¿CHU WIX? ¿AKSTU KGALHSKINKANITA UMA AKXNI AKXILHA TUKU NITLAN LAMA? ¿TITAXTUNITA TUKU LU NITLAN NEMA MALAKPUWANINITAN PI DIOS NI LILAKGAPUTSAYAN?

Sheila, tiku lama kʼEstados Unidos chu makgastakka kʼakgtum familia nema lu kanajlanikgo Dios, wan: «Lata akxni aktsujku xakwanit kkanajlani Dios xlakata kkatsi pi wa kiMalakatsukinakan, pero nikxni kmakgkatsilh pi lakatsu xkintawi. Maski xakkatsi pi xla xkiʼakxilha, xaklakpuwan pi ni lu kuenta xkintlawani. Ni xaklakpuwan pi ni xkiʼakxilhputun, pero na ni xaklakpuwan pi xla xkililakgaputsa». ¿Tuku xlakata chuna xlakpuwan? Sheila wan: «Kifamilia titaxtulh lhuwa talakgaputsit, chu xtasiya pi Dios nikxni xkinkamakgtayayan».

Xtachuna la Sheila, max wix kanajlaniya Dios tiku kgalhi putum litliwakga, pero maski chuna, max akstu kgalhskinkana komo xla xlikana lilakgaputsayan. Job, chatum chixku tiku xaʼakgstitum xwanit chu xlipawan xlimakgatliwakga chu xliskgalala Malakatsukina, nachuna akstu kgalhskinka (Job 2:3; 9:4). Akxni xtitaxtunita lhuwa talakgaputsit chu nialh xkgalhi takgalhkgalhin, kgalhskilh Dios: «¿Tuku xlakata kintatsekgniya chu la mintalamakgasitsin kilimaxtuya?» (Job 13:24).

Pero ¿tuku wan Biblia? ¿Xkuenta Dios tapatin nema anan? ¿Kalilakgaputsa putum latamanin chu chatunu akinin? ¿Tlan nakatsiyaw komo liwana kinkalakgapasan, kinkaʼakgatekgsniyan chu kinkamakgtayayan akxni kgalhiyaw taʼakglhuwit?

Kʼartículos nema stalakgo, naʼakxilhaw la tamalakatsukin chu Biblia kinkamasiyaniyan pi Dios kinkalilakgaputsayan (Romanos 1:20). Akxni tlakg nalakgapasa miMalakatsukina, tlakg liwana nakatsiya pi xla paxkiyan (1 Juan 2:3; 1 Pedro 5:7).