Xlakata wi tiku tlan nalakgapasaw, xlakaskinka nakatsiyaw tuku tlawanit. Nachuna, komo lakgapasputuna Dios, talakaskin nakatsiya tuku tlawanit. Lu kaks nalilakawana akxni nakatsiya la litamakgtayayaw tuku Dios tlawanit chu la tatalakxtumi kilatamatkan kkilhtamaku nema aku mima.

Jehová wa xaTlan kiMalakatsukinakan chu xtayat «liwana tasiya lata akxni malakatsukika kakilhtamaku, xlakata litasiya tuku malakatsukinit» (Romanos 1:20, TNM). «Xla xTlawana katiyatni xlakata kgalhi litliwakga, Tiku lakatum wililh katiyatni nema makgalanan xlakata xliskgalala, chu xlakata xliskgalala lanka tlawalh akgapun» (Jeremías 10:12). Tamalakatsukin na kinkamasiyaniyan la kinkapaxkiyan Dios.

Kalilakpuwanti la kinkamakgapaxuwayan xlakata Jehová kinkatlawan «chuna la xla» (Génesis 1:27). Uma kinkamaxkiyan talakaskin nalimasiyayaw xtayat maski kaj tsinu. Na kinkamalakatsukin chuna la tlan naʼakgatekgsaw xlimapakgsin chu xtalakapastakni. Akxni mastayaw talakaskin pi kakinkapulalin uma, tlakg paxuwayaw. Chu na tlan xʼamigos Dios nalitaxtuyaw.

Planeta niku lamaw, liwana limasiya pi Jehová kinkapaxkiyan. Chuna la wa apóstol Pablo, Dios «ni wa ntilimakgaxtakgkgolh mpala kaj ni xʼanalh ntu nalilakgapaskgoy lantla tlan xla ntu ntlaway sampi kinkamakaminiyan sin xala kʼakgapun, chu ntlan lananat, chu na [kinkalimatsamaniyan taway], chu ntapaxuwan kkinakukan» (Hechos 14:17). Akxni Dios malakatsukilh Katiyatni, ni kajwatiya kinkamaxkiyan tuku maklakaskinaw, wata na kinkamaxkin tuku nalipaxuwayaw. Chu uma kaj tsinu limasiya putum tuku Dios nakinkamaxkiyan kilhtamaku nema aku mima.

Jehová tlawalh Katiyatni xlakata anta xlatamaw putum kilhtamaku. Biblia wan pi «katiyatni kamaxkinit lakchixkuwin xlakata ana natalatamaj» chu «ni tlawalh xlakata nitu nalilakan, wata tlawalh xlakata nalatamakan» (Salmo 115:16, SXP; Isaías 45:18). ¿Tiku xʼamakgo latamakgo chu la xlilhuwa kilhtamaku? Biblia wan: «Tiku xa’akgstitum xlakan  nawan katiyatni, chu putum kilhtamaku nalatamakgo anta» (Salmo 37:29).

Wa uma tuku Jehová xlakaskin akxni kamalakatsukilh Adán chu Eva. Wililh uma tamakgaxtokgat kʼakgtum paraíso «xlakata xchananalh chu xkuentajtlawalh» (Génesis 2:8, 15). Dios kalakgayawalh akgtum lu tlan taskujut: «Kakgalhitit kamanan chu kalhuwantit, kamalakgatsamatit katiyatni chu kakuentajtlawatit» (Génesis 1:28). Wa xlakata Adán chu Eva tlan xlatamakgolh putum kilhtamaku. Pero xlakan ni kgalhakgaxmatkgolh Dios chu makgatsankgakgolh talakgalhaman pi xkatalatamakgolh tiku xaʼakgstitum nema nalatamakgo kKatiyatni. Pero chuna la naʼakxilhaw, maski chuna tlawakgolh Jehová ni lakgpalilh tuku lakapastaknit xlakata latamanin chu Katiyatni. Pero pulana kaʼakxilhwi atanu tuku Dios tlawanit.

¿Tuku xlakata kinkamaxkin Jehová xTachuwin? Xlakata lakaskin nalakgapasaw (Proverbios 2:1-5). Xlikana pi Biblia ni kgalhti putum takgalhskinin nema xtlawaw xlakata Dios; ni anan maktum libro nema tlan chuna xtlawalh (Eclesiastés 3:11). Pero putum tuku Biblia wan kinkamakgtayan nalakgapasaw. Tlan nakatsiyaw la likatsi Dios akxni akxilhaw la kalikatsini latamanin. Akxilhaw tiku latamanin kamakgamakglhtinan (Salmo 15:1-5). Katsiniyaw tuku takaknin makgamakglhtinan, la lakaskin nalinaw kilatamatkan chu tuku lakpuwan xlakata lhuwa tuku kgalhiputunkan. Biblia na kinkamaxkiyan talakaskin tlakg liwana nalakgapasaw kiMalakatsukinakan akxni kinkalitachuwinanan tuku wa chu tuku tlawalh xkgawasa, Jesucristo (Juan 14:9).

Jehová na kinkamaxkin xTachuwin xlakata nakatsiyaw la nakgalhiyaw xatapaxuwan latamat. Anta kinkawaniyan tuku kilitlawatkan xlakata nakgalhiyaw xatapaxuwan familia, tlan nalimakgkatsiyaw tuku tlawayaw chu natayaniyaw tuku lilakgaputsayaw. Chuna la naʼakxilhaw alistalh, Biblia kgalhti tlakg xlakaskinka takgalhskinin xlakata latamat, akgtum liʼakxilhtit, tuku xlakata anan tapatin chu tuku nala kilhtamaku nema aku mima. Na kinkawaniyan tuku Dios tlawanit xlakata nakgantaxtu xtalakaskin.

Anan lhuwa atanu tuku limasiya pi Biblia ni xtachuna amakgapitsi libros chu wa Dios tiku matlawinalh. Maski 40 lakchixkuwin tiku tsokgkgolh chu 1,600 kata litlawakgoka, pulaktumta tuku lichuwinan, xlakata tiku matsokgninalh wa Dios (2 Timoteo 3:16). Ni xtachuna amakgapitsi libros xamakgan, Biblia ni talakgpalinit maski titaxtunit lhuwa kilhtamaku, chuna la limasiya lhuwa tatsokgni xalak Biblia xala makgasa. Nachuna, Biblia akgaputaxtunit maski tlawaputunkanit pi nialh namatitaxtikan kʼatanu tachuwin, nialh namaʼakgpitsikan chu nialh nalikgalhtawakgakan. La uku wa libro nema tlakg tamaʼakgpitsi chu tlakg likgalhtawakgakan xlikalanka katiyatni. Xlakata la uku kgalhiyaw Biblia, limasiya pi xTachuwin Dios «namakgapala putum kilhtamaku» (Isaías 40:8).

Atanu tuku Dios tlawanit xlakata nalimasiya pi nakgantaxtu xtalakaskin wa pi kinkamaxkinitan akgtum lu tlan tamaskiwin. Chuna la lichuwinaw xapulana, Dios xlakaskin pi latamanin xlatamakgolh putum kilhtamaku kKatiyatni. Pero akxni Adán ni kgalhakgaxmatnalh chu lakgalhinalh, makgatsankgalh takgalhkgalhin pi tlan xlatamalh putum kilhtamaku, chu nachuna putum xkamanan. «Ntsukulh ntalakgalhin nkatuxawat nkaj xpalakata nchatum nchixku, pus wa linin nkitaxtunilh ntalakgalhin; cha nchu linin, chuna nkgalhikgolh xlipaks nchixkuwin sampi paks lakgalhinankgolh» (Romanos 5:12). Xlakata Adán ni kgalhakgaxmatnalh, xtasiya pi tuku Dios xlakpuwanit ni xʼama kgantaxtu. Pero ¿tuku tlawalh Jehová?

Tuku tlawalh liwana limasiya la likatsi. Tlawalh tuku xaʼakgstitum chu kamalakgaxokgelh Adán chu Eva xlakata ni kgalhakgaxmatnankgolh, pero xlakata xtapaxkit na wi tuku tlawalh xlakata nalimasiya tuku xʼama kakitaxtuni latamanin. Jehová maklakaskilh xliskgalala xlakata xlaksakli tuku natlawa chu nalakkaxtlawa tuku xlama chu lakapala  wa tuku xʼama lilakkaxtlawa (Génesis 3:15). Xʼama maklakaskin xKgawasa, Jesucristo, xlakata xkinkalakgmaxtun ktalakgalhin chu kkalinin. ¿La chuna xʼama la?

Xlakata Jehová xlakkaxtlawalh tuku nitlan kitaxtulh akxni Adán ni kgalhakgaxmatnalh, malakgachalh Jesús kKatiyatni xlakata xkamasiyanilh latamanin tiji nema linan klatamat chu «nalimastay xlatamat, nalilakgmaxtukgoy xlilhuwa ntachixkuwitat» * (Mateo 20:28; Juan 14:6). Jesús tlan xokgolh talakgmaxtut xlakata ni xkgalhi talakgalhin chuna la Adán, pero Jesús ankgalhin kgalhakgaxmatnalh, asta kkalinin. Xlakata ni xlakgchan nani, Jehová malakastakwanilh chu maxkilh talakaskin nataspitpara kʼakgapun. Chuna Jesús tlan xkamaxkilh latamanin tiku xkgalhakgaxmatnankgolh tuku Adán nila kamaxkilh: latamat nema nikxni sputa. «Xpalakata xtalakgachixkuwimakgan nchatum nchixku, wa lakgalhinanin liwankgolh lhuwa amakgapitsin, nachuna xpalakata xtalakgachixkuwin nchatum nchixku, chuna xatamalulokgni liwankgolh lhuwa amakgapitsin» (Romanos 5:19). Dios namaklakaskin xtamakamastan Jesús xlakata namakgantaxti xtamalaknun: latamanin nalatamakgo kKatiyatni putum kilhtamaku.

Chuna la Jehová lakkaxtlawalh taʼakglhuwit nema kitaxtulh akxni Adán ni kgalhakgaxmatnalh, kinkamakgtayayan tlakg nalakgapasaw. Kinkamasiyaniyan pi ni anan tuku natlawa pi ni nakgantaxtu tuku lakpuwan; xtachuwin ankgalhin «chuna nakitaxtu» (Isaías 55:11). Na kinkamasiyaniyan la xlilhuwa kinkapaxkiyan. «Wa yuma nkintikalitasiyunin xtapaxkit Dios, xpalakata mpi timalakgachalh nkatuxawat nchastum xKam, lakimpi wa xpalakata, nalilatamayaw. Wa yuma liwi ntapaxkit: ni cha mpala kin nti xpaxkiw Dios, wampi wata wa nti nkintikapaxkin, na malakgachalh xKam, nakinkapalakgaxokgoyan xpalakata kintalakgalhinkan» (1 Juan 4:9, 10).

Dios asta makamastalh xKgawasa kimpalakatakan. Uma kinkalimasiyaniyan pi «nakinkamaxkiyan xlipaks nkatuwaj» nema kinkamalaknuniyan (Romanos 8:32). ¿Tuku atanu malaknunit? Kaʼakxilhwi.