La uku na tlan napaxuwaya
KALILAKPUWANTI akgtum kakilhtamaku niku ni anan tajatat, ni kgolonkan chu ni anan linin. Wix tlan nalatapaya kʼuma kakilhtamaku. Pero la uku, chuntiya anan lhuwa taʼakglhuwit. ¿La tlan napaxuwaya la uku? Biblia limin tastakyaw nema tlan namakgtayayan xlakata napaxuwaya. Kaʼakxilhwi la tlan nakinkamakgtayayan xTachuwin Dios xlakata nakatsiyaw la natayaniyaw makgapitsi taʼakglhuwit.
NALIPAXUWAYAW TUKU KGALHIYAW
Xtastakyaw Biblia: «Ni tilakgpaxkiyatit xman wa ntumin, kapaxuwanalipitit wa ntu nkgalhiyatit» (Hebreos 13:5).
Kakilhtamaku lhuwa tuku kinkamalaknuniyan nema tasiya pi max lu maklakaskinaw. Pero Biblia wan pi tlan nalipaxuwayaw tuku kgalhiyaw. ¿La tlan natlawayaw?
Ni kapaxkiw tumin. «Paxkikan tumin» tlawa pi lhuwa latamanin nakgalhikgo tajatat, namakgatsankgakgo xfamiliajkan, tiku xtalalinkgo, xalakwan xtayatkan chu nitlan nakalichuwinankan (1 Timoteo 6:10, TNM). ¡Lhuwa tuku makgatsankgakgo! Nachuna, tiku paxki tumin ankgalhin tlakg kgalhiputun (Eclesiastés 5:10).
Kalakapastakwi pi latamanin tlakg xlakaskinka nixawa tuku kgalhikan. Xlikana pi anan tuku xlakaskinka, pero umakgolh nila kinkapaxkikgoyan; kajwatiya latamanin tlan paxkinankgo. Kgalhikan «xaxlikana amigo» tlakg kinkamakgapaxuwayan (Proverbios 17:17).
KOMO NALILATAMAYAW XTASTAKYAW BIBLIA, NAPAXUWAYAW
KGALHIKAN TAJATAT
Xtastakyaw Biblia: «Akgtum naku nema paxuwa mapaksanan» (Proverbios 17:22).
Tapaxuwan wa tlakg xatlan «likuchun» xlakata tlan natayanikan tajatat. Pero ¿la tlan napaxuwayaw akxni tatatlayaw?
Napaxtikatsininanaw. Komo putum kilhtamaku lilipuwanaw xlakata kintajatatkan, «putum kilhtamaku» nitlan katimakgkatsiw (Proverbios 15:15). Pero Biblia wa uma tuku kinkawaniyan: «Kamastatit mpaxkatsinit» (Colosenses 3:15). Kilikatsinitkan napaxtikatsininanaw xpalakata tuku tlan kgalhiyaw kkilatamatkan, maski ni lu xlakaskinka. Akxni tsankga chichini, akxni makgkatsiyaw xaskgawiwi un o akxni tiku paxkiyaw akxilhaw pi litsin, tlan namakgapaxuwa kilatamatkan.
Wi tuku natlawayaw xpalakata amakgapitsin. «Xaliwaka ntlan akgtsiyaj [o xatapaxuwan] nalilatapaya ntu natakinana, nixawa ntu namakgamakglhtinana», chu uma nachuna kitaxtu maski tatatlayaw (Hechos 20:35). Akxni amakgapitsin kinkapaxtikatsinikgoyan tuku tlawanitaw xpalakatakan, lu paxuwayaw chu nialh lu lakapastakaw kintaʼakglhuwitkan. Akxni kamakgtayayaw amakgapitsin tlakg tlan makgkatsiyaw.
MATLIWAKGLHKAN TAMAKGAXTOKGAT
Xtastakyaw Biblia. Kakatsitit «tuku tlakg xlakaskinka» (Filipenses 1:10, TNM).
Tamakgaxtokgat tiku ni lhuwa kilhtamaku akxtum tawilakgo max nalatamakgatlinikgo. Wa xlakata xlakaskinka pi xachixku chu xapuskat pulana nawilikgo xtamakgaxtokgatkan, wa pulaktum tuku tlakg xlakaskinka xliʼakxilhatkan kxlatamatkan.
Akxtum tuku katlawatit. Biblia wan pi «tlakg tlan chatiy nixawa kaj chatum» (Eclesiastés 4:9). Kalilakpuwanti tuku tlan akxtum natlawayatit nixawa tuku miʼakstu lakgatiya tlawaya. Akgtum liʼakxilhtit, tlan akxtum natlawayatit liwat, napaxialhnanatit, akxtum nawayatit kape o wi tuku nalipaxuwayatit.
Kalamasiyanitit mintapaxkitkan. Biblia wan pi xachixku chu xapuskat xlalipaxkitkan chu xlalimaxkitkan kakni (Efesios 5:28, 33). Akxni latalitsinatit, laʼakgpixtiyayatit o wi tuku lamaskiwiyatit matliwakglha mintamakgaxtokgatkan. Chu kalakapastakti pi kajwatiya natatalakgxtupiya tiku tamakgaxtokga (Hebreos 13:4).
Max na nalakgatiya uma
MIFAMILIA TLAN NAPAXUWA
Kaputsatit Dios napaxuwayatit ktamakgaxtokgat
Akgtiy ni tuwa takgalhskinin namakgtayayan tlakg tlan natawila mintamakgaxtokgat.
