¿Lilakgaputsayan Dios?
TUKU KINKAMASIYANIYAN TAMALAKATSUKIN
Xapulana tutupuxamakaw minuto lata akxni lakachin chatum skgata lu xlakaskinka. ¿Tuku xlakata? Xlakata chuna la nalikatsini puskat kskgata namakgtaya la nastaka. *
¿Tuku tlawa pi xatse nalimasiyani tapaxkit kskgata? Makgalhtawakgena Jeannette Crenshaw lichuwinan klikgalhtawakga The Journal of Perinatal Education, pi akxni chatum puskat malakachini o malakgawani skgata, hormona nema wanikan oxitocina lu taliwaka chu «tlawa pi xatse tlakg napaxki kskgata akxni lakaʼakxilha, spalha chu matsiki». Akxni chuna lay, xmakni puskat tlawa pi nalakatsuku atanu hormona nema «makgtaya pi natsuku tachuwinan kskgata» chu tlakg napaxki. ¿Tuku xlakata xlakaskinka uma?
Wa kiMalakatsukinakan Jehová, * tiku tlawalh pi xatse nalimasiyani tapaxkit kskgata. Mapakgsina David paxtikatsinilh Dios xlakata tlawalh pi xlakachilh chu tlan xmakgkatsilh kxmakxpan xtse. Liwana xkatsi pi wa Jehová tiku kuentajtlawalh lata lakachilh. Tlawanilh akgtum oración chu wanilh: «Lata akxni nina xaklakachin wix kiDios» (Salmo 22:9, 10).
KALILAKPUWANTI UMA: Komo Dios tlawalh puskat xlakata xlimasiyanilh tapaxkit kskgata chu xkuentajtlawalh, ¿ni malakpuwaniyan uma pi Dios na kinkalilakgaputsayan kinchatunukan, xlakata xkamanan akinin? (Hechos 17:29).
¿TUKU KINKAMASIYANIYAN BIBLIA XLAKATA LA DIOS KINKAKUENTAJTLAWAYAN?
Jesucristo, tiku tlakg liwana lakgapasa Malakatsukina, wa: «Akgtum tumin nema ni lhuwa xtapalh kalistakan tantiy laktsu tsiktsi, ¿ni xlikana? Pero minTlatkan xalak akgapun katsi asta akxni tantum xanin tamayacha kkatiyatni. Pero asta minchixitkan xalak mi’akgxakgakan katsi la xlikganlhuwa. Wa xlakata ni kapekuantit; wixin tlakg xtapalh litaxtuyatit nixawa lhuwa laktsu tsiktsi» (Mateo 10:29-31, Traducción del Nuevo Mundo, TNM).
Ni lhuwa tiku kuentajtlawakgo putum laktsu tsiktsi nema anan, chu ni akxilhkgo akxni tantum niy. Pero kinTlatkan xalak akgapun kakuentajtlawa tantunu tantunu. Chu maski lhuwa anan tsiktsi, nikxni tlakg xlakaskinka katilitaxtulh kxlakatin Dios la chatum lataman. Chuna, liwana tasiya pi Dios likgaputsayan. Xla lu xlakaskinka akxilhan.
Dios lakaskin pi tlan katawilaw chu xatapaxuwan kinkakuentajtlawayan
Biblia liwana kinkawaniyan:
-
«Jehová lakputsama xlikalanka katiyatni xlakata nalimaklakaskin xlitliwakga xlakata nakalimakgtaya tiku xliputum xnaku skujnanikgo» (2 CRÓNICAS 16:9).
-
«Kintikukan snun kalakgalhaman ti laktankswa talin ixlatamatkan, y xla kaks kakgaxmata akxni takilhanij» (SALMO 34:15, Salmos Ixtatlincan Ti Talipawan Dios, SXP).
-
«Akit kpaxawa porque snun kilakgalhamanita. Porque wix kilakatani la xakakgxtakgajnamaj [o xakpatinama], y la xlakgaputsama kinakuj» (SALMO 31:7, SXP).
«KLAKPUWA PI JEHOVÁ NI XKIMPAXKI»
¿Kinkalimakgtayayan akxni katsiyaw pi Dios kinkalilakgaputsayan chu kinkakuentajtlawayan? Chuna. Hannah, * xalak Inglaterra, wan:
«Makglhuwa klakpuwa pi Jehová ni xkimpaxki chu ni xkgalhti kioración xlakata xkintsankgani takanajla. Xaklakpuwan pi xkimakgapatinama o ni kuenta xkintlawani xlakata ni xlakaskinka xaklitaxtu. Xakmakgkatsi pi ni xkililakgaputsa».
Pero la uku, Hannah liwana katsi pi Jehová lu paxki chu lu lilakgaputsa. ¿Tuku tlawalh pi nialh xlakpuwa pi Dios ni paxki? Xla wan: «Ni kaj lakapala talakgpalilh. Makgasata kkgaxmatli akgtum taʼakgchuwin xalak Biblia xlakata xtamakamastan Jesucristo, nema lu kaks klilakawa chu kimakgtayalh nakkatsi pi Jehová lu kimpaxki. Na xakakxilha pi xkimpaxki akxni xkgalhti kioración, wa xlakata, makglhuwa xaktasa. Nachuna, takgalhtawakga xalak Biblia chu tamakxtumit kimakgtayanit tlakg naklakgapasa Jehová chu nakkatsi pi kinkapaxkiyan. La uku kkatsi pi Jehová kinkapaxkiyan, kinkamakgtayayan chu kinkakuentajtlawaputunan».
Tuku wan Hannah lu tlan limakgkatsikan. Pero ¿la tlan nakatsiya pi Dios xlikana lilakgaputsa tuku makgkatsiya chu akgatekgsa? Natekgsa xtakgalhtin kʼartículo nema stala.
^ párr. 3 Talipuwan nema makgkatsikgo lakpuskatin akxni lakachinita kskgatakan max natlawa pi makgapitsi lakpuskatin tuwa namakgkatsikgo napaxkikgo xlakgskgatankan. Pero ni xlilat nalakpuwankgo pi xkuentajkan. Instituto Nacional de la Salud Mental xalak Estados Unidos, lichuwinan pi talipuwan nema makgkatsikgo lakpuskatin akxni lakachinita kskgatakan, «wa xpalakata wi tuku talakgpali kxmaknikan chu tuku makgkatsikgo chu ni wa xlakata xatse chuna lakaskin». Komo tlakg katsiputuna xlakata uma, kaʼakxilhti artículo nema wanikan «¿Qué es la depresión posparto?», xla revista ¡Despertad! 8 xla junio kata 2003.
^ párr. 5 Biblia masiya pi Dios wanikan Jehová (Salmo 83:18).
^ párr. 15 Kʼumakgolh artículos lakgpalikanit makgapitsi tukuwani.
Max na nalakgatiya uma
MAKATSININA
¿Akgatekgsa Dios tuku wix makgkatsiya?
Dios liwana kinkaʼakgatekgsniyan xlakata tlakg liwana kinkalakgapasan nixawa amakgapitsin, asta katsi la lakgnu ADN nema kgalhiyaw.
