Kalilakpuwanti la lu tlan latalalin stiyun. Wi tuku tlawa pi lu tlan nalatalalin. Nancy Segal tiku pulalin niku kaputsananikan stiyun chu na kgalhi xtastiyun, wan pi makgapitsi stiyun «lu tlan laʼakgatekgsni maski ni lhuwa tuku lawani». Chatum puskat lichuwinan la talalin xtalatsumat tiku xtastiyun: «Liwana klalakgapasaw».

¿Tuku tlawa pi lu tlan nalaʼakgatekgsni? Maski xlikana pi chuna la kamakgastakkan chu tuku anan, makgtanu tuku tayat nakgalhikgo, makgapitsi taputsan masiya pi atsinu ni lakxtum ADN * kgalhikgo, chu wa tuku tlawa pi tlan nalaʼakgatekgsni.

KALILAKPUWANTI UMA: Dios malakatsukilh putuminika ADN, wa xlakata, xlilat nalakpuwanaw pi xla tlakg kinkaʼakgatekgsniyan nixawa akinin. Lu xlilat akxni salmista tsokgli: «Wix kimakilhtsuki lata ya xaklakgawan. Akxni ya xaklakgawan, wix ixkiakxilhpat; maski tsekg xakstakmaj [...]. Wix akxilhti kimakni akxni aktina ixwanit, lata xakama tasij, ixtsokgnitata nak milibro» (Salmo 139:13, 15, 16, SXP). Kaj Dios lakgapasa chu akgatekgsa la lakgnu ADN nema kgalhiyaw chu na katsi tuku titaxtunitaw nema tlawanit pi nakgalhiyaw tayat nema kgalhiyaw. Wa xlakata tlan nakanajlayaw pi xla tlakg liwana kinkaʼakgatekgsniyan nixawa akinin.

Mapakgsina David wa kxoración: «Kintikukan [Jehová], wix kilikgalhtawakganita y staranka kilakgapasa. Wix katsiya xniku kuruks ktawila y xniku ktakij; wix makgachakgxiya [o akgatekgsa] kalakgamakgat kintalakapastakni. Pues maski ya para kchiwinan, wix wakg katsiya tu nakwan» (Salmo 139:1, 2, 4, SXP). Jehová na liwana lakgapasa tuku makgkatsiyaw, asta katsi tuku xlakata wi tuku tlawaputunaw (1 Crónicas 28:9; 1 Samuel 16:6, 7). ¿Tuku kinkamasiyaniyan uma xlakata Dios?

Masiya pi maski akxni tlawayaw oración nila wankgoyaw tuku lakpuwanaw chu tuku makgkatsiyaw, kiMalakatsukinakan katsiya. Xla akxilha tuku tlawayaw, chu na akgatekgsa tuku xlakata chuna tlawayaw. Chu ni kajwatiya uma, Dios na katsi tuku tlan xtlawaw komo xtalakgpalilh la wi kilatamatkan. Chuna, komo wa Dios tiku kinkatlawan xlakata napaxkinanaw, tlan nakanajlayaw pi lakgapasputun chu akgatekgsputun xatlan kintapuwankan chu tuku tlawaputunaw (1 Juan 4:7-10).

Biblia liwana kinkawaniyan:

• «Sampi wa nkimPuchinakan, kgayaj lakanikgoy wa nti ntlan ntu ntlawakgoy, chu na akgaskgalalh kgaxmatnikgoy xʼoracionkan» (1 PEDRO 3:12).

• Dios malaknu: «Nakmamakgachakgxiniyan [o nakmaʼakgatekgsniyan] laktlan talakapastakni, y nakmasiniyan tijia latani natlawana; kanikxniwa nakwaniyan tu militlawat nawan» (SALMO 32:8, SXP).

¿Tlan nakinkamakgtayayan natayaniyaw taʼakglhuwit komo katsiyaw pi Dios kinkaʼakgatekgsniyan? Kalilakpuwanti tuku titaxtulh Anna, xalak Nigeria. Xla wan: «Nialh xakkatsi tuku naktlawa chu asta xaklakpuwan pi tlakg tlan xwa xaknilh. Akxni kiwanika pi xakkgalhi cáncer de mama, kinchixku xninita chu kintsumat xwi khospital xlakata xkgalhi hidrocefalia (xtakgstokgtawilanit chuchut kxakskitit). Lu tuwa kmakgkatsilh pi akxtum xaktatanuma kintsumat khospital, chu xʼamaka kinchukukan, xʼamaka kintlawanikan quimioterapia chu radioterapia».

¿Tuku makgtayalh Anna natayani tuku xtitaxtuma? Xla wan: «Lu xaklakgati xaklilakpuwan textos xalak Biblia la Filipenses 4:6, 7, niku wan pi xtakaksni “Dios, wantu lakatsalaniy xlipaks kintapuwankan”, naskgalaja kinakujkan, chu kintapuwankan. Akxni xaklakapastaka umakgolh tachuwin, xakmakgkatsi pi Jehová akxtum xkintawi, xakkatsi pi xla tlakg liwana xkiʼakgatakgsni nixawa la akstu xkiʼakgatakgsnikan. Na lu kimatliwakglhkgolh tiku watiya kintakanajla kgalhikgo.

»Maski chuntiyaku ktatatla, tlakg tlan kmakgkatsi. Kkatsininitaw ni lu naklilipuwanaw maski anan taʼakglhuwit, xlakata Jehová putum kilhtamaku kinkatawilan. Santiago 5:11 wan: “Kaukxilhtit, katsiyaw nkin mpi [xatapaxuwan] lamakgo wa nti nchuna mpatinankgolh. Kgaxpatnitantitta wixin [la tayanilh] Job, na katsiyatit wixin xatu nkilimaxtulh nkimPuchinakan, chu alistalh kgayaj katsanilh, na lakgalhamalh”». Jehová liwana xʼakgatekgsa xtaʼakglhuwit Job, chu tlan nakanajlayaw pi na liwana akgatekgsa tuku titaxtuyaw.