Dios lu tlan la malakatsukinit xmakni lataman xlakata tlan napaksa. Akxni chatum lataman tachuku, talhtuku, talhkgata o talhwekga «lakapala tsuku skuja xmakni xlakata napaksa niku wi tuku laninit» (Johns Hopkins Medicine). Makni lakapala wi tuku tlawa xlakata namachokgo kgalhni chu nialh nastaja, maxtuti niku wi tuku laninit chu lakkaxtlawa xliwa.

KALILAKPUWANTI UMA: Komo kiMalakatsukinakan lu tlan la tlawanit makni xlakata napaksa, ¿nila katimapaksalh tuku nitlan limakgkatsiyaw? Salmista liwana xkatsi pi Dios tlan kamapaksa tiku talakgaputsaxnimanalh chu tlan kamapaksa niku wi tuku lanikgonit (Salmo 147:3). Pero, chu komo wix wi tuku akgspulan nema lu nitlan chu nila patsankgaya, ¿la katsiya pi Dios «namapaksayan» la uku chu kilhtamaku nema aku mima?

Dios wan: «Ni kapekuanti, xlakata akit ktawilan. Ni anu anu kalakapi, xlakata akit miDios. Xlikana akit nakmatliwakglhan. Lu xlikana akit nakmakgtayayan» (Isaías 41:10). Katsikan pi Jehová kinkapaxkiyan, tlan kinkamamakgkatsiniyan chu kinkamaxkiyan litliwakga xlakata natayaniyaw taʼakglhuwit. Apóstol Pablo wa pi tuku tlawa pi tlan namakgkatsiyaw wa xtakaksni Dios «wa ntu lakatsalaniy xlipaks kintapuwankan». Chu alistalh wa: «Paks kmatlaniy xpalakata [...] nti nkimatliwakglha» (Filipenses 4:4-7, 9, 13).

Biblia matliwakglha kintakanajlakan xlakata tuku Dios malaknunit natlawa xpalakata latamanin. Akgtum liʼakxilhtit, Apocalipsis 21:4, 5 (nema talichuwinan kpágina nema stala) wan tuku natlawa Dios chu tuku xlakata tlan nalipawanaw.

• «Na paks naxakanikgo Dios xlakgpixtajatkan». Jehová namasputu putum tuku kinkamakgapatinanan chu kinkamalakgaputsiyan, maski ni xlakaskinka tasiya.

• Mapakgsina tiku malakatsukinalh chu kgalhi putum litliwakga nema wi «klaktawilh kpumapakgsin», namaklakaskin xlitliwakga chu xlimapakgsin xlakata nialh napatinanaw chu nakinkamakgtayayan akxni natalakaskin.

• Jehová wan pi tuku malaknu nakgantaxtu chu «xlikanaj». Uma wamputun, pi komo katsikan pi wa xaxlikana Dios, xla namakgantaxti tuku malaknunit.

«“Na paks naxakanikgo Dios xlakgpixtajatkan; na nialh katiʼanalh linin; chu na nialh katiʼanalh ntalipuwan, ni mpala wa ntatasa, chu na ni mpala wa ntakatsanajwat; sampi wa xlipaks nkatuwaj, wa ntu xʼanan xakgasiyaj, paks lakgsputli”. Chi nchu wa nti xwi klaktawilh kpumapakgsin, waj: “Kaʼukxilhtit, paks kmasastiy xlipaks nkatuwaj”. Chu na kiwanilh: “Katsokgti yuma; sampi wa yuma ntachuwin, [nakgantaxtu] na xlikanaj”» (Apocalipsis 21:4, 5).

Tamalakatsukin chu Biblia kinkamakgtayayan nalakgapasaw kinTlatkan xalak akgapun. Tamalakatsukin ni chuwinan pero kinkawaniyan pi xʼamigo Dios kawaw, chu Biblia lakatitum kinkawaniyan: «Wa Dios nti nkatalakatsuwinitit, na nakatalakatsuwiniyan» (Santiago 4:8). Chu Hechos 17:27 wan: «Ni makgat kinkawilanin nchatunu nkin».

Akxni tlakg nalimaxtuya kilhtamaku nalakgapasa Dios, tlakg nakanajlaya pi xla lilakgaputsayan (1 Pedro 5:7). ¿La litamakgtayakan lipawankan Jehová?

Kalilakpuwanti tuku titaxtulh Toru, chatum chixku xalak Japón. Maski xtse masiyanilh tuku xalak Biblia, akxni stakli katatapakgsilh xalaklipekuanit makgninanin xalak Japón nema litalakgapasa yakuza. Xla lichuwinan: «Xaklakpuwan pi Dios ni xkiʼakxilhputun chu pi xkilimalakgaxokge akxni wi tiku xmakgnikan, liwaka tiku xakpaxki». Toru wan pi xlakata xmakgtanunit anta, tlawalh pi «lu lixkajni xlikatsilh chu nipara tsinu xlakgalhamanalh». Akxni lichuwinan tuku xkgalhiputun, xla wan: «Kgawasaku xakniputun chu xaklakaskin pi xkilakapastakka xlakata xakmakgninit tiku tlakg tliwakga nixawa akit».

 Pero akxni Toru chu xpuskat, Hannah, tsukukgolh likgalhtawakgakgo Biblia, Toru lakgpalilh xlatamat chu la xtasiya. Hannah wan: «Lu kaks klilakawa talakgpalit nema tlawalh kinchixku». La uku Toru liwana katsi uma: «Kkatsi pi Dios lama chu kinkalilakgaputsayan chatunu akinin. Xla ni lakaskin pi wi tiku nani chu katapatiputun tiku xlikana nitlan limakgkatsikgo xtalakgalhinkan. Tlan nalitachuwinanaw tuku niti xlitachuwinaw chu tuku kajwatiya xla akgatekgsa. Nialh makgas, Jehová namasputu putum taʼakglhuwit, takatsanajwat chu tapatin. Asta la uku tlan nakinkamakgtayayan chuna la ni lakpuwanitaw. Lu kinkalilakgaputsayan chu kinkakuentajtlawayan akxni lu lipuwaxnimaw» (Salmo 136:23).

Chuna la limasiya tuku titaxtulh Toru, akxni katsiyaw pi Dios tlan namasputu putum tuku kinkamakgatasayan chu pi nialh makgas chuna natlawa, kinkamaxkiyan akgtum takgalhkgalhin chu na kinkamaxkiyan talakaskin tlakg tlan nalatamayaw. Chuna, maski lamaw kkakilhtamaku niku anan takatsanajwat, wix tlan nalitamakgtayaya xtapaxkit Dios.