xa’akgstitum, lhuwa xtapalh kaʼakxilhti ni makgxtakgnankan. ¡Chu ni nalakpuwana pi putum tlan tlawaya akxni natalatapaya miDios!» (Miqueas 6:8).

¿Chu wix? ¿Natalatapaya Dios? Komo natlawaya tuku aku lichuwinaw, namakgamakglhtinana tasikulunalin nema Dios nakamaxki xʼamigos. Wix tlan nalaksaka tuku natlawaya.