¿Xlilat chuna nalakpuwanaw? Xlilat. Biblia wan pi Dios wililh kkinakujkan nalatamaputunaw putum kilhtamaku (Eclesiastés 3:11). Na kinkawaniyan pi «Dios, tapaxkit» (1 Juan 4:8). Komo Dios xapaxkina, ¿xlilat pi xwililh kkinakujkan nalatamaputunaw putum kilhtamaku chu nila chuna xtlawaw?

Niti niputun. Asta Biblia wan pi linin chatum «talatlawana» (1 Corintios 15:26). Min kilhtamaku lakapala chin chu amakgapitsi kilhtamaku makgapala. Pero ankgalhin kinkalakgchinan. Lhuwa latamanin ni lakgatikgo lilakpuwankgo linin, asta pekuanikgo. ¿Namin kilhtamaku namakgatlajayaw uma kintalatlawanakan?

¿Xkatsiya pi Dios ni xlakaskin pi latamanin xnikgolh? Libro xla Génesis masiya pi Dios xlakaskin xlatamaw putum kilhtamaku kKatiyatni. Jehová * liwana lakkaxwililh planeta niku lamaw. Alistalh malakatsukilh xapulana chixku, Adán, chu wililh kparaíso, kʼakgtum jardín nema xwi kʼEdén. Alistalh «Dios akxilhli putum tuku xtlawanit chu ¡kaʼakxilhti!, lu tlan xwanit» (Génesis 1:26, 31).

Dios malakatsukilh Adán chuna la xla; ni xkgalhi talakgalhin (Deuteronomio 32:4). Eva, xpuskat  Adán, na ni xkgalhi talakgalhin. Jehová kawanilh: «Kakgalhitit kamanan chu kalhuwantit, kamalakgatsamatit katiyatni chu kakuentajtlawatit, chu kakuentajtlawatit skiti xalak pupunu, animales nema kgoskgo kkatalhman chu putum animales nema tatsuwikgo kkatiyatni» (Génesis 1:28).

Xlakata xkamanan Adán xmalakgatsamakgolh Katiyatni, xtalakaskin kilhtamaku. Xlakata xkgantaxtulh xtalakaskin Dios, xtalakaskin pi Eva xkgalhilh kamanan, chu xkamanan xkgalhikgolh xkamanankan asta akxni Katiyatni xtalakgatsamalh (Isaías 45:18). Komo Adán chu Eva ni xʼamakgo akxilhkgo la xkgantaxtulh xtalakaskin Dios chu kajwatiya xʼamakgo akxilhkgo xkamanankan chu max xnatanatnikan, ¿xlilat pi Jehová xkamaxkilh uma limapakgsin?

Na kalilakpuwanti taskujut nema xlakgayawakanit: nakakuentajtlawa animales. Adán xliwilinit xwanit xtukuwanikan animales, chu xtalakaskin kilhtamaku (Génesis 2:19). Chu xlakata xkatsilh la xkakuentajtlawalh putum tuku xlamakgo, xtalakaskin xkalakgapasli, chu uma xlilh kilhtamaku.

Wa xlakata, pulaktiy limapakgsin nema Dios kamaxkilh Adán chu Eva, nakuentajtlawakgo animales chu namalakgatsamakgo Katiyatni, masiya pi xla kamalakatsukilh xlakata makgas xlatamakgolh. Chu Adán makgas latamalh.

Biblia wan pi akxni nina xmin Munkaklat, latamanin tlakg lhuwa kilhtamaku xlatamakgo nixawa la uku. Génesis 5:5 wan: «Kilhtamaku nema latamalh Adán kichalh akgnajatsa ciento puxamakaw kata». Chu alistalh kalichuwinan kgalhachaxan lakchixkuwin tiku latamakgolh liwaka akgnajatsa ciento kata: Set, Enós, Quenán, Jared, Matusalén chu Noé, tiku xkgalhi akgchaxan ciento kata akxni milh Munkaklat (Génesis 5:6-27; 7:6; 9:29). ¿Tuku xlakata makgas latamakgolh?

Umakgolh lakchixkuwin lakachinkgolh akxni nina makgas xlakgalhinankgonit Adán chu Eva. Max wa xlakata tlakg makgas latamakgolh. Pero ¿la tatalakxtumi ni kgalhikan talakgalhin chu makgas latamakan? Chu ¿la namakgatlajakan linin? Xlakata nakatsiyaw uma, pulana kilikatsitkan tuku xlakata kgolonaw chu niyaw.