Komo Dios ni lin kuenta, ¿tuku o tiku xkuenta? ¿Tuku xlakata lhuwa tiku tsinksnimakgo o ni kgalhikgo tuku maklakaskinkgo? ¿Tuku xlakata anan guerras, tajatat chu tuku masputunan? Biblia wan pi pulaktutu tuku xlakata latamanin patinankgo:

1. Akstu paxkinankan, lhuwa tuku kgalhiputunkan chu talamakgasitsi. «Chixku akgchipanit chixku xlakata natlawani tuku nitlan» (Eclesiastés 8:9). Makglhuwa, tiku xʼakstu kapaxkikan chu lixkajni likatsikgo katlawanikgo tuku nitlan amakgapitsin.

2. Kilhtamaku chu tuku kaj xalan lay. Biblia na wan pi latamanin patinankgo «xlakata kilhtamaku chu tuku xalan lay putum kalakgchin» (Eclesiastés 9:11). Uma wamputun pi kinkaʼakgspulayan tuku nitlan, kaj xlakata wilaw niku ni kilitawilatkan chu ni katsiyaw pi wi tuku nalay, o xlakata ni liwana lakapastaknanaw o laksakaw tuku nitlan.

3. Nixatlan xmapakgsina kakilhtamaku. Biblia lichuwinan tiku xkuenta xtapatinkan latamanin akxni wan: «Putum kakilhtamaku wa akgchipanit tiku lixkajni likatsi» (1 Juan 5:19, TNM). Tiku «lixkajni likatsi» wa Akgskgawini, chatum xatliwakga espíritu tiku xapulana chatum ángel xwanit nema tlan xlikatsi, pero ni «tamakgxtakgli kxaxlikana» (Juan 8:44, TNM). Amakgapitsi ángeles akxtum talakgolh Satanás xlakata natlawakgo tuku xlakaskinkgo chu chuna demonios litaxtukgolh (Génesis 6:1-5). Lata akxni talalakatawakakgolh Dios, Satanás chu xdemonios kamatlawikgonit tuku nitlan latamanin, pero la uku tlakg tasiya uma. Akgskgawini lu sitsinit chu «akgskgawi xlipaks ntachixkuwitat», wa xlakata Biblia wan: «Kgoxutanin wa nti lamakgo nkatuxawat, chu wa nti lama ktakgayawana» (Apocalipsis 12:9, 12). Satanás lu nitlan likatsi, lixkajnit xtayat chu lipaxuwa akxni kaʼakxilha latamanin pi patinamakgo. Wa xkuenta tapatin nema anan, ni wa Dios.

KALILAKPUWANTI UMA: Kajwatiya tiku lu lixkajni likatsi chu ni paxkinan kamapatini tiku ni linkgo kuenta. Pero Biblia wan pi «Dios, tapaxkit» (1 Juan 4:8). Wa xlakata, ni xlilat nalakpuwanaw pi Dios tlawa tuku nitlan o tuku ni xaʼakgstitum (Job 34:10).

Pero max nakgalhskinkana chu xlilat chuna nakgalhskinkana: «¿Tuku kilhtamaku namasputu Dios tuku nitlan kamatlawima Satanás latamanin?». Chuna la lichuwinanitaw, Dios xkajni tuku nitlan chu katsani xnaku akxni akxilha pi patinamaw. Asta xTachuwin kinkamaʼakgpuwantiniyan nawaniyaw tuku lilakgaputsayaw, xlakata Dios kinkaliakgatuyunan (1 Pedro 5:7). Kʼartículo nema stala naʼakxilhaw tuku nakinkamasiyaniyan pi Dios lu kinkapaxkiyan chu pi kgalhi litliwakga xlakata namasputu tapatin chu tuku ni xaʼakgstitum. *