MASKI xapulana kinatlatnikan kinkamatitaxtinikgon talakgalhin chu linin akxni ni kgalhakgaxmatnankgolh, tuku lakapastaknit Dios xpalakata latamanin nitu talakgpalima. Anta kxTachuwin, Biblia, Dios ankgalhin kinkawaniyan pi tuku xlakpuwanit natlawa nitu talakgpalima.

• «Tiku xaʼakgstitum xlakan nawan katiyatni, chu putum kilhtamaku nalatamakgo anta» (Salmo 37:29).

• «Xlikana xla xliputum kilhtamaku namalakgsputu linin, chu Jehová, Malana tiku lakgchan namapakgsinan, xlikana naxaka putum lakgpixtajat» (Isaías 25:8).

• «Wa ntu xlikgasputni, talatlawana nawan, wa linin wa ntu nalaktlaway» (1 Corintios 15:26).

• «Nialh katiʼanalh linin; chu na nialh katiʼanalh ntalipuwan, ni mpala wa ntatasa, chu na ni mpala wa ntakatsanajwat» (Apocalipsis [Revelación] 21:4).

¿Tuku natlawa Dios xlakata namalakgsputu linin? Chuna la akxilhnitaw, Biblia liwana wan pi «tiku xaʼakgstitum [...] putum kilhtamaku nalatamakgo» kKatiyatni. Pero na wan pi «ni anan kkatiyatni chixku tiku xaʼakgstitum chu kajwatiya natlawa tuku tlan chu ni nalakgalhinan» (Eclesiastés 7:20). ¿Wamputun uma pi Dios nalakatsala xlimapakgsin xlakata akinin tlan nalatamayaw putum kilhtamaku? Ni, Dios nikxni chuna katitlawalh, xlakata xla «niukxni akgsaninan» (Tito 1:2). Wa xlakata, ¿tuku natlawa xlakata namakgantaxti tuku xlakpuwanit xpalakata latamanin?

Wa tapaxkit tuku tlawalh pi Jehová kxokgolh talakgmaxtut nema xtalakaskin xlakata xkinkalakgmaxtun klinin. Anta kBiblia, akgtum talakgmaxtut wa tuku lixokgokan akxni nitlan tuku tlawakanit o xlakata namakgantaxtikan tuku xaʼakgstitum. Xtapalh talakgmaxtut xtachuna xliwanat tuku lakxlalh. Xlakata putum akinin makglakgalhinanin chu kinkalakgchanan naniyaw, Biblia liwana wan: «Nipara chatum xlakan tlan xokgolakgmaxtu ixlatamat ixtakam. Nila ti xokgoni Dios la ixtapalh ixlatamat, porque nila ti xokgolakgmaxtu ixlatamat, tlania snun tapalaxla, nikxni ti ama xokgo» (Salmo 49:7, 8, Salmo Ixtatlincan ti Talipawan Dios, SXP).

Akxni chatum lataman niy, kajwatiya lakgaxokgo xtalakgalhin. Nila xʼakstu lakgmaxtukan chu na nila lakgaxokgo xtalakgalhinkan amakgapitsin (Romanos 6:7). Xmaklakaskinaw pi tiku ni kgalhi talakgalhin xmastalh xlatamat, ni xlakata xtalakgalhin, wata kimpalakatakan (Hebreos 10:1-4).

Wa uma tuku Dios tlawalh. Malakgachalh xKgawasa xalak akgapun kKatiyatni xlakata xlakachilh la chatum tiku ni kgalhi talakgalhin (1 Pedro 2:22). Jesús wa pi milh xlakata «namastay xlatamat nalilakgmaxtukgoy xlilhuwa ntachixkuwitat» (Marcos 10:45). Nilh xlakata namakgatlaja linin chu nakinkamaxkiyan takgalhkgalhin xlakata nalatamayaw putum kilhtamaku (Juan 3:16).

La uku lu katuwa lamaw chu nila tayanikan, uma limasiya pi lamaw «xaʼawatiya kilhtamaku» nema lichuwinan Biblia (2 Timoteo 3:1, TNM). Xaʼawatiya kilhtamaku nasputa «akxni nalakputsanankan  chu nakamalakgsputukan latamanin tiku lixkajni likatsikgo» (2 Pedro 3:3, 7, TNM). Pero tiku paxkikgo Dios nalakgtaxtukgo chu nalipaxuwakgo «latamat xlipan» o putum kilhtamaku (Mateo 25:46).

Nachuna, lhuwa latamanin tlan nalatamakgo putum kilhtamaku akxni nakamalakastakwanikan. Jesús tlan kamalakastakwani tiku nikgonita. Akxni kilalh kkachikin Naín, lakgalhamalh chatum puskat tiku nialh xkgalhi xchixku chu malakastakwanilh xkgawasa (Lucas 7:11-15). Nachuna, apóstol Pablo wa: «Kkgalhkgalhitiniy Dios [...], mpi nalakastakwanankgoy ninin wa nti xalakwan, chu nti ni xalakwan». Uma takgalhkgalhin liwana masiya pi Dios kapaxki latamanin (Hechos 24:15).

Lhuwa millón latamanin tlan nalatamakgo putum kilhtamaku. Biblia wan: «Tiku xa’akgstitum xlakan nawan katiyatni, chu putum kilhtamaku nalatamakgo anta» (Salmo 37:29). Chu tlan xatapaxuwan nawankgo watiya tachuwin nema wa apóstol Pablo max kgatsiya akgtiy mil kata: «Linin, ¿niku wi militliwakga? Linin, ¿niku wi miveneno?» (1 Corintios 15:55, TNM). Uma kilhtamaku makgatlajakanita nawan tlakg xatliwakga xtalamakgasitsin latamanin.