KALILAKPUWANTI pi akxilhpat akgtum película niku taxtu chatum tlakgna tiku lu lakgapaskan, max chatum tiku wix lu lakgatiya akxilha. Película pulana masiya akxni aktsinajku xwanit, akxni xkatsinima tlakgnan chu la xlilhuwa makgatawakgalh. Alistalh tasiya la tlakgnama kxlakatin lhuwa latamanin, an lakalhuwa kachikinin chu lu lakgapaskan kxlikalanka katiyatni. Pero ni lhuwa kilhtamaku titaxtu, masiyakan la tsuku tsikan chu niy.

Tuku lichuwinan película xaxlikana, pero tiku taxtu anta nialhti lama. Komo xtlawaka xpelícula chatum científico, chatum kgamana o chatum tiku lu lakgapaskan nachuna xkitaxtunilh. Maski lhuwa tuku tlan xtlawalh kxlatamat, max nalakpuwanaw: ¿tuku atanu xtlawalh komo ni xkgololh chu ni xnilh?

Pero maski ni lakgatiyaw uma, putum akinin niyaw (Eclesiastés 9:5). Maski lhuwa tuku xtlawaw, nila tsalaniyaw takgolun chu linin. Nachuna, tuku kaj xalan lay o akgtum tajatat tlan nakinkamakgniyan. Biblia wan pi litaxtuyaw la «akgtum mixinat ntu ntasiyuy nkaj tsinuj kilhtamaku, na makgtum tunkan lakgsputa» (Santiago 4:14).

Wi tiku lakpuwankgo pi ni katsiyaw tuku nala kkilatamatkan chu ni katsiyaw tuku xlakata lamaw, wa xlakata wankgo: «Kawayaw chu kakgotnaw, xlakata chali naniyaw» (1 Corintios 15:32, Traducción del Nuevo Mundo, TNM). Pero akxni chuna wankgo, ¿ni xlikana pi kajwatiya lilakpuwankgo linin? Nachan kilhtamaku akxni max akstu nakinkakgalhskinkanan tuku xlakata lamaw, liwaka komo lakgaputsamaw. ¿Niku tlan natekgsaw xatakgalhtin?

Lhuwa latamanin putsananikgo tuku wankgo científicos xlakata natekgskgo xatakgalhtin. Tuku katsikgonit científicos chu makuchinanin makgtayananit pi atsinu tlakg lhuwa nalatamayaw, chu makgapitsi científicos chuntiya putsamakgo la tlan tlakg namalhmanikgo latamat. Maski chuna, wijku takgalhskinin nema ni tekgskgo xatakgalhtin: ¿tuku xlakata kgolonaw chu niyaw? ¿Namin kilhtamaku akxni natlajayaw linin? Artículos nema stala nalichuwinan uma chu nakgalhti uma takgalhskinin: ¿tuku xlakata lamaw?