Lhuwa latamanin wankgo pi kanajlanikgo Dios, pero akxni kakgalhskinkan tiku Dios, ni putum lakxtum kgalhtinankgo. Wi tiku lakpuwankgo pi Dios chatum juez tiku nitlan likatsi chu lipaxuwa akxni kamalakgaxokge latamanin xtalakgalhinkan. Amakgapitsi lakpuwankgo pi chatum Dios tiku lu paxkinan, chu ankgalhin kinkatapatiyan kaxatukawa tuku xtlawaw. Chu amakgapitsi wankgo pi makgat kinkawilanin chu ni kalilakgaputsa latamanin. Xlakata tipalhuwa tuku wankgo latamanin, max lhuwa lakpuwankgo pi tuwa nalakgapaskan Dios.

¿Xlakaskinka nalakgapasaw Dios? Chuna. Komo tlakg nalakgapasa Dios tlakg napaxuwaya (Hechos 17:26-28). Akxni tlakg nalakgtalakatsuwiya Dios xla tlakg napaxkiyan chu tlakg namakgtayayan (Santiago 4:8). Komo liwana nalakgapasa, tlan nalatapaya putum kilhtamaku (Juan 17:3).

¿La tlan nalakgapasa Dios? Kalilakpuwanti tiku liwana lakgapasa, chatum tiku tlan talalipina. ¿La tlan tsuku talalipina? Max pulana katsi xtukuwani chu max alistalh katsi tuku tayat kgalhi, tuku xlakgati chu tuku ni, tuku xtlawanita chu tuku xlakpuwanit natlawa. Akxni katsi uma, tawalh pi tlakg natalalipina.

Nachuna, wix tlan nalakgapasa Dios komo naputsaya xtakgalhtin umakgolh takgalhskinin:

• ¿TUKU WANIKAN DIOS?

• ¿LA LIKATSI?

• ¿TUKU TLAWANIT?

• ¿TUKU NATLAWA?

• ¿LA NALITAMAKGTAYAYA KOMO NALAKGAPASA DIOS?

Uma revista tlawakanit xlakata namakgtayayan nakatsiya la kgalhti Biblia umakgolh takgalhskinin. Artículos nema stala namakgtayayan nakatsiya tiku Dios, chu la nalitamakgtayaya komo xʼamigo nawana.